പശ്ചിമേഷ്യയിലെ സൈനിക സമവാക്യങ്ങളിൽ പുതിയ ചർച്ചകൾക്ക് വഴിവെച്ച് ഇറാന്റെ ആക്രമണ ഡ്രോൺ അരാഷ്-3. ഇരട്ടിയാക്കിയ വാർഹെഡ് ശേഷി, ആർട്ടിഫിഷ്യൽ ഇന്റലിജൻസ് അധിഷ്ഠിത സംവിധാനങ്ങൾ, ജിപിഎസിനെ ആശ്രയിക്കാത്ത നാവിഗേഷൻ സാങ്കേതികവിദ്യ എന്നിവയാണ് പുതിയ ഡ്രോണിന്റെ പ്രധാന സവിശേഷതകളായി റിപ്പോർട്ടുകൾ ചൂണ്ടിക്കാട്ടുന്നത്.
ഒക്ടോബർ 22ന് ഇറാൻ സൈന്യം പുറത്തുവിട്ട ദൃശ്യങ്ങളിലാണ് അരാഷ്-3യെക്കുറിച്ചുള്ള വിവരങ്ങൾ പുറത്തുവന്നത്. ഇറാൻ കരസേനാ മേധാവി മേജർ ജനറൽ അമീർ ഹതാമി ഭൂഗർഭ ഡ്രോൺ നിർമാണ കേന്ദ്രം സന്ദർശിക്കുന്നതും നിരവധി ആക്രമണ ഡ്രോണുകൾ പരിശോധിക്കുന്നതും ദൃശ്യങ്ങളിലുണ്ട്. മുൻ പതിപ്പിലെ 50 കിലോഗ്രാം വാർഹെഡ് ശേഷി പുതിയ പതിപ്പിൽ 100 കിലോഗ്രാമായി ഉയർത്തിയെന്നാണ് ഇറാന്റെ അവകാശവാദം. ഇതിലൂടെ ആക്രമണശേഷി ഗണ്യമായി വർധിക്കുമെന്നും റിപ്പോർട്ടുകളുണ്ട്.
ഡ്രോണിന്റെ രൂപകൽപ്പനയിലും എൻജിൻ സാങ്കേതികവിദ്യയിലും മാറ്റങ്ങൾ വരുത്തിയതായാണ് സൂചന. പിസ്റ്റൺ എൻജിനുകൾക്ക് പുറമെ ജെറ്റ് എൻജിൻ ഉപയോഗിക്കുന്ന പതിപ്പിനെക്കുറിച്ചും റിപ്പോർട്ടുകളുണ്ട്. എന്നാൽ എൻജിന്റെ കൃത്യമായ സവിശേഷതകൾ, വേഗത, പ്രവർത്തനദൂരം എന്നിവ സംബന്ധിച്ച ഔദ്യോഗിക വിവരങ്ങൾ ലഭ്യമായിട്ടില്ല.
ഇലക്ട്രോണിക് ജാമിങ് മൂലമുള്ള തടസ്സങ്ങൾ മറികടക്കാൻ സഹായിക്കുന്ന നാവിഗേഷൻ സംവിധാനങ്ങളും എഐ അധിഷ്ഠിത ലക്ഷ്യനിർണയ സാങ്കേതികവിദ്യയും ഉൾപ്പെടുത്തിയിട്ടുണ്ടെന്നാണ് ഇറാന്റെ അവകാശവാദം. അതേസമയം, ഈ സംവിധാനങ്ങളുടെ യഥാർഥ പ്രവർത്തനക്ഷമതയും ഡ്രോണിന്റെ യുദ്ധഭൂമിയിലെ പ്രകടനവും സ്വതന്ത്രമായി സ്ഥിരീകരിക്കപ്പെട്ടിട്ടില്ല.
ആഭ്യന്തര ആയുധനിർമാണ ശേഷി വർധിപ്പിക്കാനും ദീർഘകാല സംഘർഷങ്ങളിൽ ഡ്രോണുകളുടെ ഉപയോഗം വിപുലീകരിക്കാനുമുള്ള ഇറാന്റെ നീക്കത്തിന്റെ ഭാഗമായാണ് അരാഷ്-3യുടെ അവതരണത്തെ വിലയിരുത്തുന്നത്. എന്നാൽ പുതിയ സാങ്കേതികവിദ്യകൾ മാത്രം അടിസ്ഥാനമാക്കി ഡ്രോണിന് ആധുനിക വ്യോമപ്രതിരോധ സംവിധാനങ്ങളെ മറികടക്കാനാകുമെന്ന് ഉറപ്പിക്കാനാവില്ലെന്നാണ് വിദഗ്ധരുടെ വിലയിരുത്തൽ.
