ക്രിസ്മസ് പത്താംതരം പരീക്ഷാ ചോദ്യപേപ്പര് ചോര്ച്ച കേസില് മുഖ്യപ്രതി മുഹമ്മദ് ഷുഹൈബുമായി തെളിവെടുപ്പ് നടക്കുന്നതിനിടെ വീണ്ടും വാഗ്ദാനവുമായി എംഎസ് സൊല്യൂഷന്സ്. എസ്എസ്എല്സി സയന്സ് വിഷയങ്ങളില് ഉറപ്പുള്ള ചോദ്യങ്ങളും ഉത്തരങ്ങളും വാട്സ്അപ്പ് വഴി നല്കാമെന്നാണ് പരസ്യം. 199 രൂപക്ക് സയന്സ് വിഷയങ്ങളില് എ പ്ലസ് എന്ന തലക്കെട്ടോടെയാണ് പരസ്യം.
ചൊവാഴ്ച ഉച്ചയ്ക്ക് 12.45നാണ് എംഎസ് സൊല്യൂഷന്സ് എസ്എസ്എല്സി എന്ന വാട്സ്ആപ്പ് ഗ്രൂപ്പില് വാഗ്ദാനം പ്രതൃക്ഷപ്പെട്ടത്. താത്പര്യം ഉള്ളവര് പരസ്യത്തിലുള്ള നമ്പറുകളില് ബന്ധപ്പെടണം. ആ സമയത്താണ് പണം നല്കേണ്ട ക്യൂ ആര് കോഡും ഗൂഗിള് ഫോമും ലഭിക്കുക. പണം നല്കിയ സ്ക്രീന് ഷോട്ട് നല്കിയാല് ഉടന് ചോദ്യപേപ്പറും ഉത്തരവും പിഡിഎഫ് ആയി ലഭിക്കും. നമ്പറില് ബന്ധപ്പെട്ടപ്പോള് എ പ്ലസ് ഉറപ്പ് പറയാന് കഴിയില്ലെന്നും എ പ്ലസ് ലഭിക്കണേല് പഠിക്കണമെന്നും ആയിരുന്നു വിശദീകരണം.
പത്താംതരം പരീക്ഷാ ചോദ്യപേപ്പര് ചോര്ച്ച കേസില് മുഖ്യപ്രതിയും കമ്പനി സിഇഒയുമായ മുഹമ്മദ് ഷുഹൈബിനെ മൂന്ന് ദിവസത്തേക്കാണ് ക്രൈംബ്രാഞ്ചിൻ്റെ കസ്റ്റഡിയില് വിട്ടിരിക്കുന്നത്.
