മേഖലയിൽ സൈനിക സംഘർഷ സാധ്യതകൾ വർദ്ധിച്ചു വരുന്ന സാഹചര്യത്തിൽ, തങ്ങളുടെ ആണവ പദ്ധതിയുമായി ബന്ധപ്പെട്ട തർക്കങ്ങളിൽ വിട്ടുവീഴ്ചയ്ക്ക് തയ്യാറാണെന്ന് ഇറാൻ അമേരിക്കയെ അറിയിച്ചു. എന്നാൽ, ചർച്ചകൾ ആരംഭിക്കണമെങ്കിൽ ഇറാനുമേൽ ഏർപ്പെടുത്തിയിട്ടുള്ള സാമ്പത്തിക ഉപരോധങ്ങൾ പിൻവലിക്കാൻ യുഎസ് തയ്യാറാകണമെന്ന നിബന്ധനയാണ് ഇറാൻ മുന്നോട്ടുവെക്കുന്നത്. ബിബിസിക്ക് നൽകിയ അഭിമുഖത്തിൽ ഇറാന്റെ ഉപവിദേശകാര്യ മന്ത്രി മജീദ് തക്ത് റവഞ്ചിയാണ് ഇക്കാര്യം വ്യക്തമാക്കിയത്.
ആണവ കരാറിൽ എത്തുന്നതിന് അമേരിക്കയുടെ ഭാഗത്തുനിന്നുള്ള ആത്മാർത്ഥമായ നീക്കമാണ് ഇനി വേണ്ടതെന്ന് ഇറാൻ വ്യക്തമാക്കി. ഇതിന്റെ ഭാഗമായി 60 ശതമാനം വരെ സമ്പുഷ്ടീകരിച്ച യുറേനിയം ശേഖരം കുറയ്ക്കാൻ തയ്യാറാണെന്നും, ഇത് വിട്ടുവീഴ്ചയ്ക്കുള്ള തങ്ങളുടെ സന്നദ്ധതയുടെ തെളിവാണെന്നും റവഞ്ചി പറഞ്ഞു. ആയുധ നിർമ്മാണത്തിന് ഉപയോഗിക്കാവുന്ന നിലവാരത്തിലേക്ക് യുറേനിയം സമ്പുഷ്ടീകരിക്കുന്നത് അന്താരാഷ്ട്ര തലത്തിൽ വലിയ ആശങ്കയുണ്ടാക്കിയ പശ്ചാത്തലത്തിലാണ് ഇറാൻ ഈ വാഗ്ദാനം മുന്നോട്ട് വെച്ചിരിക്കുന്നത്.
ചർച്ചകൾക്ക് സന്നദ്ധത പ്രകടിപ്പിക്കുമ്പോഴും ചില നിർണ്ണായക കാര്യങ്ങളിൽ വിട്ടുവീഴ്ചയില്ലെന്ന് ഇറാൻ കർശനമായി പ്രഖ്യാപിച്ചിട്ടുണ്ട്.
യുറേനിയം സമ്പുഷ്ടീകരണം പൂർണ്ണമായും നിർത്തലാക്കണമെന്ന അമേരിക്കയുടെ ആവശ്യം അംഗീകരിക്കാനാവില്ലെന്നും, സമാധാനപരമായ ആവശ്യങ്ങൾക്കായി യുറേനിയം സമ്പുഷ്ടീകരിക്കുന്നത് തങ്ങളുടെ അവകാശമാണെന്നും ഇറാൻ വാദിക്കുന്നു. കൂടാതെ, രാജ്യത്തിന്റെ പ്രതിരോധ ശേഷിയെ ബാധിക്കുന്ന രീതിയിൽ മിസൈൽ പദ്ധതികൾ ചർച്ചാവിഷയമാക്കില്ലെന്നും മന്ത്രി ആവർത്തിച്ചു.
ഫെബ്രുവരി ആദ്യം ഒമാനിൽ നടന്ന പരോക്ഷ ചർച്ചകൾക്ക് ശേഷം, ചർച്ചകളുടെ രണ്ടാം ഘട്ടം വരും ദിവസങ്ങളിൽ ജനീവയിൽ വെച്ച് നടക്കും. ചർച്ചകൾ പരാജയപ്പെട്ടാൽ സൈനിക നീക്കം നടത്തുമെന്ന് ഡൊണാൾഡ് ട്രംപ് നേരത്തെ മുന്നറിയിപ്പ് നൽകിയിരുന്നു. എന്നാൽ, സമാധാനപരമായ പരിഹാരത്തിനാണ് അമേരിക്കയും താല്പര്യപ്പെടുന്നതെന്ന് ഒമാൻ വഴി ലഭിച്ച സ്വകാര്യ സന്ദേശങ്ങൾ സൂചിപ്പിക്കുന്നതായി ഇറാൻ വക്താവ് വെളിപ്പെടുത്തി.
പ്രതീക്ഷയോടെയാണ് ജനീവ ചർച്ചകളെ സമീപിക്കുന്നതെങ്കിലും, യുദ്ധമുണ്ടായാൽ അത് മേഖലയിൽ ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് ഇറാൻ മുന്നറിയിപ്പ് നൽകി. യുദ്ധം എല്ലാവർക്കും ദോഷകരമാകുമെന്നും മേഖലയിലുള്ള അമേരിക്കൻ സൈനിക താവളങ്ങൾ തങ്ങളുടെ ലക്ഷ്യമാകുമെന്നും ഇറാൻ വ്യക്തമാക്കിയിട്ടുണ്ട്. വരാനിരിക്കുന്ന ചർച്ചകൾ പശ്ചിമേഷ്യയിലെ സമാധാന അന്തരീക്ഷം പുനഃസ്ഥാപിക്കുമോ എന്ന് ലോകം ഉറ്റുനോക്കുകയാണ്.