കേരളത്തിൽ രൂക്ഷമായ എൽപിജി വിതരണ പ്രതിസന്ധി നിലനിൽക്കുന്ന സാഹചര്യത്തിൽ കേന്ദ്ര സർക്കാരിന്റെ അടിയന്തര ഇടപെടൽ ആവശ്യപ്പെട്ട് എംപി ജോൺ ബ്രിട്ടാസ് രംഗത്തെത്തി. സംസ്ഥാനത്ത് എൽപിജി വിതരണം ഏതാണ്ട് സ്തംഭിച്ചിരിക്കുകയാണെന്നും നിലവിലെ സ്ഥിതി ഗുരുതരമാണെന്നും അദ്ദേഹം വ്യക്തമാക്കി.
വാണിജ്യ സിലിണ്ടറുകൾ നിറയ്ക്കുന്ന പ്രവർത്തനം പൂർണമായും നിർത്തിയതോടെ ഹോട്ടൽ മേഖലയുൾപ്പെടെ പല മേഖലകളും പ്രതിസന്ധിയിലായിരിക്കുകയാണ്. ഈ സാഹചര്യം തുടരുകയാണെങ്കിൽ ഭക്ഷ്യ ലഭ്യതയെയും അത് പ്രതികൂലമായി ബാധിക്കുമെന്ന് ജോൺ ബ്രിട്ടാസ് മുന്നറിയിപ്പ് നൽകി.
എൽപിജി നിറയ്ക്കുന്നതുമായി ബന്ധപ്പെട്ട നിയന്ത്രണങ്ങളിൽ ഇളവ് വരുത്തുകയും വിതരണം മുൻഗണന ക്രമത്തിൽ നടത്തുന്നതിനുള്ള പ്രത്യേക സംവിധാനം ഏർപ്പെടുത്തുകയും വേണമെന്നാവശ്യപ്പെട്ടാണ് കേന്ദ്ര പെട്രോളിയം-പ്രകൃതിവാതക മന്ത്രിയായ ഹർദീപ് പുരിക്ക് കത്ത് അയച്ചത്.
അതേസമയം, രാജ്യത്ത് എൽപിജി വിതരണത്തിൽ ഏകദേശം 30 ശതമാനം കുറവുണ്ടാകുമെന്ന് കേന്ദ്ര സർക്കാർ അറിയിച്ചിട്ടുണ്ട്. പാചകവാതക ലഭ്യത ഉറപ്പാക്കുന്നതിനായി രൂപീകരിച്ച മൂന്ന് അംഗ സമിതി വ്യവസായികളുമായി ചർച്ചകൾ ആരംഭിച്ചതായും റിപ്പോർട്ടുകളുണ്ട്.
പാചകവാതക പ്രതിസന്ധി തുടർന്നാൽ റെയിൽവേ കാറ്ററിംഗ് സേവനങ്ങളിലേക്കും അതിന്റെ ആഘാതം വ്യാപിക്കാമെന്നാണ് സൂചന. ആവശ്യമായ ഇടപെടലുകൾ ഉടൻ ഉണ്ടാകാത്ത പക്ഷം ഭക്ഷ്യ വിതരണ ശൃംഖല തന്നെ തടസ്സപ്പെടാൻ സാധ്യതയുണ്ടെന്നും ആശങ്ക ഉയരുന്നു.
