ന്യൂഡൽഹി: ഡൽഹിയിൽ കോക്രോച്ച് ജനതാ പാർട്ടി (സിജെപി) നടത്താനിരുന്ന പ്രതിഷേധത്തിന് മുന്നോടിയായി ഏർപ്പെടുത്തിയ സുരക്ഷാ നിയന്ത്രണങ്ങളെക്കുറിച്ച് ഐക്യരാഷ്ട്രസഭയുടെ മനുഷ്യാവകാശ ഹൈക്കമ്മീഷണറുടെ ഓഫീസ് (ഒഎച്ച്സിഎച്ച്ആർ) ഉന്നയിച്ച ആശങ്കകൾ തള്ളി ഇന്ത്യ. യുഎന്നിന്റെ പരാമർശങ്ങൾ അനാവശ്യമാണെന്നും ഇന്ത്യയുടെ ആഭ്യന്തര കാര്യങ്ങളിലുള്ള അസ്വീകാര്യമായ ഇടപെടലാണെന്നും വിദേശകാര്യ മന്ത്രാലയം വ്യക്തമാക്കി.
ലോകത്തിലെ ഏറ്റവും വലിയ ജനാധിപത്യ രാജ്യമാണ് ഇന്ത്യയെന്നും സമാധാനപരമായി ഒത്തുചേരാനുള്ള അവകാശം ഭരണഘടന ഉറപ്പുനൽകുന്നുണ്ടെന്നും മന്ത്രാലയം പ്രസ്താവനയിൽ പറഞ്ഞു. ശക്തമായ സ്ഥാപനങ്ങൾ, സ്വതന്ത്ര നീതിന്യായ വ്യവസ്ഥ, സ്വതന്ത്ര മാധ്യമങ്ങൾ എന്നിവ ഈ അവകാശത്തിന്റെ സംരക്ഷണം ഉറപ്പാക്കുന്നുണ്ടെന്നും ഇന്ത്യ വിശദീകരിച്ചു.
പൊതു ക്രമവും സുരക്ഷയും നിലനിർത്തുന്നതിനുള്ള വ്യവസ്ഥകൾക്ക് വിധേയമായാണ് ഇന്ത്യൻ പൗരന്മാർ ഈ അവകാശം വിനിയോഗിക്കുന്നതെന്നും നിയമപാലകർ നിയമാനുസൃതമായാണ് പ്രവർത്തിക്കുന്നതെന്നും വിദേശകാര്യ മന്ത്രാലയം കൂട്ടിച്ചേർത്തു. പരാതികൾ പരിഹരിക്കുന്നതിന് രാജ്യത്തെ കോടതികളെ സമീപിക്കാനുള്ള അവസരം എല്ലാവർക്കുമുണ്ടെന്നും മന്ത്രാലയം വ്യക്തമാക്കി.
യുഎൻ ആശങ്ക പ്രകടിപ്പിച്ചതിന് പിന്നാലെ ഇന്ത്യ
ഡൽഹിയിൽ നടന്ന വൻ പ്രതിഷേധങ്ങൾക്ക് മുന്നോടിയായും ശേഷവും പ്രതിഷേധക്കാരെയും സംഘാടകരെയും സിവിൽ സമൂഹ പ്രതിനിധികളെയും നിയമവിദഗ്ധരെയും മാധ്യമപ്രവർത്തകരെയും കൂട്ടത്തോടെ കസ്റ്റഡിയിലെടുത്തെന്ന റിപ്പോർട്ടുകളിൽ യുഎൻ മനുഷ്യാവകാശ ഹൈക്കമ്മീഷണറുടെ ഓഫീസ് ആശങ്ക പ്രകടിപ്പിച്ചിരുന്നു. ഇതിന് പിന്നാലെയാണ് ഇന്ത്യയുടെ പ്രതികരണം.
സമാധാനപരമായി ഒത്തുചേരാനുള്ള അവകാശം പൂർണമായി മാനിക്കപ്പെടുകയും സംരക്ഷിക്കപ്പെടുകയും ചെയ്യുന്നുവെന്ന് ഉറപ്പാക്കണമെന്ന് യുഎൻ മനുഷ്യാവകാശ മേധാവി അധികാരികളോട് ആവശ്യപ്പെട്ടിരുന്നു.
സമാധാനപരമായ പ്രതിഷേധങ്ങൾക്ക് ഏർപ്പെടുത്തുന്ന നിയന്ത്രണങ്ങൾ ആവശ്യകതയുടെയും ആനുപാതികതയുടെയും കർശനമായ മാനദണ്ഡങ്ങൾ പാലിക്കണമെന്നും യുഎൻ വ്യക്തമാക്കി.
‘ഇരട്ടത്താപ്പ് വിശ്വാസ്യത ഇല്ലാതാക്കും’
മനുഷ്യാവകാശ വിഷയങ്ങളിൽ തിരഞ്ഞെടുത്ത സമീപനം സ്വീകരിക്കുന്നുവെന്ന് ആരോപിച്ച് യുഎൻ മനുഷ്യാവകാശ ഹൈക്കമ്മീഷണറുടെ ഓഫീസിനെ ഇന്ത്യ വിമർശിച്ചു. അയൽരാജ്യങ്ങളിലെ പ്രതിഷേധങ്ങൾക്കെതിരായ നടപടികളിലും അക്രമാസക്തമായ അടിച്ചമർത്തലുകളിലും സമാനമായ പ്രതികരണം ഉണ്ടായിട്ടില്ലെന്നാണ് ഇന്ത്യയുടെ വിമർശനം.
ഇത്തരം ഇരട്ടത്താപ്പ് സംഘടനയുടെ നിലപാടുകളുടെ വിശ്വാസ്യത ഇല്ലാതാക്കുമെന്നും ബഹുരാഷ്ട്ര സംവിധാനങ്ങളിലുള്ള വിശ്വാസത്തെ ദുർബലപ്പെടുത്തുമെന്നും വിദേശകാര്യ മന്ത്രാലയം അഭിപ്രായപ്പെട്ടു.
ഗ്യാനേഷ് കുമാറിന്റെ രാജി പ്രതിഷേധം
വോട്ടർപട്ടികയിലെ പ്രത്യേക തീവ്ര പരിഷ്കരണമായ എസ്‌ഐആറുമായി ബന്ധപ്പെട്ട് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടായിരുന്നു സിജെപി ഡൽഹിയിൽ പ്രതിഷേധം നടത്താൻ തീരുമാനിച്ചിരുന്നത്.
പ്രതിഷേധത്തിന് മുന്നോടിയായി തലസ്ഥാനത്ത് വൻതോതിൽ പൊലീസിനെയും സുരക്ഷാസേനയെയും വിന്യസിക്കുകയും വിവിധ നിയന്ത്രണങ്ങൾ ഏർപ്പെടുത്തുകയും ചെയ്തിരുന്നു. ഇതിനിടെ നിരവധി രാഷ്ട്രീയ നേതാക്കളെയും പ്രതിഷേധക്കാരെയും കസ്റ്റഡിയിലെടുത്തതായും റിപ്പോർട്ടുകളുണ്ട്.
പ്രതിഷേധിക്കാനുള്ള അവകാശവും പൊതുക്രമം നിലനിർത്താനുള്ള ഭരണകൂടത്തിന്റെ ഉത്തരവാദിത്വവും സംബന്ധിച്ച ചർച്ചകൾക്കിടയിലാണ് ഇന്ത്യയും യുഎൻ മനുഷ്യാവകാശ ഹൈക്കമ്മീഷണറുടെ ഓഫീസും തമ്മിലുള്ള അഭിപ്രായവ്യത്യാസം വീണ്ടും ശ്രദ്ധാകേന്ദ്രമാകുന്നത്.
