മെക്സിക്കോയുടെ ഫാത്തിമ ബോഷ് 2025-ലെ മിസ്സ് യൂണിവേഴ്സ് ആയി തിരഞ്ഞെടുക്കപ്പെട്ടു. ബാങ്കോക്കിൽ നടന്ന 74-ാമത് മിസ്സ് യൂണിവേഴ്സ് സൗന്ദര്യ മത്സരത്തിൻ്റെ ഗ്രാൻഡ് ഫിനാലെയിൽ, ഇന്ത്യ ഉൾപ്പെടെ ലോകമെമ്പാടുമുള്ള 100-ലധികം മത്സരാർത്ഥികളെ പരാജയപ്പെടുത്തി മെക്സിക്കോ 74-ാമത് മിസ്സ് യൂണിവേഴ്സ് കിരീടം നേടി.
തായ്ലൻഡിൻ്റെ പ്രവീണർ സിംഗ് ആണ് ഫസ്റ്റ് റണ്ണറപ്പ്. വെനിസ്വേലയിൽ നിന്നുള്ള സ്റ്റെഫാനി അബാസാലി രണ്ടാം റണ്ണർ അപ്പായി തിരഞ്ഞെടുക്കപ്പെട്ടു. ഇന്ത്യയുടെ മണിക വിശ്വകർമ ടോപ്പ് 30ൽ ഇടം നേടിയെങ്കിലും ടോപ്പ് 12ൽ ഇടം നേടിയില്ല.
ആരാണ് ഫാത്തിമ ബോഷ്?
മെക്സിക്കോയിൽ നിന്നുള്ള ഫാഷൻ ഡിസൈൻ ബിരുദധാരിയായ ഫാത്തിമ ബോഷ്, ഡിസ്ലെക്സിയ, എഡിഎച്ച്ഡി എന്നിവയുമായി മല്ലിടുന്നതിൻ്റെ പേരിൽ സ്കൂളിൽ ഒരിക്കൽ ഭീഷണി നേരിട്ടിരുന്നു.
തൻ്റെ വ്യക്തിപരമായ പോരാട്ടങ്ങളെ കുറിച്ചും മൃഗങ്ങളോടുള്ള ആഴമായ അനുകമ്പയെ കുറിച്ചും അവർ പലപ്പോഴും സംസാരിച്ചിട്ടുണ്ട്. അതേസമയം ഫാഷനെ മുന്നോട്ട് കൊണ്ടുപോകേണ്ടതിൻ്റെ ആവശ്യകതയെ കുറിച്ചും ഊന്നിപ്പറയുന്നു.
2018ൽ, ടബാസ്കോയിൽ ഫ്ലോർ ഡി ഓറോ കിരീടം നേടിയതിന് ശേഷമാണ് അവർ തൻ്റെ ഫാഷൻ യാത്ര ആരംഭിച്ചത്.
2025 സെപ്റ്റംബറിൽ, മിസ് യൂണിവേഴ്സ് മെക്സിക്കോ കിരീടം നേടിയ ടബാസ്കോയിൽ നിന്നുള്ള ആദ്യ വനിതയായി ബോഷ് ചരിത്രം സൃഷ്ടിച്ചു.
വിജയിക്കുന്ന ചോദ്യം
തായ്ലൻഡ്, ഫിലിപ്പീൻസ്, വെനിസ്വേല, മെക്സിക്കോ, കോട്ട് ഡി ഐവയർ എന്നിവിടങ്ങളിൽ നിന്നുള്ള ടോപ്പ് 5 ക്യുഎൻഎ റൗണ്ട് മത്സരാർത്ഥികളോട് അവരുടെ ആത്മവിശ്വാസവും ആശയ വിനിമയ വൈദഗ്ധ്യവും പരീക്ഷിക്കുന്നതിനായി ചോദ്യങ്ങൾ ചോദിച്ചു.
മിസ്സ് യൂണിവേഴ്സ് മെക്സിക്കോയോട് ചോദിച്ചു: ‘നിങ്ങളുടെ കാഴ്ചപ്പാടിൽ, 2025ൽ ഒരു സ്ത്രീ എന്ന നിലയിൽ നേരിടുന്ന വെല്ലുവിളികൾ എന്തൊക്കെയാണ്. ലോകമെമ്പാടുമുള്ള സ്ത്രീകൾക്ക് സുരക്ഷിതമായ ഇടം സൃഷ്ടിക്കാൻ മിസ്സ് യൂണിവേഴ്സ് എന്ന പദവി നിങ്ങൾ എങ്ങനെ ഉപയോഗിക്കും?’
സ്ത്രീകൾ എങ്ങനെ തടസങ്ങൾ നേരിടുന്നു, തുല്യ അവസരങ്ങളുടെ അഭാവം എന്നിവയെ കുറിച്ച് ഫാത്തിമ ബോധ്യത്തോടെ സംസാരിച്ചു. എന്നാൽ യുവതലമുറ എങ്ങനെ മുന്നേറിയെന്നും ഇപ്പോൾ സംസാരിക്കാൻ ഭയപ്പെടുന്നില്ലെന്നും അവർ ഊന്നിപ്പറഞ്ഞു.
‘നമ്മള് ഇവിടെ സംസാരിക്കാനും, മാറ്റങ്ങള് വരുത്താനും, ഒരുമിച്ച്, നമ്മള് ചരിത്രം സൃഷ്ടിക്കാനും ഇവിടെയുണ്ട്,’ -ഫാത്തിമ മറുപടി നല്കി. സദസില് നിന്ന് ആവേശകരമായ കരഘോഷം ഏറ്റുവാങ്ങി.
പുതിയ വിജയിയെ പ്രഖ്യാപിച്ചു കൊണ്ട് മിസ് യൂണിവേഴ്സ് ഓർഗനൈസേഷൻ അവരുടെ ഇൻസ്റ്റാഗ്രാമിൽ എഴുതി: ‘നമ്മുടെ പുതിയ മിസ് യൂണിവേഴ്സിന് അഭിനന്ദനങ്ങൾ.’
‘ഇന്ന് രാത്രി ഒരു നക്ഷത്രം പിറന്നു. അവളുടെ കൃപയും, ശക്തിയും, പ്രസന്നമായ ആത്മാവും ലോകത്തിൻ്റെ ഹൃദയങ്ങളെ കീഴടക്കി, ഞങ്ങളുടെ പുതിയ രാജ്ഞിയായി അവരെ സ്വാഗതം ചെയ്യുന്നതിൽ ഞങ്ങൾക്ക് അതിയായ സന്തോഷമുണ്ട്. അവൾ വഴികാട്ടുമ്പോൾ പ്രപഞ്ചം കുറച്ചുകൂടി തിളക്കത്തോടെ പ്രകാശിക്കുന്നു.’
2025-ലെ മിസ്സ് യൂണിവേഴ്സിൻ്റെ പ്രമേയം ‘സ്നേഹത്തിൻ്റെ ശക്തി’ എന്നതായിരുന്നു.സൗദി അറേബ്യ, പലസ്തീൻ, മൊസാംബിക് എന്നിവയുൾപ്പെടെ 121 രാജ്യങ്ങൾ മത്സരത്തിൽ പങ്കെടുത്തു.
