തെലങ്കാനയിലെ നൽഗൊണ്ട ജില്ലയിൽ മൊബൈൽ ടവറുകളിൽനിന്ന് വിലപിടിപ്പുള്ള ഉപകരണങ്ങൾ മോഷ്ടിച്ചിരുന്ന അന്തർസംസ്ഥാന സംഘത്തെ പോലീസ് പിടികൂടി. പ്രമുഖ ടെലികോം കമ്പനിയായ എയർടെല്ലിലെ നിലവിലുള്ളതും മുൻ ജീവനക്കാരുമായ ഒമ്പത് പേരാണ് അറസ്റ്റിലായത്. പ്രതികളിൽനിന്ന് ഏകദേശം 1.62 കോടി രൂപയുടെ ടവർ ഉപകരണങ്ങളും പണവും വാഹനങ്ങളും പിടിച്ചെടുത്തതായി പോലീസ് അറിയിച്ചു.
മൊബൈൽ ടവറുകളിൽനിന്ന് നിർണായക ഉപകരണങ്ങൾ കാണാതാകുന്നതായി പരാതി ലഭിച്ചതിനെത്തുടർന്നാണ് നൽഗൊണ്ട ജില്ലാ പോലീസ് അന്വേഷണം ആരംഭിച്ചത്. ജില്ലാ എസ്പി ശരത് ചന്ദ്ര പവാറിന്റെ മേൽനോട്ടത്തിൽ സിസിഎസ് ഇൻസ്പെക്ടർ എം. ജിതേന്ദർ റെഡ്ഡിയുടെ നേതൃത്വത്തിൽ രണ്ട് പ്രത്യേക അന്വേഷണ സംഘങ്ങളെ രൂപീകരിച്ചു. നവംബർ 14ന് നടത്തിയ വാഹന പരിശോധനയ്ക്കിടെയാണ് പ്രതികൾ പിടിയിലായത്.
അറസ്റ്റിലായവരിൽ മൂന്ന് എൻജിനീയർമാർ, നാല് ടവർ റിഗ്ഗർമാർ/ടെക്നീഷ്യൻമാർ, ഒരു ഡ്രൈവർ, ഒരു മുൻ എയർടെൽ ജീവനക്കാരൻ എന്നിവരാണ് ഉൾപ്പെടുന്നത്. ടെലികോം കമ്പനിയിലെ ജോലിപരിചയവും ടവറുകളുടെ സാങ്കേതിക സംവിധാനങ്ങളെക്കുറിച്ചുള്ള അറിവും ഉപയോഗിച്ചാണ് സംഘം മോഷണം ആസൂത്രണം ചെയ്തിരുന്നത്. രാത്രികാലങ്ങളിൽ ടവർ കേന്ദ്രങ്ങളിലെത്തി നെറ്റ്‌വർക്ക് കണക്റ്റിവിറ്റിക്ക് നിർണായകമായ റേഡിയോ റിമോട്ട് യൂണിറ്റുകൾ (ആർആർയു) അഴിച്ചുമാറ്റുകയായിരുന്നു രീതി.
തെലങ്കാനയിലെയും ആന്ധ്രാപ്രദേശിലെയും വിവിധ ഭാഗങ്ങളിലായി 38 മോഷണങ്ങൾ നടത്തിയതായി ചോദ്യം ചെയ്യലിൽ പ്രതികൾ സമ്മതിച്ചെന്ന് പോലീസ് വ്യക്തമാക്കി. മിര്യാലഗുഡയിൽ 16, നൽഗൊണ്ടയിൽ ഒമ്പത്, സൂര്യപേട്ടിൽ എട്ട്, ദേവരകൊണ്ടയിൽ രണ്ട്, മറ്റ് ജില്ലകളിലായി മൂന്ന് എന്നിങ്ങനെയാണ് മോഷണങ്ങൾ നടന്നത്. ത്രിപുരാരം, നൽഗൊണ്ട റൂറൽ പോലീസ് സ്റ്റേഷനുകളിലും ഇവർക്കെതിരെ കേസുകളുണ്ട്.
ഹൈദരാബാദിലെ മൊബൈൽ ടവറുകളിൽനിന്ന് മോഷ്ടിച്ച ഉപകരണങ്ങളും സംഘം വിൽപ്പന നടത്തിയിരുന്നു. ഇതിലൂടെ ലഭിച്ച പണം ഉപയോഗിച്ച് ആഡംബര കാറുകളും ബൈക്കുകളും വാങ്ങുകയും ആഘോഷങ്ങൾ നടത്തുകയും ചെയ്തിരുന്നതായാണ് പോലീസ് വെളിപ്പെടുത്തൽ. മൂന്ന് കാറുകൾ, രണ്ട് മോട്ടോർ സൈക്കിളുകൾ, 15 ലക്ഷം രൂപ, ഏകദേശം 25 ലക്ഷം രൂപ വിലമതിക്കുന്ന എട്ട് മൊബൈൽ ഫോണുകൾ എന്നിവയും പിടിച്ചെടുത്തു.