2026 ലോകകപ്പിലെ നിർണ്ണായക മത്സരത്തിന് മുന്നോടിയായി ദക്ഷിണ കൊറിയൻ ടീമിന്റെ പരിശീലന ക്യാമ്പിന് മുകളിൽ അജ്ഞാത ഡ്രോൺ കണ്ടെത്തിയത് വലിയ പരിഭ്രാന്തി പരത്തി. മെക്സിക്കോയിലെ ഗ്വാഡലഹാരയിലുള്ള പരിശീലന കേന്ദ്രത്തിന് മുകളിലൂടെ അനുമതിയില്ലാതെ പറന്ന ഈ ഡ്രോണിനെ മെക്സിക്കൻ സൈന്യത്തിന്റെ പ്രത്യേക സുരക്ഷാ വിഭാഗം വെടിവെച്ചിട്ടു. ദക്ഷിണ കൊറിയൻ താരങ്ങൾ പരിശീലനത്തിനായി മൈതാനത്തിറങ്ങുന്നതിന് തൊട്ടുമുൻപാണ് ഈ ദുരൂഹ സംഭവം ഉണ്ടായത്.
സംഭവത്തെക്കുറിച്ച് അന്വേഷണം ആരംഭിച്ചിട്ടുണ്ടെങ്കിലും ഡ്രോൺ പ്രവർത്തിപ്പിച്ചത് ആരാണെന്നോ അതിന്റെ പിന്നിലെ ലക്ഷ്യമോ വ്യക്തമല്ലെന്ന് പേര് വെളിപ്പെടുത്താത്ത ഫെഡറൽ ഉദ്യോഗസ്ഥൻ അറിയിച്ചു. ടീമിന്റെ തന്ത്രങ്ങൾ ചോർത്താൻ അയച്ച ചാര ഡ്രോൺ ആണോ ഇതെന്ന് സംശയിക്കപ്പെടുന്നുണ്ടെങ്കിലും ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല. ലോകകപ്പിലെ ആദ്യ മത്സരങ്ങളിൽ മെക്സിക്കോ ദക്ഷിണാഫ്രിക്കയെയും ദക്ഷിണ കൊറിയ ചെക്ക് റിപ്പബ്ലിക്കിനെയും തോൽപ്പിച്ചതിനാൽ, ഗ്രൂപ്പ് എ-യിലെ ഇരു ടീമുകളും തമ്മിലുള്ള അടുത്ത പോരാട്ടം ഏറെ നിർണ്ണായകമാണ്.
തങ്ങളുടെ പരിശീലന സെഷനുകൾക്ക് തടസ്സമുണ്ടാക്കുന്ന വിധത്തിൽ ഡ്രോൺ എത്തിയത് ദക്ഷിണ കൊറിയൻ പരിശീലകൻ ഹോങ് മ്യൂങ്-ബോയെ നിരാശപ്പെടുത്തി. മത്സരത്തിന് തൊട്ടുമുൻപുള്ള പ്രധാന ഘട്ടത്തിൽ ഇത്തരം സംഭവങ്ങൾ ഉണ്ടായത് നിർഭാഗ്യകരമാണെന്ന് അദ്ദേഹം പ്രതികരിച്ചു. വെള്ളിയാഴ്ച രാവിലെ 6:30-ന് നടക്കുന്ന മെക്സിക്കോ-ദക്ഷിണ കൊറിയ മത്സരത്തിന് മുന്നോടിയായി സുരക്ഷാ ക്രമീകരണങ്ങൾ മെക്സിക്കൻ സൈന്യം ശക്തമാക്കിയിട്ടുണ്ട്.