ഉത്തർപ്രദേശിലെ പ്രയാഗ്രാജിൽ നടന്ന മഹാ കുംഭമേളയ്ക്കിടെയുണ്ടായ തിക്കിലും തിരക്കിലും ആറ് ആഴ്ചകൾക്കുശേഷം , കേന്ദ്രം സ്വന്തമായി അന്വേഷണം നടത്തിയിട്ടില്ലെന്നും മരിച്ചവരുടെയും പരിക്കേറ്റവരുടെയും എണ്ണം സംബന്ധിച്ച വിവരങ്ങൾ തങ്ങളുടെ പക്കലില്ലെന്നും കേന്ദ്ര ആഭ്യന്തര മന്ത്രാലയം ലോക്സഭയെ അറിയിച്ചു.
തിക്കിലും തിരക്കിലും പെട്ട് അപകടമുണ്ടായതും കുടുംബങ്ങൾക്ക് സാമ്പത്തിക സഹായം നൽകുന്നതും സംസ്ഥാനത്തിന്റെ അധികാര പരിധിയിൽ പെട്ടതാണെന്ന്ആഭ്യന്തര സഹമന്ത്രി നിത്യാനന്ദ് റായ് പറഞ്ഞു. “ഇത്തരം സാഹചര്യങ്ങൾ കൈകാര്യം ചെയ്യാൻ സംസ്ഥാന സർക്കാരുകൾക്ക് കഴിവുണ്ട്. അത്തരം ഒരു ഡാറ്റയും കേന്ദ്രം സൂക്ഷിക്കുന്നില്ല,” കോൺഗ്രസിലെ കെ.സി. വേണുഗോപാലിന്റെയും കിർസൻ നാംദിയോയുടെയും ചോദ്യത്തിന് മറുപടിയായി അദ്ദേഹം പറഞ്ഞു.
അതേസമയം, മഹാ കുംഭമേളയ്ക്കിടെ സുരക്ഷാ ചുമതല വഹിച്ചിരുന്ന മുതിർന്ന യുപി പോലീസുകാരൻ വൈഭവ് കൃഷ്ണയുടെ അഭിപ്രായത്തിൽ, തിക്കിലും തിരക്കിലും പെട്ട് കുറഞ്ഞത് 30 പേർ മരിച്ചു . അറുപത് പേർക്ക് പരിക്കേറ്റു.
ജനുവരി 29-ന് നടന്ന തിക്കിലും തിരക്കിലും മരിച്ചവരുടെയും പരിക്കേറ്റവരുടെയും എണ്ണം സംബന്ധിച്ചും കാരണം അന്വേഷിക്കാൻ സ്വീകരിച്ച നടപടികളെക്കുറിച്ചും വേണുഗോപാലും നംദിയോയും കേന്ദ്രത്തിൽ സമ്മർദ്ദം ചെലുത്തിയിരുന്നു. ‘പൊതുക്രമം’, ‘പോലീസ്’ എന്നിവ സംസ്ഥാന സർക്കാർ നിയന്ത്രിക്കുന്ന വിഷയങ്ങളാണെന്നും, അത്തരം ദുരന്തങ്ങൾ തടയുന്നതിനുള്ള പ്രധാന ഘടകമായ ‘മതസഭകളുടെ സംഘാടനവും (ആൾക്കൂട്ടത്തെ നിയന്ത്രിക്കലും” ‘പൊതുക്രമവുമായി’ അടുത്ത ബന്ധമുള്ളതാണെന്നും ജൂനിയർ ആഭ്യന്തര മന്ത്രി ചൂണ്ടിക്കാട്ടി.
ആവശ്യാനുസരണം ദേശീയ ദുരന്ത നിവാരണ അതോറിറ്റി ജനക്കൂട്ടത്തെ നിയന്ത്രിക്കുന്നതിനെക്കുറിച്ചുള്ള വിശദമായ മാർഗ്ഗനിർദ്ദേശങ്ങൾ വിതരണം ചെയ്തിട്ടുണ്ടെന്നും ബ്യൂറോ ഓഫ് പോലീസ് റിസർച്ച് ആൻഡ് ഡെവലപ്മെന്റും ഇതേ നിർദ്ദേശം നൽകിയിട്ടുണ്ടെന്നും റായ് പറഞ്ഞു.
