‘സെൻസസിൽ വ്യക്തതയും തുറന്ന മനസും ഇല്ല’; വിവര ശേഖരണത്തിൽ ആശങ്ക അറിയിച്ച് മുൻ സെൻസസ് ഉദ്യോഗസ്ഥൻ

ഇന്ത്യയിലെ 2027-ലെ സെൻസസ് നടപടികൾക്ക് തുടക്കമായതോടെ വിവരശേഖരണത്തിന്റെ രീതിയും വ്യക്തിഗത വിവരങ്ങളുടെ സുരക്ഷയും സംബന്ധിച്ച് ആശങ്കകൾ ഉയരുന്നു. ലോകത്തിലെ ഏറ്റവും വലിയ ജനസംഖ്യാ കണക്കെടുപ്പുകളിലൊന്നായ സെൻസസിൽ ഇത്തവണ ശേഖരിക്കുന്ന വിവരങ്ങൾ എന്തിനുവേണ്ടിയാണ് ഉപയോഗിക്കുന്നതെന്ന് സർക്കാർ വ്യക്തമാക്കണമെന്നാണ് മുൻ ഡെപ്യൂട്ടി രജിസ്ട്രാർ ജനറലും 2011, 2021 സെൻസസുകളുടെ ഉപദേശക സമിതി അംഗവുമായ കെ. നാരായണൻ ഉണ്ണിയുടെ ആവശ്യം.

റെഡിഫിന് നൽകിയ അഭിമുഖത്തിലാണ് അദ്ദേഹം ആശങ്കകൾ പങ്കുവെച്ചത്. സാധാരണ സെൻസസിൽ ഉൾപ്പെടേണ്ടതില്ലാത്ത വ്യക്തിഗത വിവരങ്ങൾ ശേഖരിക്കുന്നത് കണക്കെടുപ്പിന്റെ വിശ്വാസ്യതയെ ബാധിക്കാമെന്നും ശേഖരിക്കുന്ന വിവരങ്ങൾ ദേശീയ പൗരത്വ രജിസ്റ്റർ (എൻആർസി) തയ്യാറാക്കാൻ ഉപയോഗിക്കാനുള്ള സാധ്യത തള്ളിക്കളയാനാകില്ലെന്നും അദ്ദേഹം ചൂണ്ടിക്കാട്ടി.

വ്യക്തിഗത വിവരങ്ങൾ എന്തിന്?

സെൻസസ് എന്നത് വ്യക്തികളെക്കുറിച്ചുള്ള വിശദമായ സ്വകാര്യ വിവരങ്ങൾ ശേഖരിക്കുന്നതിനുള്ള നടപടിയല്ല, മറിച്ച് ജനസംഖ്യയെക്കുറിച്ചുള്ള സ്ഥിതിവിവരക്കണക്കുകൾ തയ്യാറാക്കുന്നതിനുള്ള പ്രക്രിയയാണെന്ന് നാരായണൻ ഉണ്ണി പറഞ്ഞു.

ജീവിതപങ്കാളിയുടെ പേര്, മാതാപിതാക്കളുടെ പേര്, മതം തുടങ്ങിയ വിവരങ്ങൾ ശേഖരിക്കുന്നതിന്റെ ആവശ്യകതയെക്കുറിച്ച് വ്യക്തതയില്ല. ജനസംഖ്യാ രജിസ്റ്റർ തയ്യാറാക്കുന്നതിനോ പുതുക്കുന്നതിനോ വേണ്ടിയാകാം ഇത്തരം വിവരങ്ങൾ ഉൾപ്പെടുത്തിയതെന്ന് അദ്ദേഹം സംശയം പ്രകടിപ്പിച്ചു.

എന്നാൽ സാധാരണ സ്ഥിതിവിവരക്കണക്ക് ശേഖരണത്തിന്റെ പരിധിയിൽപ്പെടാത്ത ചോദ്യങ്ങൾ ഉൾപ്പെടുത്തുന്നത് സെൻസസ് വിവരങ്ങളുടെ ഗുണനിലവാരത്തെ ബാധിച്ചേക്കാം. ഓരോ ചോദ്യവും എന്തിനുവേണ്ടിയാണെന്നും അതിൽനിന്ന് ലഭിക്കുന്ന വിവരങ്ങൾ എങ്ങനെ ഉപയോഗിക്കുമെന്നും സർക്കാർ വ്യക്തമാക്കണമെന്നും അദ്ദേഹം ആവശ്യപ്പെട്ടു.

സെൻസസും എൻആർസിയും തമ്മിൽ ബന്ധിപ്പിക്കാനുള്ള നീക്കമാണോ ഇതെന്ന ചോദ്യവും ഉയരുന്നുണ്ട്. പുതിയ ചോദ്യങ്ങളിൽ പലതും 2010ൽ നടന്ന ആദ്യ എൻആർസി കണക്കെടുപ്പിലും 2011ലെ സെൻസസിന്റെ വീടുകളുടെ പട്ടികപ്പെടുത്തൽ ഘട്ടത്തിലും ഉൾപ്പെട്ടിരുന്നുവെന്ന് നാരായണൻ ഉണ്ണി ചൂണ്ടിക്കാട്ടി. വ്യക്തികളുടെ നിലവിലെ വിലാസം മാത്രമാണ് അന്ന് ശേഖരിച്ച വിവരങ്ങളിൽനിന്ന് വ്യത്യസ്തമായി കാണുന്നതെന്നും അദ്ദേഹം പറഞ്ഞു.

അതിനാൽ സെൻസസ് വിവരങ്ങൾ എൻആർസിയുമായി ബന്ധിപ്പിക്കാനുള്ള സാധ്യത പൂർണമായി തള്ളിക്കളയാനാകില്ലെന്നാണ് അദ്ദേഹത്തിന്റെ വിലയിരുത്തൽ.

വിവരങ്ങൾ രഹസ്യമായി സൂക്ഷിക്കേണ്ടതല്ലേ?

സെൻസസ് വിവരങ്ങളുടെ രഹസ്യസ്വഭാവം ഉറപ്പാക്കണമെന്ന് നിയമവും അന്താരാഷ്ട്ര സ്ഥിതിവിവരക്കണക്ക് തത്വങ്ങളും വ്യക്തമാക്കുന്നുണ്ടെന്ന് നാരായണൻ ഉണ്ണി പറഞ്ഞു.

സെൻസസ് നിയമപ്രകാരം ശേഖരിക്കുന്ന വ്യക്തിഗത വിവരങ്ങൾ രഹസ്യമായി സൂക്ഷിക്കേണ്ടതാണ്. ഐക്യരാഷ്ട്രസഭയുടെ ഔദ്യോഗിക സ്ഥിതിവിവരക്കണക്കുകളുടെ അടിസ്ഥാന തത്വങ്ങളും വ്യക്തിഗത വിവരങ്ങൾ സ്ഥിതിവിവരക്കണക്കുകൾ തയ്യാറാക്കുന്നതിനുള്ള ആവശ്യങ്ങൾക്കായി മാത്രമേ ഉപയോഗിക്കാവൂ എന്ന് വ്യക്തമാക്കുന്നു.

എന്നാൽ പുതിയ സെൻസസിൽ വിലാസങ്ങൾ, വ്യക്തികളുടെ പേരുകൾ, മൊബൈൽ നമ്പറുകൾ, പാസ്‌പോർട്ട് വിവരങ്ങൾ തുടങ്ങിയവ ശേഖരിക്കുന്നതിന്റെ ഉദ്ദേശ്യം വ്യക്തമല്ല. ജാതി സെൻസസിൽ ഉൾപ്പെടുന്ന ചോദ്യങ്ങൾക്ക് ജനവിഭാഗങ്ങളുടെ എണ്ണമറിയുക എന്ന വ്യക്തമായ ലക്ഷ്യമുണ്ട്. എന്നാൽ മറ്റ് വ്യക്തിഗത വിവരങ്ങൾ ശേഖരിക്കുന്നതിന്റെ ആവശ്യകതയെക്കുറിച്ച് സർക്കാർ വിശദീകരണം നൽകിയിട്ടില്ലെന്നും അദ്ദേഹം പറഞ്ഞു.

1.4 ബില്യൺ ആളുകളിൽനിന്ന് വിവരങ്ങൾ ശേഖരിക്കുന്ന സാഹചര്യത്തിൽ സുതാര്യത നിർണായകമാണ്. ശേഖരിക്കുന്ന വിവരങ്ങൾ എങ്ങനെ ഉപയോഗിക്കും, അവ ആരുമായി പങ്കുവെക്കും, സ്വകാര്യത എങ്ങനെ സംരക്ഷിക്കും തുടങ്ങിയ കാര്യങ്ങളിൽ വ്യക്തമായ വിശദീകരണം വേണമെന്നും അദ്ദേഹം കൂട്ടിച്ചേർത്തു.

വിവരങ്ങളുടെ സുരക്ഷ എങ്ങനെ ഉറപ്പാക്കും?

പാസ്‌പോർട്ട് നമ്പറുകൾ, ആധാർ നമ്പറുകൾ, ബാങ്ക് അക്കൗണ്ട് വിവരങ്ങൾ തുടങ്ങിയവ ശേഖരിക്കേണ്ടതിന്റെ ആവശ്യകതയും നാരായണൻ ഉണ്ണി ചോദ്യം ചെയ്തു.

ആധാർ നമ്പറുകൾ ബാങ്ക് അക്കൗണ്ടുകളുമായി ബന്ധിപ്പിച്ചിട്ടുള്ള സാഹചര്യത്തിൽ ചില വിവരങ്ങൾ ബാങ്കിങ് സംവിധാനങ്ങളിലൂടെ ലഭ്യമാകാമെന്നും സെൻസസിൽ അവ വീണ്ടും ശേഖരിക്കേണ്ടതെന്തിനാണെന്ന് വ്യക്തമല്ലെന്നും അദ്ദേഹം പറഞ്ഞു.

വിവരശേഖരണത്തിൽ നിരവധി ഉദ്യോഗസ്ഥരും മറ്റ് ജീവനക്കാരും പങ്കാളികളാകുന്നതിനാൽ ഡാറ്റയുടെ സുരക്ഷ ഉറപ്പാക്കുന്നത് വലിയ വെല്ലുവിളിയാണ്. ഡിജിറ്റൽ സെൻസസ് ആണെങ്കിലും കണക്റ്റിവിറ്റി പ്രശ്നങ്ങൾ കാരണം ചിലർക്ക് നേരിട്ട് വിവരങ്ങൾ നൽകാൻ കഴിയണമെന്നില്ല. അത്തരം സാഹചര്യങ്ങളിൽ കടലാസിൽ വിവരങ്ങൾ ശേഖരിക്കുകയും പിന്നീട് മറ്റുള്ളവർ ഡിജിറ്റൽ സംവിധാനത്തിലേക്ക് മാറ്റുകയും ചെയ്യേണ്ടിവരാം.

ഇതിലൂടെ കൂടുതൽ ആളുകൾക്ക് വ്യക്തിഗത വിവരങ്ങൾ ലഭ്യമാകാനുള്ള സാധ്യതയുണ്ട്. മുൻകാലങ്ങളിൽ വിവരങ്ങൾ ദുരുപയോഗം ചെയ്തതായി പരാതികൾ ഉണ്ടായിട്ടുണ്ടെന്നും സുരക്ഷാ നടപടികൾ ശക്തമാക്കിയതോടെ അത്തരം പരാതികൾ കുറഞ്ഞിട്ടുണ്ടെന്നും അദ്ദേഹം ചൂണ്ടിക്കാട്ടി. എന്നിരുന്നാലും ദുരുപയോഗ സാധ്യത പൂർണമായി ഒഴിവാക്കാനാകില്ല.

ശേഖരിക്കുന്ന വിവരങ്ങൾ മറ്റ് സർക്കാർ വകുപ്പുകളുമായോ രജിസ്ട്രാർ ജനറലിന്റെ ഓഫീസിലെ മറ്റ് വിഭാഗങ്ങളുമായോ പങ്കിടുന്നുണ്ടെങ്കിൽ അവയുടെ രഹസ്യസ്വഭാവം എങ്ങനെ ഉറപ്പാക്കുമെന്നതിൽ വ്യക്തതയില്ലെന്നും അദ്ദേഹം പറഞ്ഞു.

വിവരങ്ങൾ നൽകാൻ വിസമ്മതിച്ചാൽ?

സെൻസസിൽ ആവശ്യപ്പെട്ട വിവരങ്ങൾ നൽകാതിരിക്കുന്നവർക്ക് നിയമപ്രകാരം ശിക്ഷ ലഭിക്കാനുള്ള സാധ്യതയുണ്ടെന്ന് നാരായണൻ ഉണ്ണി പറഞ്ഞു. എന്നാൽ ഇത്തവണ വിവരശേഖരണം ഡിജിറ്റൽ സംവിധാനത്തിലേക്ക് മാറിയ സാഹചര്യത്തിൽ, ഒരാൾ വിവരങ്ങൾ നൽകിയോ ഇല്ലയോ എന്ന് തെളിയിക്കുന്നത് എങ്ങനെ എന്ന ചോദ്യം ഉയരുന്നു.

2001ലെയും 2011ലെയും സെൻസസുകളിൽ വിവരങ്ങൾ ശേഖരിച്ചശേഷം വ്യക്തിയുടെ ഒപ്പ് വാങ്ങിയിരുന്നു. പൂരിപ്പിച്ച ചോദ്യാവലി വ്യക്തിയെ കാണിച്ചശേഷമാണ് ഒപ്പിട്ടിരുന്നത്. ഇത്തവണ സമാനമായ സ്ഥിരീകരണ സംവിധാനം ഉണ്ടോയെന്ന് വ്യക്തമല്ലെന്നും അദ്ദേഹം പറഞ്ഞു.

വിവരങ്ങൾ നൽകിയില്ലെന്ന കാര്യം തെളിയിക്കാൻ പ്രയാസമുണ്ടെങ്കിൽ നിയമനടപടികൾ സ്വീകരിക്കുന്നതും സങ്കീർണമാകും. വലിയൊരു വിഭാഗം ആളുകൾ വിവരങ്ങൾ നൽകാതിരുന്നാൽ എല്ലാവരെയും ശിക്ഷിക്കുക പ്രായോഗികമല്ലെന്നും അദ്ദേഹം അഭിപ്രായപ്പെട്ടു.

പിഴവുകൾ സെൻസസിന്റെ ഭാഗമാണ്

സെൻസസിൽ എല്ലാവരും കൃത്യമായ വിവരങ്ങൾ നൽകുമെന്ന് പ്രതീക്ഷിക്കാനാകില്ലെന്ന് നാരായണൻ ഉണ്ണി പറഞ്ഞു. ചിലർ വിവരങ്ങൾ നൽകാതിരിക്കാം; മറ്റുചിലർ തെറ്റായ വിവരങ്ങൾ നൽകിയെന്നും വരാം.

അമേരിക്കൻ സെൻസസിൽ മുൻകാലത്ത് ചോദ്യാവലികൾ തപാൽ വഴി അയച്ചപ്പോൾ ഏകദേശം 60 ശതമാനം മാത്രമാണ് തിരികെ ലഭിച്ചിരുന്നതെന്ന ഉദാഹരണവും അദ്ദേഹം പങ്കുവെച്ചു.

ഒരു പ്രദേശത്ത് കേന്ദ്രീകരിക്കാതെ ചെറിയൊരു ശതമാനം ആളുകൾ വിവരങ്ങൾ നൽകാതിരുന്നാൽ അതിന്റെ സ്വാധീനം മൊത്തത്തിലുള്ള സ്ഥിതിവിവരക്കണക്കുകളിൽ പരിമിതമായിരിക്കാമെന്നും അദ്ദേഹം വിശദീകരിച്ചു.

സെൻസസിന്റെ പ്രധാന ലക്ഷ്യം വിശ്വസനീയമായ ജനസംഖ്യാ കണക്കുകൾ തയ്യാറാക്കുക എന്നതാണ്. അതിനായി ആവശ്യമായ വിവരങ്ങൾ ശേഖരിക്കുമ്പോൾ വ്യക്തികളുടെ സ്വകാര്യതയും രഹസ്യസ്വഭാവവും ഉറപ്പാക്കണം.