ആഗോള കാർ വിപണിയിൽ നിലനിൽക്കാനായി ജപ്പാനീസ് കാർ ഭീമൻമാരായ ഹോണ്ടയും നിസാനും ലയനത്തിനൊരുങ്ങുന്നതായി റിപ്പോർട്ടുകൾ. ടെസ്ലയും ചൈനീസ് ഇലക്ട്രിക് കാറുകളും ഉയർത്തുന്ന ശക്തമായ വെല്ലുവിളി മറികടക്കുക ലക്ഷ്യമാക്കിയാണ് ഈ നീക്കം. നേരത്തെ ഇരുകമ്പനികളും പരസ്പരം സഹകരിക്കാനുളള ശ്രമം നടത്തിയിരുന്നുവെങ്കിലും ഇപ്പോൾ ലയനത്തിലേക്കാണ് ചർച്ചകൾ പുരോഗമിക്കുന്നതെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്.
ഇലക്ട്രിക് കാറുകളുടെ ഡിമാൻഡ് വർധിച്ചതോടെ പെട്രോൾ, ഡീസൽ കാറുകളുടെ വിപണി ഇടിഞ്ഞു. പ്രത്യേകിച്ച് ചൈനീസ് കമ്പനികളുടെ കുറഞ്ഞ വിലയേയും മികച്ച സാങ്കേതിക വിദ്യയേയും വിപണിയിലെ പ്രധാന പ്രശ്നമാക്കി ഉയർന്ന വരവാണ് ഈ മാറ്റത്തിന് പിന്നിൽ. ഇതോടെ, ഇലക്ട്രിക് കാർ നിർമാണത്തിൽ കൂടുതൽ ശ്രദ്ധ കേന്ദ്രീകരിക്കാൻ ഹോണ്ടയും നിസാനും തീരുമാനിച്ചു.
ഹോണ്ടയും നിസാനും ചേർന്ന് 54 ബില്യൺ ഡോളർ മുതൽമുടക്കോടെ 7.4 മില്യൺ കാറുകൾ നിർമ്മിക്കാനുള്ള പദ്ധതിയിലാണ്. ഇത് യാഥാർത്ഥ്യമായാൽ ലോകത്തിലെ മൂന്നാമത്തെ വലിയ കാർ നിർമ്മാതാക്കളായി സംയുക്ത സംരംഭം മാറും. ഒന്നാം സ്ഥാനത്തുള്ള ടൊയോട്ടയെയും രണ്ടാം സ്ഥാനത്തുള്ള വോക്സ് വാഗണിനെയും വെല്ലുവിളിക്കാനുള്ള സാധ്യതകൾ ഉണ്ട്.
ഇതുകൂടാതെ, മിസ്തുബിഷി മോട്ടോഴ്സുമായും നിസാൻ സഹകരിക്കാൻ ശ്രമിക്കുന്നുണ്ട്. മിസ്തുബിഷിയിലെ 24 ശതമാനം ഓഹരികളും നിസാനുടേതാണ്, ഇതുവഴി അവരുടെ സമ്മർദ്ദത്തിന് മിസ്തുബിഷി വഴങ്ങുമോ എന്നും ഇത് കാർ നിർമ്മാണ രംഗത്ത് നിർണായകമായ മാറ്റങ്ങൾക്ക് കാരണമാകുമോ എന്നും ശ്രദ്ധേയമാണ്.
ലയന വാർത്തകളുടെ പശ്ചാത്തലത്തിൽ നിസാന്റെ ഓഹരികൾ 24 ശതമാനവും മിസ്തുബിഷിയുടേത് 20 ശതമാനവും വർധിച്ചു. എന്നാൽ, ഹോണ്ടയുടെ ഓഹരിയിൽ മൂന്ന് ശതമാനം ഇടിവുണ്ടായി. വിപണിയിലെ നിരീക്ഷണങ്ങൾ അനുസരിച്ച്, ഹോണ്ടയുടെ വിപണി മൂല്യം നിസാനെ അപേക്ഷിച്ച് നാലിരട്ടി കൂടുതലാണ്. ഇതുകൊണ്ട്, ലയനം നിസാനെ വൻ പ്രതിസന്ധിയിൽ നിന്ന് രക്ഷിക്കുമെന്നാണ് വിലയിരുത്തൽ. നിസാൻ നേരത്തെ തന്നെ വൻ നഷ്ടത്തിലാണ്. ചൈനയിലും അമേരിക്കയിലും 85 ശതമാനം വിറ്റുവരവ് ഇടിഞ്ഞതോടെ 9,000 ജോലിക്കാരെ പിരിച്ചുവിടുകയും ചെയ്തു.
ചൈനീസ് ഇലക്ട്രിക് കാറുകളുടെ കുത്തകയ്ക്ക് മറുപടി നൽകാൻ സാധിക്കുമോ എന്നത് ലയന ചർച്ചകളുടെ പ്രധാന ചോദ്യമാണ്. നവംബറിലെ കണക്കുകൾ പ്രകാരം, ലോകത്തെ 70 ശതമാനം ഇലക്ട്രിക് കാറുകളുടെ വിറ്റുവരവും ചൈനീസ് കമ്പനികളുടെതാണ്. ബിവൈഡി (BYD) അടക്കമുള്ള കമ്പനികൾ വിപണിയിൽ ടെസ്ലയെയും മറികടന്നിട്ടുണ്ട്.
ലയന വാർത്തകൾ ഹോണ്ട, നിസാൻ, മിസ്തുബിഷി എന്നിവ തള്ളിയിട്ടുണ്ട്. പരസ്പര സഹകരണമാത്രമാണ് ലക്ഷ്യമെന്നു കമ്പനി വൃത്തങ്ങൾ വ്യക്തമാക്കുന്നു. എന്നാൽ, ഈ വാർത്ത ആദ്യം റിപ്പോർട്ട് ചെയ്ത ജപ്പാനീസ് പത്രമായ നിക്കെയ് തങ്ങളുടെ നിലപാടിൽ ഉറച്ചുനിൽക്കുകയാണ്. ലയന ചർച്ചകൾ സഫലമായാൽ, ഹോണ്ടയും നിസാനും ഇലക്ട്രിക് കാർ വിപണിയിൽ ശക്തമായ മുന്നേറ്റം നടത്തുമെന്നാണ് വിശകലനങ്ങൾ.
