ഇറാനിലെ നതാൻസ് യുറേനിയം സമ്പുഷ്ടീകരണ പ്ലാന്റിന് നേരെ ശനിയാഴ്ച രാവിലെ ഒരു വലിയ ആക്രമണം ഉണ്ടായി. ഇത് മിഡിൽ ഈസ്റ്റിൽ നടന്നു കൊണ്ടിരിക്കുന്ന സംഘർഷത്തെ പുതിയതും കൂടുതൽ അപകടകരവുമായ ഒരു ഘട്ടത്തിലേക്ക് നയിച്ചു. ആക്രമണത്തിൽ ഇസ്രായേൽ പ്രതിരോധ സേന (ഐഡിഎഫ്) ഉത്തരവാദിത്വം നിഷേധിച്ചു.
ഐഡിഎഫിൻ്റെ ഔദ്യോഗിക പ്രസ്താവനകൾ പ്രകാരം, ആക്രമണം നടത്തിയത് അമേരിക്കയാണ്. ഗൾഫ് മേഖലയിലെ സുരക്ഷയെയും സ്ഥിരതയെയും കുറിച്ചുള്ള അന്താരാഷ്ട്ര ആശങ്കകൾ ഈ സംഭവം ഉയർത്തിയിട്ടുണ്ട്.
ഇറാൻ്റെ നതാൻസ് ആണവ നിലയം ശനിയാഴ്ച രാവിലെ ആക്രമിച്ചിട്ടില്ലെന്ന് ഇസ്രായേൽ പ്രതിരോധ സേന (IDF) ഔദ്യോഗിക പ്രസ്താവന ഇറക്കി. ഇസ്രായേൽ സൈന്യം ഈ പ്രത്യേക പ്രദേശത്ത് ഒരു പ്രവർത്തനവും നടത്തിയിട്ടില്ലെന്ന് ഒരു IDF വക്താവ് വ്യക്തമാക്കി. ആണവ നിലയത്തെ ലക്ഷ്യമാക്കി യുഎസ് പ്രത്യേക ‘ബങ്കർ- ബസ്റ്റർ’ ബോംബുകൾ ഉപയോഗിച്ചതായി ഒരു സ്രോതസിനെ ഉദ്ധരിച്ച് കാൻ ന്യൂസ് റിപ്പോർട്ട് ചെയ്തു.
ഈ ബോംബുകൾക്ക് ഭൂമിക്കടിയിൽ ആഴത്തിൽ സ്ഥിതിചെയ്യുന്ന കോൺക്രീറ്റ് ഘടനകളിലേക്ക് തുളച്ചു കയറാൻ കഴിയും. യുദ്ധസമയത്ത് യുഎസ് സൈനിക പ്രവർത്തനങ്ങളെ കുറിച്ചോ അവരുടെ തന്ത്രപരമായ പദ്ധതികളെ കുറിച്ചോ അഭിപ്രായം പറയില്ലെന്നും IDF കൂട്ടിച്ചേർത്തു.
ആക്രമണത്തിന് തൊട്ടുപിന്നാലെ, ഇറാനിലെ തസ്നിം പത്രം ഒരു സൈനിക വൃത്തത്തെ ഉദ്ധരിച്ച് യുഎസിന് ഗുരുതരമായ പ്രത്യാഘാതങ്ങൾ ഉണ്ടാകുമെന്ന് മുന്നറിയിപ്പ് നൽകി. ഖാർഗ് ദ്വീപ് പോലുള്ള തന്ത്രപരവും സാമ്പത്തികവുമായ പ്രധാനപ്പെട്ട സ്ഥലങ്ങളെ യുഎസ് ആക്രമിച്ചാൽ, ഇതുവരെ കണ്ടിട്ടില്ലാത്ത തരത്തിലുള്ള പ്രതികരണം നേരിടേണ്ടി വരുമെന്ന് ഇറാൻ ഉദ്യോഗസ്ഥർ പറഞ്ഞു.
പ്രതികാര നടപടിയായി ബാബ് അൽ- മന്ദേബിലെയും ചെങ്കടലിലെയും സമുദ്ര സുരക്ഷാ സംവിധാനങ്ങളെ തടസപ്പെടുത്തുമെന്ന് ഇറാൻ സൂചിപ്പിച്ചു. സൈനിക വൃത്തങ്ങൾ പറയുന്നതനുസരിച്ച്, വാഷിംഗ്ടണിന് ഈ പ്രദേശങ്ങൾ സുരക്ഷിതമാക്കാൻ കഴിയില്ലെന്നും തന്ത്രപരമായി വലിയ നഷ്ടങ്ങൾ നേരിടേണ്ടി വരുമെന്നും പറയുന്നു.
ഇറാനിയൻ ഭരണകൂടത്തിനും അതിൻ്റെ അടിസ്ഥാന സൗകര്യങ്ങൾക്കും നേരെയുള്ള ആക്രമണങ്ങളുടെ തീവ്രതയിൽ ഗണ്യമായ വർദ്ധനവ് ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് ഈ ആഴ്ച പ്രഖ്യാപിച്ചു. ഇറാനിയൻ ഭീകര ഭരണകൂടത്തിനെതിരായ ആക്രമണം തുടരാൻ ഇസ്രായേൽ ദൃഢനിശ്ചയിച്ചിട്ടുണ്ടെന്ന് ഒരു പൊതുപ്രസംഗത്തിൽ കാറ്റ്സ് പറഞ്ഞു.
ഇറാനിയൻ കമാൻഡർമാരെ ലക്ഷ്യമിട്ട് അവരുടെ തന്ത്രപരമായ കഴിവുകൾ പൂർണമായും തകർക്കുക എന്നതാണ് ഇസ്രായേൽ സൈന്യത്തിൻ്റെ ലക്ഷ്യമെന്ന് അദ്ദേഹം വ്യക്തമാക്കി. മേഖലയിലെ ഇസ്രായേലിനും അമേരിക്കൻ താൽപ്പര്യങ്ങൾക്കും നേരെയുള്ള എല്ലാ സുരക്ഷാ ഭീഷണികളും ഇല്ലാതാക്കുന്നതുവരെ ഈ സൈനിക ആക്രമണം തുടരുമെന്ന് പ്രതിരോധ മന്ത്രി പറഞ്ഞു.
നതാൻസ് ആണവ നിലയത്തിന് നേരെയുണ്ടായ ആക്രമണത്തെ റഷ്യൻ വിദേശകാര്യ മന്ത്രാലയം ശക്തമായി അപലപിച്ചു. മന്ത്രാലയ വക്താവ് മരിയ സഖറോവ ഒരു ഔദ്യോഗിക പ്രസ്താവനയിൽ ഇതിനെ “അന്താരാഷ്ട്ര നിയമത്തിൻ്റെ നഗ്നമായ ലംഘനം” എന്ന് വിശേഷിപ്പിച്ചു. ഇത്തരം നിരുത്തരവാദപരമായ നടപടികൾ മിഡിൽ ഈസ്റ്റിലുടനീളമുള്ള ഒരു വിനാശകരമായ ദുരന്തത്തിന് കാരണമാകുമെന്ന് ശനിയാഴ്ച മന്ത്രാലയത്തിൻ്റെ വെബ്സൈറ്റിൽ പ്രസിദ്ധീകരിച്ച പ്രസ്താവനയിൽ സഖറോവ പറഞ്ഞു. കൂടാതെ മേഖലയിലെ സമാധാനം, സ്ഥിരത, സുരക്ഷ എന്നിവയെ കൂടുതൽ ദുർബലപ്പെടുത്തുക എന്നതാണ് ഇത്തരം ആക്രമണങ്ങളുടെ ലക്ഷ്യമെന്ന് റഷ്യ മുന്നറിയിപ്പ് നൽകി.
നതാൻസ് പ്ലാന്റിനെതിരായ ആക്രമണം സൈനിക സംഘർഷങ്ങൾ വർദ്ധിപ്പിക്കുക മാത്രമല്ല, ആണവ സുരക്ഷയെ കുറിച്ചുള്ള ചോദ്യങ്ങളും ഉയർത്തിയിട്ടുണ്ട്. ഇറാൻ്റെ പ്രധാന യുറേനിയം സമ്പുഷ്ടീകരണ കേന്ദ്രമാണ് നതാൻസ്, ഈ ആക്രമണം ഇറാൻ്റെ ആണവ പദ്ധതിക്ക് വലിയ തിരിച്ചടിയായി കണക്കാക്കപ്പെടുന്നു.
റേഡിയോ ആക്ടീവ് ചോർച്ചയുടെ സാധ്യതയുണ്ടോ എന്ന് നിർണയിക്കാൻ അന്താരാഷ്ട്ര നിരീക്ഷകർ സ്ഥിതിഗതികൾ സൂക്ഷ്മമായി നിരീക്ഷിച്ചു കൊണ്ടിരിക്കുകയാണ്. സംഭവത്തെ തുടർന്ന്, ഗൾഫ് രാജ്യങ്ങൾക്ക് അതീവ ജാഗ്രത നിർദ്ദേശം നൽകിയിട്ടുണ്ട്. അതിൻ്റെ ഫലമായുണ്ടാകുന്ന അസ്ഥിരത ആഗോള ഊർജ്ജ വിപണികളെയും ബാധിച്ചേക്കാം.
