ഗ്രീക്ക് തുറമുഖ നഗരത്തിൽ നൂറ് ടണ്ണിലധികം മീനുകൾ ചത്തുപൊങ്ങിയതിനാൽ അടിയന്തരാവസ്ഥ പ്രഖ്യാപിച്ചു. ഗ്രീസിലെ വോലോസ് തുറമുഖത്ത് മത്സ്യങ്ങൾ കൂട്ടത്തോടെ ചത്തുപൊങ്ങി പ്രദേശത്ത് രൂക്ഷമായ ദുർഗന്ധം വമിക്കുകയാണ്.
കാലാവസ്ഥാ മന്ത്രാലയത്തിൻ്റെ സിവിൽ പ്രൊട്ടക്ഷൻ സെക്രട്ടറി ജനറൽ വാസിലിസ് പാപജിയോ ആണ് ഒരു മാസത്തെ അടിയന്തരാവസ്ഥ പ്രഖ്യാപിച്ചത്. തീരത്തും നദികളിലും ടൺ കണക്കിന് ചത്ത മത്സ്യങ്ങൾ കൂട്ടിയിട്ടിരിക്കുന്ന തുറമുഖത്തിൻ്റെ ശുചീകരണം വേഗത്തിലാക്കാൻ ഗ്രീക്ക് സർക്കാർ ശ്രമിക്കുന്നതായി ഏഥൻസ് വാർത്താ ഏജൻസി റിപ്പോർട്ട് ചെയ്‌തു.
കഴിഞ്ഞ വർഷം തെസ്സലി മേഖലയിൽ വെള്ളപ്പൊക്കമുണ്ടായതിന് ശേഷം ഈ മേഖലയിലുണ്ടാകുന്ന രണ്ടാമത്തെ പാരിസ്ഥിതിക ദുരന്തമാണിത് . മലേറിയയ്‌ക്കെതിരെ പോരാടാൻ 1962ൽ വറ്റിച്ച സമീപത്തെ തടാകം വീണ്ടും നിറയ്ക്കുകയും വികസിപ്പിക്കുകയും സി ചെയ്‌തു. വെള്ളം ഇറങ്ങിയപ്പോൾ ശുദ്ധജല മത്സ്യങ്ങൾ വോലോസ് തുറമുഖത്തേക്ക് തള്ളപ്പെട്ടു. അവിടെ അവ ഉപ്പുവെള്ള അന്തരീക്ഷത്തിൽ ചത്തുപൊങ്ങി.
ചൊവ്വാഴ്‌ച മാത്രം 57 ടൺ ചത്ത മത്സ്യങ്ങളാണ് വോലോസിനടുത്തുള്ള ബീച്ചുകളിൽ നിന്ന് അധികൃതർ നീക്കം ചെയ്‌തത്. ശേഷിക്കുന്ന മത്സ്യങ്ങളെ ഉൾക്കൊള്ളാൻ സിരിയ നദിയിൽ പ്രത്യേക വലകൾ സ്ഥാപിച്ച് ശുചീകരണ പ്രവർത്തനങ്ങൾ തുടരുകയാണ്. കഴിഞ്ഞ വർഷത്തെ വെള്ളപ്പൊക്കത്തിൽ നിന്ന് ടൂറിസം ഏകദേശം 80% ഇടിഞ്ഞതോടെ പ്രാദേശിക സമ്പദ്‌വ്യവസ്ഥയെ മത്സ്യദുരന്തം സാരമായി ബാധിച്ചു.