മുന് കരസേന മേധാവി ജനറല് എം.എം. നരവനെയുടെ പുസ്തകത്തിലെ ചൈനീസ് അതിര്ത്തിയിലെ സംഭവങ്ങളെക്കുറിച്ചുള്ള ഭാഗം ലോക്സഭയില് പരാമര്ശിച്ചതോടെ സഭയില് ഭരണപക്ഷ–പ്രതിപക്ഷ ബഹളം ശക്തまりച്ചു. ഇതോടെ സഭാ നടപടികള് തുടർച്ചയായി തടസ്സപ്പെട്ടു.
ഉച്ചയ്ക്കുശേഷം സഭ വീണ്ടും ആരംഭിച്ചപ്പോഴും രാഹുല് ഗാന്ധി വിഷയം ഉയര്ത്താന് ശ്രമിച്ചു. സ്പീക്കര് അനുമതി നിഷേധിച്ചതിനെ തുടര്ന്ന് പ്രതിപക്ഷ അംഗങ്ങള് നടുത്തളത്തില് ഇറങ്ങി പ്രതിഷേധിക്കുകയും പേപ്പറുകള് വലിച്ചെറിയുകയും ചെയ്തു. തുടര്ന്ന് ഹൈബി ഈഡന്, ഡീന് കുര്യാക്കോസ് ഉള്പ്പെടെ എട്ട് എംപിമാരെ സഭാ കാലയളവ് പൂര്ത്തിയാകുന്നതുവരെ സസ്പെന്ഡ് ചെയ്തു. പിന്നീട് സഭ ഇന്നത്തേക്ക് പിരിഞ്ഞു.
കേന്ദ്ര ബജറ്റ് അവതരിപ്പിച്ചതിന് പിന്നാലെയായാണ് ലോക്സഭയില് പ്രതിപക്ഷ നേതാവ് രാഹുല് ഗാന്ധി സര്ക്കാരിനെതിരെ ശക്തമായ വിമര്ശനം ഉയര്ത്തിയത്. മുന് കരസേനാ മേധാവി ജനറല് മനോജ് മുകുന്ദ് നരവനെ എഴുതിയ ഓര്മക്കുറിപ്പില്നിന്ന് രാഹുല് സഭയില് വായിച്ചതോടെ ഭരണപക്ഷം ശക്തമായി പ്രതിഷേധിച്ചു. മന്ത്രിമാരടക്കം ബിജെപി നേതാക്കള് ഒന്നിച്ചാണ് രാഹുലിന്റെ പ്രസംഗം തടയാന് രംഗത്തെത്തിയത്.
പ്രതിരോധ മന്ത്രി രാജ്നാഥ് സിംഗും രാഹുല് ഗാന്ധിയും തമ്മില് സഭാതളത്തില് വാക്കേറ്റം ഉണ്ടായപ്പോള് ആഭ്യന്തര മന്ത്രി അമിത് ഷായും ഇടപെട്ടു. ‘ഫോര് സ്റ്റാര്സ് ഓഫ് ഡെസ്റ്റിനി’ എന്ന പേരിലുള്ള, ഇതുവരെ പ്രസിദ്ധീകരിക്കാന് അനുമതി ലഭിക്കാത്ത നരവനെയുടെ പുസ്തകത്തിലെ ചില പരാമര്ശങ്ങളാണ് ഭരണപക്ഷത്തെ ആശങ്കപ്പെടുത്തുന്നതെന്നാണ് പ്രതിപക്ഷത്തിന്റെ ആരോപണം.
2020 മേയ് 5ന് കിഴക്കന് ലഡാക്കിലെ പാങ്ഗോങ് തടാക പ്രദേശത്ത് ഇന്ത്യ–ചൈന സൈന്യങ്ങള് തമ്മില് ഉണ്ടായ ഏറ്റുമുട്ടലിനെക്കുറിച്ചുള്ള വിവരങ്ങളാണ് പുസ്തകത്തിലുണ്ടെന്ന് പറയുന്നു. പുറത്തിറങ്ങാത്ത പുസ്തകം സഭയില് വായിക്കാന് അനുവദിക്കാനാവില്ലെന്ന നിലപാടിലാണ് സ്പീക്കര് ഓം ബിര്ല. എന്നാല് പുസ്തകം പുറത്തിറങ്ങാത്തത് മോദി സര്ക്കാര് അനുമതി നിഷേധിച്ചതിനാലാണെന്ന് രാഹുല് ഗാന്ധി സഭയില് ആരോപിച്ചു.
