ഇന്ത്യയുടെ കൽക്കരി ഉത്പാദനം ഒരു ബില്യൺ ടൺ കവിഞ്ഞു; 42,315.7 കോടി രൂപ ലാഭിച്ചു

2024-25 സാമ്പത്തിക വർഷത്തിൽ ഇന്ത്യ ഒരു ബില്യൺ ടൺ കൽക്കരി ഉൽപാദനം മറികടന്ന് ഒരു ചരിത്ര നേട്ടം കൈവരിച്ചു. പ്രധാനമന്ത്രി നരേന്ദ്ര മോദി ഇതിനെ രാജ്യത്തിന് അഭിമാന നിമിഷമെന്ന് വിശേഷിപ്പിച്ചു. ഊർജ്ജ സുരക്ഷയ്ക്കും സ്വാശ്രയത്വത്തിനുമുള്ള ഇന്ത്യയുടെ പ്രതിബദ്ധതയാണ് ഈ നേട്ടം പ്രതിഫലിപ്പിക്കുന്നതെന്ന് പറഞ്ഞു.

കൽക്കരിയുടെ ചരിത്ര റെക്കോർഡ്

2025 മാർച്ച് 20ന് ഇന്ത്യയുടെ കൽക്കരി ഉൽപ്പാദനം ഒരു ബില്യൺ ടൺ കവിഞ്ഞു. മുൻ സാമ്പത്തിക വർഷം 2023-24ൽ ഇത് 997.83 ദശലക്ഷം ടൺ ആയിരുന്നു. കൽക്കരി മേഖലയിലെ പൊതു- സ്വകാര്യ കമ്പനികളുടെയും 350-ലധികം കൽക്കരി ഖനികളുടെയും ഏകദേശം അഞ്ചു ലക്ഷത്തോളം ഖനി തൊഴിലാളികളുടെയും കൂട്ടായ പരിശ്രമത്തിൻ്റെ ഫലമാണ് ഈ റെക്കോർഡ് പ്രകടനം.

ഇന്ത്യയുടെ ഊർജ്ജ ആവശ്യങ്ങളിൽ ഏകദേശം 55% കൽക്കരിയെ ആശ്രയിച്ചിരിക്കുന്നു. കൂടാതെ രാജ്യത്തെ വൈദ്യുതിയുടെ 74% കൽക്കരി അധിഷ്ഠിത വൈദ്യുത നിലയങ്ങളിൽ നിന്നാണ് ഉത്പാദിപ്പിക്കുന്നത്. ഈ നേട്ടത്തോടെ, ഇന്ത്യയുടെ കൽക്കരി ഇറക്കുമതിയും കുറഞ്ഞു. 2024 ഏപ്രിൽ മുതൽ ഡിസംബർ വരെ കൽക്കരി ഇറക്കുമതി 8.4% കുറഞ്ഞു. ഇത് 5.43 ബില്യൺ ഡോളർ (42,315.7 കോടി രൂപ) വിലമതിക്കുന്ന വിദേശനാണ്യം ലാഭിച്ചു.

പ്രധാനമന്ത്രിയുടെ അഭിനന്ദനങ്ങൾ

“ഈ സാമ്പത്തിക വർഷത്തിൽ ഒരു ബില്യൺ ടൺ കൽക്കരി ഉൽപ്പാദനം ഇന്ത്യക്ക് അഭിമാനകരമായ നിമിഷമാണ്. ഈ ചരിത്രപരമായ കണക്ക് മറികടക്കുന്നത് ഊർജ്ജ സുരക്ഷ, സാമ്പത്തിക വളർച്ച, സ്വാശ്രയത്വം എന്നിവയോടുള്ള നമ്മുടെ പ്രതിബദ്ധതയെ പ്രതിഫലിപ്പിക്കുന്നു. ഈ നേട്ടം ഈ മേഖലയുമായി ബന്ധപ്പെട്ട എല്ലാവരുടെയും കഠിനാധ്വാനത്തിനും സമർപ്പണത്തിനും സാക്ഷ്യം വഹിക്കുന്നു,” -എന്ന് എക്‌സിൽ പ്രധാനമന്ത്രി നരേന്ദ്ര മോദി പോസ്റ്റ് ചെയ്‌തു.

പ്രധാനമന്ത്രിയുടെ അഭിനന്ദനത്തോടൊപ്പം കേന്ദ്ര കൽക്കരി, ഖനി മന്ത്രി ജി കിഷൻ റെഡ്ഡിയും ഈ നേട്ടം പ്രഖ്യാപിച്ചു. ഇന്ത്യയുടെ വർദ്ധിച്ചു വരുന്ന വൈദ്യുതി ആവശ്യകത നിറവേറ്റുന്നതിനും സാമ്പത്തിക വളർച്ച ത്വരിതപ്പെടുത്തുന്നതിനും ഓരോ പൗരനും ശോഭനമായ ഭാവി ഉറപ്പാക്കുന്നതിനും ഈ നാഴികക്കല്ല് സഹായിക്കുമെന്ന് അദ്ദേഹം പറഞ്ഞു.

ഭാവി പദ്ധതികൾ

കൽക്കരി ഉൽപ്പാദനം വർധിപ്പിക്കുന്നതിനും സ്വയംപര്യാപ്‌തത ഉറപ്പാക്കുന്നതിനുമായി ഇന്ത്യാ ഗവൺമെന്റ് തുടർച്ചയായ ശ്രമങ്ങൾ നടത്തിവരികയാണ്. 2024-25 സാമ്പത്തിക വർഷത്തേക്കുള്ള കൽക്കരി മന്ത്രാലയത്തിൻ്റെ കർമ്മ പദ്ധതി പ്രകാരം ഈ വർഷത്തെ മൊത്തം ഉൽപ്പാദന/ ഉൽപ്പാദന ലക്ഷ്യം 108 കോടി ടണ്ണായി നിശ്ചയിച്ചിട്ടുണ്ട്.

ഈ ചരിത്ര നേട്ടത്തോടെ, ഇന്ത്യ ഊർജ്ജ സുരക്ഷ കൂടുതൽ ശക്തിപ്പെടുത്തുകയും ഇറക്കുമതിയെ ആശ്രയിക്കുന്നത് കുറക്കുന്നതിലേക്ക് ഒരു സുപ്രധാന ചുവടുവയ്പ്പ് നടത്തുകയും ചെയ്‌തു. കൽക്കരി ഉൽപാദന മേഖലയിലെ ഇന്ത്യയുടെ സാധ്യതകളെ ഇത് പ്രതിഫലിപ്പിക്കുകയും വരും വർഷങ്ങളിൽ രാജ്യത്തിൻ്റെ ഊർജ്ജ സ്വയംപര്യാപ്‌തതയെ പുതിയ ഉയരങ്ങളിൽ എത്തിക്കുന്നതിനുള്ള സാധ്യതയെ ശക്തിപ്പെടുത്തുകയും ചെയ്യുന്നു.