അന്താരാഷ്ട്ര പ്രതിരോധ ഗവേഷണ സ്ഥാപനമായ ‘സ്റ്റോക്ക്ഹോം ഇന്റർനാഷണൽ പീസ് റിസർച്ച് ഇൻസ്റ്റിറ്റ്യൂട്ട്’ (SIPRI) പുറത്തുവിട്ട ഏറ്റവും പുതിയ റിപ്പോർട്ട് പ്രകാരം ഇന്ത്യയുടെ ആണവായുധ ശേഖരത്തിൽ ഗണ്യമായ വർധനവ് രേഖപ്പെടുത്തി. 2025-ൽ 180 ആയിരുന്ന ഇന്ത്യയുടെ ആണവ പോർമുനകളുടെ എണ്ണം 2026-ൽ 190 ആയി ഉയർന്നു. ഒരു വർഷത്തിനിടെ പത്ത് ആണവ പോർമുനകളാണ് ഇന്ത്യ പുതുതായി ആയുധശേഖരത്തിലേക്ക് കൂട്ടിച്ചേർത്തത്. അതേസമയം, അയൽരാജ്യമായ പാകിസ്താന്റെ ആണവായുധ ശേഷിയിൽ മാറ്റമൊന്നുമില്ലാതെ 170 ആയി തന്നെ തുടരുന്നതായും ‘സിപ്രി ഇയർബുക്ക് 2026’ വ്യക്തമാക്കുന്നു.
ആണവായുധ വിന്യാസ സംവിധാനങ്ങൾ നിരന്തരം ആധുനികീകരിക്കുന്നതിലാണ് ഇന്ത്യ ഇപ്പോൾ കൂടുതൽ ശ്രദ്ധ കേന്ദ്രീകരിക്കുന്നത്. പാകിസ്താനുമായുള്ള തർക്കങ്ങൾ നിലനിൽക്കെ തന്നെ, ചൈനയിലെ ഏത് ലക്ഷ്യസ്ഥാനങ്ങളിലേക്കും എത്തിച്ചേരാൻ ശേഷിയുള്ള ദീർഘദൂര ആയുധങ്ങൾ വികസിപ്പിക്കുന്നതിനാണ് ഇന്ത്യ മുൻഗണന നൽകുന്നത്. ഒരൊറ്റ മിസൈലിൽ ഒന്നിലധികം ആണവായുധങ്ങൾ വഹിക്കാൻ ശേഷിയുള്ള അത്യാധുനിക MIRV സാങ്കേതികവിദ്യയിലേക്കും ഇന്ത്യ മുന്നേറിക്കൊണ്ടിരിക്കുകയാണ്. യുദ്ധമല്ലാത്ത സമയത്ത് പോലും മിസൈലുകളിൽ ഘടിപ്പിച്ച ആണവായുധങ്ങൾ വിന്യസിക്കാൻ ഇന്ത്യയ്ക്കും ചൈനയ്ക്കും ഇപ്പോൾ കഴിഞ്ഞേക്കുമെന്നും റിപ്പോർട്ട് വിലയിരുത്തുന്നു.
ആഗോളതലത്തിൽ ആണവായുധങ്ങളുടെ കാര്യത്തിൽ ചൈന മൂന്നാം സ്ഥാനത്ത് തുടരുകയാണ്. ചൈന തങ്ങളുടെ ആണവായുധ ശേഖരം 600-ൽ നിന്ന് 620 ആയി ഉയർത്തിയിട്ടുണ്ട്. 2030-ഓടെ ചൈനയുടെ ശേഖരം ആയിരം കടക്കുമെന്നാണ് പ്രവചനം. ലോകത്താകമാനം ഒമ്പത് രാജ്യങ്ങളിലായി നിലവിൽ 12,187 ആണവായുധങ്ങളാണുള്ളത്. ഇതിൽ പകുതിയിലധികവും റഷ്യയുടെയും (5,420) അമേരിക്കയുടെയും (5,042) കൈവശമാണ്. ബ്രിട്ടൻ (225), ഫ്രാൻസ് (290) എന്നീ രാജ്യങ്ങളും തങ്ങളുടെ ആണവ ശേഖരം നിലനിർത്തുന്നു.
ആഗോള സുരക്ഷാ ഭീഷണികൾ വർദ്ധിച്ചുവരുന്നത് വലിയ ആശങ്കയുണ്ടാക്കുന്നതായി സിപ്രി റിപ്പോർട്ട് മുന്നറിയിപ്പ് നൽകുന്നു. ആകെ ആണവായുധങ്ങളുടെ എണ്ണത്തിൽ ലോകവ്യാപകമായി നേരിയ കുറവുണ്ടായെങ്കിലും, പ്രമുഖ രാജ്യങ്ങളെല്ലാം തങ്ങളുടെ പ്രതിരോധത്തിനായി ആണവായുധങ്ങളെ കൂടുതൽ ആശ്രയിക്കുന്ന പ്രവണതയാണ് കാണപ്പെടുന്നത്. പല രാജ്യങ്ങളും ആണവായുധങ്ങൾ കുറയ്ക്കുന്നതിനുള്ള അന്താരാഷ്ട്ര കരാറുകളിൽ നിന്നും വാഗ്ദാനങ്ങളിൽ നിന്നും പിന്നോട്ട് പോകുന്നതായും റിപ്പോർട്ട് ചൂണ്ടിക്കാട്ടുന്നു. വരും ദശകങ്ങളിൽ പാകിസ്താനും തങ്ങളുടെ ആണവായുധ ശേഖരം വർദ്ധിപ്പിച്ചേക്കുമെന്ന സൂചനയും സിപ്രി നൽകുന്നുണ്ട്.
