ഇന്ത്യ-ബംഗ്ലാദേശ് അതിർത്തിയിലൂടെയുള്ള നുഴഞ്ഞുകയറ്റത്തെക്കുറിച്ചുള്ള ആശങ്കകൾക്കിടയിൽ, തെറ്റായ വിവരങ്ങളുടെയും വ്യാജ വീഡിയോകളുടെയും ഭീഷണി അതിർത്തി രക്ഷാ സേനയ്ക്ക് മറ്റൊരു വെല്ലുവിളിയായി ഉയർന്നുവരുന്നു. ഇത് കിംവദന്തികൾക്കും വർഗീയ ജ്വലനങ്ങൾക്കും വഴിയൊരുക്കുന്നു.
സുരക്ഷാ ഉദ്യോഗസ്ഥർ പറയുന്നതനുസരിച്ച്, ബിഎസ്എഫിൻ്റെ കിഴക്കൻ കമാൻഡിന് കീഴിലുള്ള അതിർത്തി മേഖലയിൽ നാലോ അഞ്ചോ വീഡിയോകൾ പ്രധാനമായും പ്രചരിക്കുന്നുണ്ട്. ഈ വീഡിയോകൾ വർഗീയ പ്രകോപനപരവും മൊത്തത്തിലുള്ള ക്രമസമാധാന നിലയ്ക്ക് ഹാനികരമാണെന്ന് സുരക്ഷാ സേന അറിയിച്ചു .
കൂടാതെ, ഈ വീഡിയോകളിൽ സ്ത്രീകൾക്കെതിരായ ലൈംഗിക അതിക്രമങ്ങൾ, റോഹിങ്ക്യൻ അഭയാർത്ഥികളുടെ മൃതദേഹങ്ങൾ, അതിർത്തി കടക്കുന്ന ആളുകൾ എന്നിവ പോലുള്ള പ്രകോപനപരമായ ഉള്ളടക്കമുണ്ട്. ഇവ പഴയതും തെറ്റിദ്ധരിപ്പിക്കുന്നതുമാണെന്നും വർഗീയ വികാരം വളർത്തുക എന്ന ലക്ഷ്യത്തോടെ ബോധപൂർവം പ്രചരിപ്പിച്ചതാണെന്നും സുരക്ഷാ സേന അവകാശപ്പെട്ടു.
ബിഎസ്എഫ് ഉദ്യോഗസ്ഥർ അതിർത്തി മേഖലയിലുടനീളമുള്ള പ്രാദേശിക ഗ്രാമീണരുമായി ദിവസവും പതിവായി കൂടിക്കാഴ്ചകൾ നടത്തുന്നുണ്ട്. ഇത്തരം വ്യാജ വീഡിയോകളെ കുറിച്ച് പരിസരവാസികളെ ബോധവത്കരിക്കുന്നുണ്ട്. സാമുദായിക സൗഹാർദ്ദം നിലനിർത്താൻ ഇത്തരം വീഡിയോകൾ പ്രചരിപ്പിക്കരുതെന്ന് ഗ്രാമവാസികൾക്ക് മുന്നറിയിപ്പ് നൽകുന്നതായി ഒരു മുതിർന്ന ഉദ്യോഗസ്ഥൻ പറഞ്ഞു.
