‘ലോകമെമ്പാടും യുദ്ധങ്ങൾ തടയുന്നതിൽ ഇന്ത്യയുടെ പങ്ക്’: ഇറ്റാലിയൻ പ്രധാനമന്ത്രി മെലോണി

ലോകമെമ്പാടും നടക്കുന്ന യുദ്ധങ്ങളും സംഘർഷങ്ങളും പരിഹരിക്കുന്നതിൽ ഇന്ത്യക്ക് ഒരു പ്രധാന പങ്ക് വഹിക്കാൻ കഴിയുമെന്ന് ഇറ്റാലിയൻ പ്രധാനമന്ത്രി ജോർജിയ മെലോണി പ്രസ്‌താവിച്ചു. “ഇക്കാര്യത്തിൽ ഇന്ത്യക്ക് വളരെ പ്രധാനപ്പെട്ട പങ്ക് വഹിക്കാൻ കഴിയുമെന്ന് ഞാൻ വിശ്വസിക്കുന്നു” -എന്ന് അവർ വ്യക്തമായി പറഞ്ഞു.

ന്യൂയോർക്കിൽ ഐക്യരാഷ്ട്ര സഭയുടെ പൊതുസഭയിലെ ഈ പ്രസ്‌താവന ഇന്ത്യയുടെ വർദ്ധിച്ചു വരുന്ന ആഗോള സാന്നിധ്യത്തെയും സമാധാനപരമായ പരിഹാരങ്ങളോടുള്ള പ്രതിബദ്ധതയെയും പ്രതിഫലിപ്പിക്കുന്നു.

പ്രധാനമന്ത്രി നരേന്ദ്ര മോദിയും മെലോണിയും തമ്മിൽ അടുത്തിടെ നടത്തിയ ഒരു ടെലിഫോൺ സംഭാഷണം ഈ ദിശയിലേക്ക് കൂടുതൽ വ്യക്തത കൊണ്ടുവന്നു. സംഭാഷണത്തിനിടെ, ആഗോള, പ്രാദേശിക വിഷയങ്ങളെ കുറിച്ച് ഇരുനേതാക്കളും ആഴത്തിലുള്ള ചർച്ചകൾ നടത്തി.

ഉക്രയിനിൽ നടന്നു കൊണ്ടിരിക്കുന്ന സംഘർഷത്തിന് സമാധാനപരവും വേഗത്തിലുള്ളതുമായ പരിഹാരം കണ്ടെത്തേണ്ടതിൻ്റെ ആവശ്യകതയിൽ ഊന്നൽ നൽകി. ഇന്ത്യയുടെ നയതന്ത്ര പ്രതിബദ്ധതയെ പ്രതിഫലിപ്പിക്കുന്ന തരത്തിൽ, ഇക്കാര്യത്തിൽ ഇന്ത്യയുടെ പൂർണ പിന്തുണ പ്രധാനമന്ത്രി മോദി ഉറപ്പ് നൽകി.

ഇന്ത്യ- ഇറ്റലി തന്ത്രപരമായ പങ്കാളിത്തം

ഇന്ത്യയും ഇറ്റലിയും തമ്മിലുള്ള തന്ത്രപരമായ പങ്കാളിത്തം കൂടുതൽ ശക്തിപ്പെടുത്താനുള്ള ദൃഢനിശ്ചയം ഇരുനേതാക്കളും സംഭാഷണത്തിൽ ആവർത്തിച്ചു. നിക്ഷേപം, പ്രതിരോധം, സുരക്ഷ, ബഹിരാകാശം, ശാസ്ത്രം, വിദ്യാഭ്യാസം, ജനങ്ങൾ തമ്മിലുള്ള ബന്ധം, ഭീകരതക്കെതിരായ സംയുക്ത പോരാട്ടം എന്നിവയുൾപ്പെടെ വിവിധ മേഖലകൾ ഈ പങ്കാളിത്തത്തിൽ ഉൾപ്പെടുന്നു.

2025- 29 വർഷത്തേക്ക് ഒരു സംയുക്ത തന്ത്രപരമായ പ്രവർത്തന പദ്ധതി നടപ്പിലാക്കാൻ ഇരുരാജ്യങ്ങളും പ്രതിജ്ഞയെടുത്തു. ഇത് ഈ പങ്കാളിത്തത്തെ കൂടുതൽ ആഴത്തിലാക്കും.

ഇന്ത്യയും യൂറോപ്യൻ യൂണിയനും (EU) തമ്മിലുള്ള ഒരു സ്വതന്ത്ര വ്യാപാര കരാർ (FTA) എത്രയും വേഗം അന്തിമമാക്കുന്നതിന് ഇറ്റലിയുടെ പിന്തുണ മെലോണി ആവർത്തിച്ചു. ഈ കരാർ ഇരുവശത്തുമുള്ള ബിസിനസുകൾക്കും ഉപഭോക്താക്കൾക്കും ഗുണം ചെയ്യും. ഇത് സാമ്പത്തിക സഹകരണത്തിന് പുതിയ പ്രചോദനം നൽകും.

മോദിക്ക് ജന്മദിനാശംസകൾ നേർന്ന് മെലോനി

സെപ്റ്റംബർ 17ന് പ്രധാനമന്ത്രി നരേന്ദ്ര മോദിയുടെ 75-ാം ജന്മദിനത്തിൽ മെലോണി ഹൃദയംഗമമായ ആശംസകൾ നേർന്നു. ഈ സന്ദേശം ഇരുരാജ്യങ്ങളും തമ്മിലുള്ള ആഴത്തിലുള്ള പരസ്‌പര ബഹുമാനത്തെയും സൗഹൃദത്തെയും പ്രതീകപ്പെടുത്തുന്നു.

“ഇന്ത്യൻ പ്രധാനമന്ത്രി നരേന്ദ്ര മോദിക്ക് 75-ാം ജന്മദിനാശംസകൾ. അദ്ദേഹത്തിൻ്റെ ശക്തി, ദൃഢനിശ്ചയം, ദശലക്ഷക്കണക്കിന് ആളുകളെ നയിക്കാനുള്ള കഴിവ് എന്നിവ പ്രചോദനാത്മകമാണ്. സൗഹൃദത്തോടും ബഹുമാനത്തോടും കൂടി, അദ്ദേഹം ഇന്ത്യയെ ശോഭനമായ ഭാവിയിലേക്ക് നയിക്കുകയും നമ്മുടെ രാജ്യങ്ങൾ തമ്മിലുള്ള ബന്ധം കൂടുതൽ ശക്തിപ്പെടുത്തുകയും ചെയ്യുമ്പോൾ അദ്ദേഹത്തിന് നല്ല ആരോഗ്യവും ഊർജ്ജവും നേരുന്നു,” -അവർ എക്‌സിൽ എഴുതി.