ഹിന്ദി വാർത്താ ചാനലുകളുടെ പ്രക്ഷേപണത്തിൽ ഉറുദു വാക്കുകൾ അമിതമായി ഉപയോഗിച്ചതിന് ‘നോട്ടീസ്’ അയച്ചിട്ടുണ്ടെന്ന ഒരു വിഭാഗം മാധ്യമങ്ങളിലെ റിപ്പോർട്ടുകൾ തെറ്റിദ്ധരിപ്പിക്കുന്നത് ആണെന്ന് സർക്കാർ ഞായറാഴ്‌ച വിശേഷിപ്പിച്ചു.
കേബിൾ ടെലിവിഷൻ നെറ്റ്‌വർക്‌സ് റെഗുലേഷൻ ആക്ട് പ്രകാരം, ഒരു കാഴ്‌ചക്കാരൻ്റെ പരാതി ഇൻഫർമേഷൻ ആൻഡ് ബ്രോഡ് കാസ്റ്റിംഗ് മന്ത്രാലയം (MIB) ബന്ധപ്പെട്ട ചാനലുകൾക്ക് അയച്ചിട്ടുണ്ടെന്ന് X-ലെ ഒരു പോസ്റ്റിൽ PIB ഫാക്ട് ചെക്ക് യൂണിറ്റ് പറഞ്ഞു.
ആക്ട് അനുസരിച്ച്, പൊതുജനങ്ങളുടെ പരാതികളുടെ ഒരു നിശ്ചിത ശതമാനം, പരാതി ലഭിച്ച ബന്ധപ്പെട്ട വ്യക്തികൾക്ക് കൈമാറുന്നുവെന്ന് ഒരു ഉദ്യോഗസ്ഥൻ പറഞ്ഞു.
“ഇത് മന്ത്രാലയത്തിൽ നിന്നുള്ള നിർദ്ദേശമല്ല. മറിച്ച് ബന്ധപ്പെട്ട ചാനലുകൾക്ക് എതിരെ ലഭിച്ച പരാതിയുടെ കൈമാറ്റം മാത്രമാണ്,” -ഉദ്യോഗസ്ഥൻ പറഞ്ഞു.
“പരാതിക്കാരനെ സ്വീകരിച്ച നടപടിയെ കുറിച്ച് ചാനലുകൾക്ക് നിർദ്ദേശം നൽകിയിട്ടുണ്ട്. കൂടാതെ പ്രസക്തമായ ചട്ടങ്ങൾക്ക് അനുസൃതമായി മന്ത്രാലയത്തെ അറിയിക്കുകയും വേണം,” -പ്രസ് ഇൻഫർമേഷൻ ബ്യൂറോയുടെ (PIB) വസ്‌തുതാ പരിശോധനാ യൂണിറ്റ് പോസ്റ്റിൽ പറഞ്ഞു.
അമിതമായി ഉറുദു വാക്കുകൾ ഉപയോഗിച്ചതിന് ഹിന്ദി വാർത്താ ചാനലുകൾക്ക് വാർത്താ വിതരണ പ്രക്ഷേപണ മന്ത്രാലയം നോട്ടീസ് അയച്ചതായും ഭാഷാ വിദഗ്‌ദരെ നിയമിക്കാൻ നിർദ്ദേശിച്ചതായും ഒരു വിഭാഗം മാധ്യമങ്ങളിലെ റിപ്പോർട്ടുകൾ അവകാശപ്പെട്ടു.
