കോൺഗ്രസ് വനിതാ നേതാവ് എം. എ. ഷഹാനാസ് രാഹുൽ മാങ്കൂട്ടത്തിലിനെതിരായി ഗൗരവമായ ആരോപണങ്ങളുമായി മുന്നോട്ട് വന്നു. രാഹുലുമായി ബന്ധപ്പെട്ട് താനും ദുരനുഭവം നേരിട്ടതായാണ് ഷഹാനാസ് വെളിപ്പെടുത്തിയത്.
കർഷക സമര സമയത്ത് ഡെൽഹിയിലേക്ക് കൂടെ പോകണമെന്ന് രാഹുൽ ക്ഷണിച്ചിരുന്നുവെന്നും, പിന്നീട് തനിക്ക് മോശമായ സന്ദേശം അയച്ചതായും അവർ പറഞ്ഞു. രാഹുലിനെ യുവജന കോൺഗ്രസ് അധ്യക്ഷനാക്കരുതെന്ന് ഷാഫിക്ക് മുന്നറിയിപ്പ് നൽകിയിരുന്നുവെങ്കിലും അത് അവഗണിക്കപ്പെട്ടുവെന്നും ഷഹാനാസ് ആരോപിച്ചു. രാഹുലിൽ നിന്ന് ലൈംഗിക സ്വഭാവമുള്ള അധിക്ഷേപം നേരിട്ട വനിതാ പ്രവർത്തകരെ തനിക്ക് വ്യക്തിപരമായി അറിയാമെന്നും ഷഹനാസ് കൂട്ടിച്ചേർത്തു.
ഡെൽഹിയിൽ സമരത്തിൽ പങ്കെടുത്ത് തിരിച്ചുവന്ന ശേഷമാണ് രാഹുൽ “നമുക്ക് ഒരുമിച്ചു പോകാമായിരുന്നു” എന്ന തരത്തിലുള്ള അനുചിത സന്ദേശം അയച്ചതെന്ന് ഷഹാനാസ് വ്യക്തമാക്കി. ഈ വിവരം ഉൾപ്പെടെ എല്ലാം ഷാഫിയെ അറിയിച്ചിരുന്നുവെന്നും, സ്ത്രീകളോട് മോശമായി പെരുമാറുന്ന വ്യക്തിയെ അധ്യക്ഷ സ്ഥാനത്ത് ഇരുത്തരുതെന്ന് ആവർത്തിച്ച് മുന്നറിയിപ്പ് നൽകിയിരുന്നുവെന്നും ഷഹനാസ് പറഞ്ഞു.
