ഡിവൈഎഫ്‌ഐ സംസ്ഥാന സമ്മേളന വേദിയില്‍ അവതരിപ്പിച്ച ‘മിസ’ നാടകത്തിനെതിരെയുള്ള വിവാദങ്ങൾക്കും സദാചാര ആക്രമണങ്ങൾക്കുമെതിരെ ശക്തമായ പ്രതികരണവുമായി സംഘടന രംഗത്ത്. നാടകം വീണ്ടും പൊതുസമ്മേളന വേദിയില്‍ പ്രദര്‍ശിപ്പിക്കുമെന്ന് ഡിവൈഎഫ്‌ഐ വ്യക്തമാക്കി. നാടകത്തിൻ്റെ പേരില്‍ സംഘടനയെ അപമാനിക്കാന്‍ ശ്രമിക്കുന്നവര്‍ക്കെതിരെ കര്‍ശന നിയമനടപടി സ്വീകരിക്കുമെന്നും ഭാരവാഹികൾ മുന്നറിയിപ്പ് നൽകി.
നാടകത്തിലെ രംഗങ്ങള്‍ മറ്റു പാട്ടുകൾ ചേർത്ത് വക്രീകരിച്ച്, മനോവൈകൃതത്തിനനുസരിച്ച് ചിലര്‍ സാമൂഹിക മാധ്യമങ്ങളിൽ പ്രചരിപ്പിക്കുന്നുണ്ടെന്നാണ് ഡിവൈഎഫ്‌ഐയുടെ പ്രധാന പരാതി. കോണ്‍ഗ്രസിൻ്റെയും ബിജെപിയുടെയും മുസ്ലിം ലീഗിൻ്റെയും പ്രവര്‍ത്തകരും നേതാക്കളുമാണ് ഇത്തരത്തിലുള്ള വ്യാജ പ്രചാരണങ്ങൾക്ക് പിന്നിലെന്നും ഡിവൈഎഫ്‌ഐ കുറ്റപ്പെടുത്തി. ബിജെപിയുടെ കാസര്‍ഗോഡ് ജില്ലാ അധ്യക്ഷന്‍ ഉള്‍പ്പെടെ എഡിറ്റ് ചെയ്ത വീഡിയോയാണ് പ്രചരിപ്പിക്കുന്നതെന്നും ചരിത്ര വിരോധത്തിൻ്റെ കാര്യത്തില്‍ ഈ കക്ഷികളെല്ലാം ഐക്യപ്പെടുന്നുണ്ടെന്നും സംഘടന ആരോപിച്ചു.
നിയമ നടപടിയുമായി ‘ചിലങ്ക ഫ്‌ലോട്ടിങ് തിയേറ്റർ’
മിസ നാടകത്തിനെതിരായ അധിക്ഷേപ പരാമര്‍ശങ്ങളിലും വ്യാജ പ്രചാരണങ്ങളിലും നിയമനടപടി സ്വീകരിക്കുമെന്ന് നാടകം അവതരിപ്പിച്ച ‘ചിലങ്ക ഫ്‌ലോട്ടിങ് തിയേറ്റര്‍’ വ്യക്തമാക്കി. നാടകത്തെ അധിക്ഷേപിക്കും വിധം ദൃശ്യങ്ങൾ പ്രചരിപ്പിച്ചതിനെതിരെ പൊലീസിൽ പരാതി നൽകുമെന്ന് നാടകത്തിലെ കേന്ദ്ര കഥാപാത്രത്തെ അവതരിപ്പിച്ച ചിന്നു ചിലങ്ക പ്രതികരിച്ചു. നാടകത്തിലെ ദൃശ്യങ്ങൾ ചിത്രീകരിക്കാനും അനുവാദമില്ലാതെ പ്രചരിപ്പിക്കാനും പാടില്ലാത്തതാണെന്നും ഇതിന് പിന്നിൽ വ്യക്തമായ രാഷ്ട്രീയ ലക്ഷ്യങ്ങളുണ്ടെന്നും അവര്‍ വ്യക്തമാക്കി.
നടന്‍ ജോയ് മാത്യുവിൻ്റെ പിന്തുണ
നാടകത്തിനെതിരെ നടക്കുന്ന സദാചാര ആക്രമണങ്ങളില്‍ പ്രതികരണവുമായി പ്രമുഖ നടന്‍ ജോയ് മാത്യുവും രംഗത്തെത്തി. മിസ നാടകത്തെ പിന്തുണച്ച് ഫേസ്ബുക്കില്‍ പങ്കുവെച്ച കുറിപ്പിലാണ് അദ്ദേഹം നിലപാട് വ്യക്തമാക്കിയത്. ലോകം മാറുന്നതിനൊപ്പം കലാരൂപങ്ങളിലും മാറ്റം സംഭവിക്കുമെന്നും, ഇത് മനസ്സിലാക്കാന്‍ കഴിയാത്ത ലൈംഗിക വിഷാദം അനുഭവിക്കുന്ന കപട സദാചാരവാദികളാണ് ഇപ്പോള്‍ ബഹളമുണ്ടാക്കുന്നതെന്നും അദ്ദേഹം വിമര്‍ശിച്ചു. കാനായി കുഞ്ഞിരാമൻ്റെ മലമ്പുഴയിലെ യക്ഷി ശില്പം കണ്ട് നെറ്റിചുളിച്ച അതേ കപടസദാചാര ബോധമാണ് ഇതിന് പിന്നിലെന്നും അദ്ദേഹം പരിഹസിച്ചു.
സ്നേഹലത റെഡ്ഡിയുടെ ജീവിതം
പ്രശസ്തയായ സ്നേഹലത റെഡ്ഡിയുടെ ജീവിതത്തെ ആസ്പദമാക്കി ഒരുക്കിയതാണ് ‘മിസ’ നാടകം. നാടകത്തിനെതിരെയുള്ള സദാചാര ആക്രമണങ്ങൾക്കെതിരെ മട്ടന്നൂര്‍ എംഎല്‍എയും ഡിവൈഎഫ്‌ഐ സംസ്ഥാന സെക്രട്ടറിയുമായ വികെ സനോജ് രൂക്ഷ വിമര്‍ശനവുമായി രംഗത്തെത്തിയിരുന്നു.
മുന്‍പ് കോട്ടയത്തു നടന്ന സര്‍വകലാശാല കലോത്സവത്തില്‍ സ്നേഹലത റെഡ്ഡിയുടെ മകള്‍ നന്ദന റെഡ്ഡി മുഖ്യാതിഥിയായി പങ്കെടുക്കുന്നതിനെതിരെ കോണ്‍ഗ്രസ് നടത്തിയ എതിര്‍പ്പുകളെ അദ്ദേഹം ഫേസ്ബുക്ക് കുറിപ്പിലൂടെ ഓർമ്മിപ്പിച്ചു. അടിയന്തരാവസ്ഥയും സ്നേഹലത റെഡ്ഡിയുടെ പേരും കേള്‍ക്കുമ്പോള്‍ ഇന്നും ചിലർക്ക് അസ്വസ്ഥത ഉണ്ടാകുന്നത് സ്വാഭാവികമാണെന്നും സനോജ് കുറ്റപ്പെടുത്തി.
