ജനപ്രിയ സോഷ്യൽ മീഡിയ പ്ലാറ്റ്ഫോമുകളായ ഫെയ്സ്ബുക്ക്, ഇൻസ്റ്റഗ്രാം, വാട്സ്ആപ്പ് എന്നിവയുടെ ഉപയോഗരീതിയിൽ വലിയ മാറ്റങ്ങൾ വരുത്തിക്കൊണ്ട് മെറ്റ പുതിയ പെയ്ഡ് സബ്സ്ക്രിപ്ഷൻ പ്ലാനുകൾ അവതരിപ്പിക്കുന്നു. ഇന്ത്യയുൾപ്പെടെയുള്ള ആഗോള വിപണികളിൽ ഈ ആപ്പുകളുടെ ‘പ്ലസ്’ പതിപ്പുകൾ ഉടൻ പുറത്തിറങ്ങുമെന്നാണ് റിപ്പോർട്ടുകൾ സൂചിപ്പിക്കുന്നത്. പണം നൽകി സബ്സ്ക്രൈബ് ചെയ്യുന്നവർക്ക് നിലവിലുള്ള ഉപയോക്താക്കൾക്ക് ലഭിക്കാത്ത പ്രത്യേക ടൂളുകളും ഓപ്ഷനുകളും ലഭ്യമാകും എന്നതാണ് ഇതിന്റെ പ്രധാന പ്രത്യേകത.
പരസ്യ വരുമാനത്തെ മാത്രം ആശ്രയിക്കുന്ന രീതിയിൽ നിന്നും മാറി വരുമാന സ്രോതസ്സുകൾ വൈവിധ്യവത്കരിക്കാനാണ് മെറ്റ ഈ നീക്കത്തിലൂടെ ലക്ഷ്യമിടുന്നത്. റിപ്പോർട്ടുകൾ പ്രകാരം ഇൻസ്റ്റഗ്രാം പ്ലസിനും ഫെയ്സ്ബുക്ക് പ്ലസിനും പ്രതിമാസം 3.99 ഡോളറും (ഏകദേശം 387 രൂപ), വാട്സ്ആപ്പ് പ്ലസിന് 2.99 ഡോളറും (ഏകദേശം 290 രൂപ) നൽകേണ്ടി വരും. ഇന്ത്യയിലെ കൃത്യമായ നിരക്കുകൾ കമ്പനി ഇതുവരെ ഔദ്യോഗികമായി വെളിപ്പെടുത്തിയിട്ടില്ലെങ്കിലും, അത്യാധുനിക എഐ സംവിധാനങ്ങൾക്കായി ചെലവഴിക്കുന്ന ഭീമമായ തുക വീണ്ടെടുക്കുക എന്നതും ഈ പ്ലാനുകളുടെ പിന്നിലെ പ്രധാന ഉദ്ദേശ്യമാണ്.
ഇൻസ്റ്റഗ്രാം പ്ലസ് ഉപയോക്താക്കൾക്കായി ഒട്ടേറെ ആകർഷകമായ ഫീച്ചറുകളാണ് ഒരുങ്ങുന്നത്. തങ്ങളുടെ സ്റ്റോറികൾ എത്രപേർ വീണ്ടും കണ്ടുവെന്ന് (re-watched) അറിയാനും, ക്ലോസ് ഫ്രണ്ട്സ് പട്ടികയ്ക്ക് പുറത്ത് പരിധിയില്ലാത്ത സ്റ്റോറി ഓഡിയൻസ് ലിസ്റ്റുകൾ നിർമ്മിക്കാനും ഇതിലൂടെ സാധിക്കും. കൂടാതെ, സ്റ്റോറി വ്യൂവർ ലിസ്റ്റിൽ പേര് വരാതെ തന്നെ രഹസ്യമായി മറ്റുള്ളവരുടെ സ്റ്റോറികൾ പ്രിവ്യൂ ചെയ്യാനുള്ള സൗകര്യവും പുതിയ പതിപ്പിലുണ്ടാകുമെന്ന് ടെക് ക്രഞ്ച് റിപ്പോർട്ട് ചെയ്യുന്നു.
ഉപയോക്താക്കളുടെ വിസിബിലിറ്റി വർദ്ധിപ്പിക്കുന്നതിനായി 24 മണിക്കൂർ എന്ന സ്റ്റോറി പരിധി നീട്ടാനും ആഴ്ചയിൽ ഒരു സ്റ്റോറി സ്പോട്ട്ലൈറ്റ് ചെയ്യാനും പ്ലസ് മെമ്പർഷിപ്പ് അനുവദിക്കുന്നു. കൂടാതെ, വ്യൂവർ ലിസ്റ്റിൽ സെർച്ച് ചെയ്യാനും, ഫോളോ ചെയ്യുന്നവരുടെ ഫീഡിൽ വരാതെ തന്നെ പ്രൊഫൈലിലേക്കോ ഹൈലൈറ്റുകളിലേക്കോ നേരിട്ട് പോസ്റ്റ് ചെയ്യാനും ഈ പ്ലാൻ സഹായിക്കും. ആനിമേറ്റഡ് ‘സൂപ്പർ ഹാർട്ട്’ റിയാക്ഷനുകൾ, കസ്റ്റം ആപ്പ് ഐക്കണുകൾ, ബയോകൾക്കുള്ള പ്രത്യേക ഫോണ്ടുകൾ എന്നിവയും ഇൻസ്റ്റഗ്രാം പ്ലസിന്റെ ഭാഗമായിരിക്കും.
വാട്സ്ആപ്പ് പ്ലസ് പ്രധാനമായും ശ്രദ്ധ കേന്ദ്രീകരിക്കുന്നത് മെസ്സേജിങ് പേഴ്സണലൈസ് ചെയ്യുന്നതിലാണ്. സബ്സ്ക്രൈബർമാർക്ക് കൂടുതൽ ചാറ്റുകൾ പിൻ ചെയ്യാനും, പ്രീമിയം സ്റ്റിക്കറുകൾ, മികച്ച റിങ്ടോണുകൾ, കസ്റ്റം തീമുകൾ എന്നിവ ഉപയോഗിക്കാനും സാധിക്കും. അതോടൊപ്പം ലിസ്റ്റ് കസ്റ്റമൈസേഷൻ ടൂളുകളിലും കാര്യമായ പുരോഗതി കൊണ്ടുവരുന്നതിലൂടെ ഉപയോക്താക്കൾക്ക് കൂടുതൽ വ്യക്തിഗതമായ ആശയവിനിമയ അനുഭവം നൽകാൻ മെറ്റ ലക്ഷ്യമിടുന്നു.
സോഷ്യൽ മീഡിയ ആപ്പുകൾക്ക് പുറമെ ‘മെറ്റാ വൺ’ എന്ന പേരിൽ എഐ, ക്രിയേറ്റർ, ബിസിനസ് കേന്ദ്രീകൃതമായ പ്ലാനുകളും കമ്പനി അവതരിപ്പിക്കുന്നുണ്ട്. ഇതിലൂടെ അത്യാധുനിക ഇമേജ്, വീഡിയോ ജനറേഷൻ സൗകര്യങ്ങൾ ലഭ്യമാകും. തുടക്കത്തിൽ സിംഗപ്പൂർ, ഗ്വാട്ടിമാല, ബൊളീവിയ എന്നിവിടങ്ങളിലാണ് എഐ സബ്സ്ക്രിപ്ഷനുകൾ പരീക്ഷിക്കുന്നത്. ക്രിയേറ്റർമാർക്കും ബിസിനസ്സുകൾക്കുമായി അനലിറ്റിക്സ്, പ്രയോറിറ്റി സപ്പോർട്ട്, ഉള്ളടക്ക സുരക്ഷ തുടങ്ങിയ സൗകര്യങ്ങളുള്ള എസൻഷ്യൽ, അഡ്വാൻസ്ഡ് പ്ലാനുകളും ഇതിന്റെ ഭാഗമായി മാറും.
