...
Home Business ‘മുംബൈയേക്കാൾ പകുതി വിലയിൽ ദുബായിൽ ഫ്ലാറ്റുകൾ’; അടുത്ത 5 വർഷത്തിനുള്ളിൽ വില ഇരട്ടിയാകുമെന്ന് ഡാന്യൂബ് പ്രോപ്പർട്ടീസ്

‘മുംബൈയേക്കാൾ പകുതി വിലയിൽ ദുബായിൽ ഫ്ലാറ്റുകൾ’; അടുത്ത 5 വർഷത്തിനുള്ളിൽ വില ഇരട്ടിയാകുമെന്ന് ഡാന്യൂബ് പ്രോപ്പർട്ടീസ്

ഇന്ത്യൻ നിക്ഷേപകരുടെ താൽപ്പര്യം വർധിച്ചുവരുന്ന സാഹചര്യത്തിൽ പുതിയ പദ്ധതിയും ശ്രദ്ധ നേടുമെന്നാണ് ഡാന്യൂബ് പ്രോപ്പർട്ടീസിന്റെ പ്രതീക്ഷ

45

ദുബായ്: മുംബൈയിലെയും ഡൽഹിയിലെയും പ്രമുഖ മേഖലകളെ അപേക്ഷിച്ച് കുറഞ്ഞ നിരക്കിൽ ദുബായിൽ റിയൽ എസ്റ്റേറ്റ് നിക്ഷേപം നടത്താമെന്ന് ഡാന്യൂബ് പ്രോപ്പർട്ടീസ്. അടുത്ത മൂന്ന് മുതൽ അഞ്ച് വർഷത്തിനുള്ളിൽ ദുബായിലെ പ്രോപ്പർട്ടി വിലയിൽ വലിയ വർധനയുണ്ടാകുമെന്നും ചില മേഖലകളിൽ നിരക്ക് ഇരട്ടിയാകാൻ സാധ്യതയുണ്ടെന്നും കമ്പനി വിലയിരുത്തുന്നു.

കഴിഞ്ഞയാഴ്ച ദുബായിൽ പുതിയ റെസിഡൻഷ്യൽ പദ്ധതിയുടെ ഉദ്ഘാടനത്തോടനുബന്ധിച്ച് പിടിഐക്ക് നൽകിയ അഭിമുഖത്തിൽ ഡാന്യൂബ് ഗ്രൂപ്പ് സ്ഥാപകനും ചെയർമാനുമായ റിസ്വാൻ സാജനാണ് ഇക്കാര്യം വ്യക്തമാക്കിയത്.

മുംബൈയിലെ പ്രമുഖ പ്രദേശങ്ങളുമായി താരതമ്യം ചെയ്യുമ്പോൾ ദുബായിലെ റിയൽ എസ്റ്റേറ്റ് നിരക്ക് പകുതിയിൽ താഴെയാണെന്നാണ് അദ്ദേഹത്തിന്റെ അവകാശവാദം.

ചതുരശ്ര അടിക്ക് 90,000 രൂപ; മുംബൈയിൽ രണ്ടുലക്ഷം

ദുബായിലെ മികച്ച ലൊക്കേഷനുകളിൽ ചതുരശ്ര അടിക്ക് ഏകദേശം 1,000 ഡോളർ, അതായത് 90,000 രൂപയ്ക്കടുത്ത് പ്രോപ്പർട്ടികൾ ലഭ്യമാണെന്ന് റിസ്വാൻ സാജൻ പറഞ്ഞു.

എന്നാൽ മുംബൈയിലെ ബാന്ദ്ര പോലുള്ള പ്രമുഖ മേഖലകളിൽ ചതുരശ്ര അടിക്ക് ഏകദേശം രണ്ട് ലക്ഷം രൂപയാണ് വില. ഇതുമായി താരതമ്യം ചെയ്യുമ്പോൾ ദുബായിലെ പ്രോപ്പർട്ടി വില ഇപ്പോഴും നിക്ഷേപകർക്ക് താങ്ങാനാകുന്ന നിലയിലാണെന്നും അദ്ദേഹം ചൂണ്ടിക്കാട്ടി.

ഇന്ത്യ, അമേരിക്ക, യൂറോപ്പ് എന്നിവിടങ്ങളിലെ 14 നഗരങ്ങളിലെ പ്രധാന മേഖലകളിലെ റിയൽ എസ്റ്റേറ്റ് വിലകൾ താരതമ്യം ചെയ്തുള്ള പഠനവും കമ്പനി നടത്തിയിട്ടുണ്ട്.

പഠനത്തിലെ കണക്കുകൾ പ്രകാരം ദുബായിലെ പ്രോപ്പർട്ടികളിൽ നിന്ന് പ്രതിവർഷം ശരാശരി 6.5 ശതമാനം വാടക വരുമാനം ലഭിക്കുമ്പോൾ മുംബൈയിൽ ഇത് 3.9 ശതമാനം മാത്രമാണെന്നും സാജൻ പറഞ്ഞു.

അഞ്ച് വർഷത്തിനുള്ളിൽ വില ഇരട്ടിയാകുമോ?

ദുബായിലെ റിയൽ എസ്റ്റേറ്റ് വിപണിക്ക് ഇനിയും വലിയ വളർച്ചാ സാധ്യതയുണ്ടെന്നാണ് കമ്പനിയുടെ വിലയിരുത്തൽ. അടുത്ത നാല് മുതൽ അഞ്ച് വർഷത്തിനുള്ളിൽ പ്രോപ്പർട്ടി വില ഇരട്ടിയാകുമെന്നാണ് റിസ്വാൻ സാജൻ പ്രതീക്ഷ പ്രകടിപ്പിച്ചത്.

ഡാന്യൂബ് പ്രോപ്പർട്ടീസിന്റെ പദ്ധതികളിൽ വാങ്ങുന്നവരിൽ ഏകദേശം 30 ശതമാനവും ഇന്ത്യക്കാരാണെന്നും കമ്പനി വ്യക്തമാക്കി. ഇന്ത്യൻ നിക്ഷേപകർക്കിടയിൽ ദുബായിലെ റിയൽ എസ്റ്റേറ്റിന് മികച്ച സ്വീകാര്യതയുണ്ടെന്നും അദ്ദേഹം പറഞ്ഞു.

ദുബായിലെ നികുതി ആനുകൂല്യങ്ങൾ, മികച്ച ആരോഗ്യപരിരക്ഷാ സൗകര്യങ്ങൾ, വിദ്യാഭ്യാസ മേഖല, ജീവിതനിലവാരം എന്നിവയാണ് ഇന്ത്യൻ നിക്ഷേപകരെ പ്രധാനമായും ആകർഷിക്കുന്ന ഘടകങ്ങൾ. വ്യക്തിഗത വരുമാന നികുതി ഇല്ലാത്തതും ദുബായുടെ പ്രധാന ആകർഷണമാണെന്ന് സാജൻ ചൂണ്ടിക്കാട്ടി.

ഭൗമരാഷ്ട്രീയ പ്രതിസന്ധി; വിപണിക്ക് ആത്മവിശ്വാസം

മേഖലയിലെ നിലവിലെ ഭൗമരാഷ്ട്രീയ സാഹചര്യങ്ങൾ ദുബായിലെ റിയൽ എസ്റ്റേറ്റ് വിപണിയെ ബാധിക്കുമെന്ന ആശങ്ക തുടക്കത്തിൽ നിക്ഷേപകർക്കുണ്ടായിരുന്നുവെന്ന് റിസ്വാൻ സാജൻ പറഞ്ഞു. എന്നാൽ ഇപ്പോൾ സാഹചര്യം സാധാരണ നിലയിലേക്ക് മടങ്ങിയെന്നും ദുബായിൽ നിക്ഷേപം നടത്താൻ ആളുകൾക്ക് ആത്മവിശ്വാസമുണ്ടെന്നും അദ്ദേഹം അവകാശപ്പെട്ടു.

ലോകത്തിന്റെ വിവിധ ഭാഗങ്ങളിൽ നിന്നുള്ളവർ വീണ്ടും ദുബായിലേക്ക് എത്തുന്നുണ്ട്. കോവിഡ് മഹാമാരിക്ക് ശേഷം ദുബായിലെ റിയൽ എസ്റ്റേറ്റ് വിപണി നടത്തിയ തിരിച്ചുവരവിനേക്കാൾ മികച്ച വളർച്ചയാണ് വരാനിരിക്കുന്നതെന്നും അദ്ദേഹം പ്രതീക്ഷ പ്രകടിപ്പിച്ചു.

അതേസമയം, കഴിഞ്ഞ വർഷത്തെ അപേക്ഷിച്ച് ഈ വർഷം ഒക്ടോബർ വരെ ദുബായിലെ ജനസംഖ്യയിൽ രണ്ട് ലക്ഷം പേരുടെ വർധനയുണ്ടായതായി ഡാന്യൂബ് പ്രോപ്പർട്ടീസ് മാനേജിംഗ് ഡയറക്ടർ അദേൽ സാജൻ പറഞ്ഞു.

ഷാരൂഖ് ഖാന്റെ പേരിൽ പുതിയ റെസിഡൻഷ്യൽ പദ്ധതി

ഡാന്യൂബ് പ്രോപ്പർട്ടീസിന്റെ പുതിയ പദ്ധതിയായ ‘ഷാരൂഖ്സ് റെസിഡൻസസ്’ നവംബർ 11നാണ് ബുക്കിങ്ങിനായി തുറന്നത്. ബോളിവുഡ് താരം ഷാരൂഖ് ഖാന്റെ പേരിലുള്ള പദ്ധതിയിൽ അദ്ദേഹത്തിന്റെ ഭാര്യയും ഇന്റീരിയർ ഡിസൈനറുമായ ഗൗരി ഖാൻ രൂപകൽപ്പന ചെയ്ത പെന്റ്ഹൗസുകളും ഉൾപ്പെടുന്നു.

പൂർണമായും സജ്ജീകരിച്ച വാട്ടർഫ്രണ്ട് റെസിഡൻഷ്യൽ പദ്ധതിയിലെ അപ്പാർട്ട്മെന്റുകൾക്ക് 16.5 ലക്ഷം ദിർഹം മുതലാണ് വില. ഇന്ത്യൻ രൂപയിൽ ഏകദേശം 4.2 കോടി രൂപ വരും.

വാങ്ങുന്നവർക്ക് ആശ്വാസകരമാകുന്ന 30:70 പേയ്‌മെന്റ് പദ്ധതിയും കമ്പനി അവതരിപ്പിച്ചിട്ടുണ്ട്. ഇതുപ്രകാരം നിർമാണ ഘട്ടത്തിൽ 30 ശതമാനം തുക നൽകിയാൽ മതിയാകും. ബാക്കി 70 ശതമാനം ഫ്ലാറ്റ് കൈമാറുന്ന സമയത്ത് അടയ്ക്കാം.

വാണിജ്യ ടവറിന് പിന്നാലെ റെസിഡൻഷ്യൽ പദ്ധതി

കഴിഞ്ഞ വർഷം നവംബറിൽ ദുബായിലെ ഷെയ്ഖ് സായിദ് റോഡിൽ ‘ഷാരൂഖ്സ് ബൈ ഡാന്യൂബ്’ എന്ന പേരിൽ വാണിജ്യ ടവർ കമ്പനി ആരംഭിച്ചിരുന്നു. ഏകദേശം 3,500 കോടി രൂപ നിക്ഷേപത്തിൽ നിർമിച്ച ഈ പദ്ധതിക്ക് ഒരു ദശലക്ഷം ചതുരശ്ര അടി വിസ്തീർണമുണ്ട്. ഏകദേശം 5,000 കോടി രൂപയ്ക്കാണ് ടവർ വിറ്റുപോയതെന്നാണ് റിപ്പോർട്ട്.

2025ലെ ലോഞ്ച് ദിനത്തിൽ തന്നെ വാണിജ്യ ടവർ വിറ്റുതീർന്നതിന് പിന്നാലെയാണ് ഷാരൂഖ് ഖാന്റെ പേരിൽ പുതിയ റെസിഡൻഷ്യൽ പദ്ധതിയും കമ്പനി അവതരിപ്പിച്ചിരിക്കുന്നത്.

ദുബായിലെ റിയൽ എസ്റ്റേറ്റ് വിപണിയിൽ ഇന്ത്യൻ നിക്ഷേപകരുടെ താൽപ്പര്യം വർധിച്ചുവരുന്ന സാഹചര്യത്തിൽ പുതിയ പദ്ധതിയും ശ്രദ്ധ നേടുമെന്നാണ് ഡാന്യൂബ് പ്രോപ്പർട്ടീസിന്റെ പ്രതീക്ഷ.

Seraphinite AcceleratorOptimized by Seraphinite Accelerator
Turns on site high speed to be attractive for people and search engines.