മ്യാൻമറിൽ ഏകദേശം 1700 പേരുടെ മരണത്തിന് കാരണമായ 7.7 തീവ്രത രേഖപ്പെടുത്തിയ ഭൂകമ്പം, 300-ലധികം അണുബോംബുകൾ ഒരുമിച്ച് ഉപയോഗിച്ചതിന് തുല്യമായ ഊർജ്ജം പുറത്തുവിട്ടതായി ഒരു പ്രമുഖ അമേരിക്കൻ ജിയോളജിസ്റ്റ് പറയുന്നു.
“ഇതുപോലുള്ള ഒരു ഭൂകമ്പം പുറപ്പെടുവിക്കുന്ന ശക്തി ഏകദേശം 334 അണു ബോംബുകളാണ്,” -ജിയോളജിസ്റ്റ് ജെസ് ഫീനിക്സ് സിഎൻഎന്നിനോട് പറഞ്ഞു.
വെള്ളിയാഴ്ച മ്യാൻമറിൽ ഉണ്ടായ ഭൂകമ്പത്തിൻ്റെ തുടർചലനങ്ങൾ “മാസങ്ങളോളം നിലനിൽക്കുമെന്ന്” മിസ് ഫീനിക്സ് മുന്നറിയിപ്പ് നൽകി. ഇന്ത്യൻ ടെക്റ്റോണിക് പ്ലേറ്റ് മ്യാൻമറിന് താഴെയുള്ള യുറേഷ്യൻ പ്ലേറ്റുമായി ഇടിച്ചുകൊണ്ടേ ഇരിക്കുന്നതിനാൽ അത് സംഭവിക്കുമെന്ന് അവർ അഭിപ്രായപ്പെട്ടു.
മ്യാൻമറിലെ ആഭ്യന്തരയുദ്ധം രാജ്യത്തെ നാശനഷ്ടങ്ങൾ കൂടുതൽ വഷളാക്കുകയേയുള്ളൂ. എന്നതിനാൽ, ദുരന്തത്തിൻ്റെ പൂർണ്ണ വ്യാപ്തി ഗ്രഹിക്കുന്നതിൽ തടസങ്ങൾ ഉണ്ടാകാമെന്ന് ജിയോളജിസ്റ്റ് അഭിപ്രായപ്പെട്ടു. “സാധാരണയായി ബുദ്ധിമുട്ടുള്ള ഒരു സാഹചര്യം ഏതാണ്ട് അസാധ്യമായിത്തീരുന്നു,” -അവർ പറഞ്ഞു.
മ്യാൻമറിൽ രക്ഷാപ്രവർത്തനം തുടരുന്നു
മാരകമായ ഭൂകമ്പത്തിനുശേഷം മണ്ടാലെയിലും മ്യാൻമറിലെ മറ്റ് പ്രദേശങ്ങളിലും രക്ഷാപ്രവർത്തനങ്ങൾ തുടർന്നു. എന്നാൽ ദുഷ്കരമായ സാഹചര്യങ്ങളിൽ അവശിഷ്ടങ്ങൾക്കിടയിൽ ജീവനുള്ളവരെ കണ്ടെത്താമെന്ന പ്രതീക്ഷ മങ്ങുകയാണ്.
താപനില 40 ഡിഗ്രി സെൽഷ്യസ് (104 ഫാരൻഹീറ്റ്) എത്തുമെന്ന് പ്രതീക്ഷിക്കുന്നു. ചില നിവാസികൾ മൂന്നാം രാത്രിയും തുറസായ സ്ഥലത്ത് ഉറങ്ങി. വാരാന്ത്യത്തിൽ 1.7 ദശലക്ഷത്തിലധികം ആളുകളുള്ള മധ്യ മ്യാൻമർ നഗരത്തെ പിടിച്ചുകുലുക്കിയ തുടർചലനങ്ങൾ തുടർന്നു.
കഠിനമായ ചൂട് രക്ഷാപ്രവർത്തകരെ ക്ഷീണിപ്പിച്ചിട്ടുണ്ടെന്നും മൃതദേഹങ്ങൾ അഴുകുന്നത് ത്വരിതപ്പെടുത്തിയെന്നും ഇത് തിരിച്ചറിയൽ ബുദ്ധിമുട്ടാക്കുമെന്നും വാർത്താ ഏജൻസി എഎഫ്പി റിപ്പോർട്ട് ചെയ്തു.
മ്യാൻമറിലെ രണ്ടാമത്തെ വലിയ നഗരത്തിലെ തകർന്നുവീണ ഒരു അപ്പാർട്ട്മെന്റ് ബ്ലോക്കിൽ ഞായറാഴ്ച വൈകുന്നേരം ഒരു നിരാശാജനകമായ രംഗം അരങ്ങേറി. 55 മണിക്കൂറിലധികം അവശിഷ്ടങ്ങൾക്ക് ഇടയിൽ കുടുങ്ങിയ ഗർഭിണിയായ സ്ത്രീയുടെ ജീവൻ രക്ഷിച്ചതായി രക്ഷാപ്രവർത്തകർ കരുതി. രക്ഷപ്പെടുത്താൻ കാൽ മുറിച്ചുമാറ്റി, പക്ഷേ പുറത്തെടുത്ത ശേഷം ആ സ്ത്രീ മരിച്ചതായി ഉറപ്പിച്ചു.
ഇസ്ലാമിക നോമ്പ് മാസമായ റമദാനിലെ ഈദുൽ ഫിത്തറിൻ്റെ പ്രാർത്ഥനയ്ക്കായി തിങ്കളാഴ്ച രാവിലെ നഗരത്തിലെ ഒരു തകർന്ന പള്ളിക്ക് സമീപം മുസ്ലീംങ്ങൾ ഒത്തുകൂടി. നൂറുകണക്കിന് ഇരകളുടെ സംസ്കാര ചടങ്ങുകളും തുടർന്ന് നടന്നു.
വെള്ളിയാഴ്ച ഉച്ചകഴിഞ്ഞ് മണ്ഡലക്ക് സമീപം 7.7 തീവ്രത രേഖപ്പെടുത്തിയ ഭൂകമ്പം ഉണ്ടായി. തുടർന്ന് മിനിറ്റുകൾക്ക് ശേഷം 6.7 തീവ്രത രേഖപ്പെടുത്തിയ തുടർചലനവും ഉണ്ടായി.
ഇരകളെ സഹായിക്കുന്നതിനായി 100 മില്യൺ ഡോളറിലധികം ധനസഹായം ആവശ്യപ്പെട്ട് ഇൻ്റെർനാഷണൽ ഫെഡറേഷൻ ഓഫ് റെഡ് ക്രോസ് ആൻഡ് റെഡ് ക്രസന്റ് സൊസൈറ്റികൾ ഞായറാഴ്ച അടിയന്തര അഭ്യർത്ഥന നടത്തി.
വർദ്ധിച്ചുവരുന്ന താപനിലയും ആസന്നമായ മൺസൂൺ കാലവും “ദ്വിതീയ പ്രതിസന്ധികളുടെ” അപകടസാധ്യത വർദ്ധിപ്പിക്കുന്നതിനാൽ ആവശ്യങ്ങൾ മണിക്കൂറിൽ വർദ്ധിച്ചു കൊണ്ടിരിക്കുകയാണെന്ന് ലോകത്തിലെ ഏറ്റവും വലിയ മാനുഷിക ശൃംഖല പറഞ്ഞു.
50 ദശലക്ഷത്തിലധികം ജനങ്ങളുള്ള തെക്കുകിഴക്കൻ ഏഷ്യൻ രാജ്യം നേരിടുന്ന വെല്ലുവിളികൾ ഭൂകമ്പത്തിന് മുമ്പുതന്നെ വളരെ വലുതായിരുന്നു. 2021ൽ സൈനിക അട്ടിമറിയെ തുടർന്ന് ആരംഭിച്ച നാല് വർഷത്തെ ആഭ്യന്തര യുദ്ധത്തിൽ മ്യാൻമർ തകർന്നു.
ഭൂകമ്പത്തിന് ശേഷവും ഇടയ്ക്കിടെ ഏറ്റുമുട്ടലുകൾ നടന്നതായി റിപ്പോർട്ടുകൾ പുറത്തു വന്നിട്ടുണ്ട്. ഭൂകമ്പം ഉണ്ടായതിന് തൊട്ടുപിന്നാലെ വ്യോമാക്രമണത്തിൽ തങ്ങളുടെ ഏഴ് പോരാളികൾ കൊല്ലപ്പെട്ടതായി ഒരു വിമത സംഘം ഞായറാഴ്ച എഎഫ്പിയോട് പറഞ്ഞു.
വെള്ളിയാഴ്ചത്തെ ഭൂകമ്പത്തിന് മുമ്പ് രൂക്ഷമായ ആഭ്യന്തരയുദ്ധം മൂലം ഏകദേശം 3.5 ദശലക്ഷം ആളുകൾ കുടിയിറക്കപ്പെട്ടു. പലരും പട്ടിണിയുടെ ഭീഷണിയിലായിരുന്നു.
