മനുഷ്യ ചരിത്രത്തിലെ ഏറ്റവും ഭീകരമായ പ്രകൃതി ദുരന്തങ്ങളിലൊന്നാണ് 2026 ഓഗസ്റ്റ് 26-ന് നേപ്പാളും ടിബറ്റും അതിർത്തി പ്രദേശങ്ങളും അനുഭവിച്ചറിഞ്ഞത്. ആഗോള താപനത്തിന്റെ ഭവിഷ്യത്തുകളെക്കുറിച്ച് വർഷങ്ങളായി ശാസ്ത്രജ്ഞർ മുന്നറിയിപ്പ് നൽകുന്നുണ്ടെങ്കിലും, ഹിമാനികൾ ഉരുകി ഉണ്ടായ ഈ മഹാപ്രളയം ലോകം വരാനിരിക്കുന്ന വലിയ വിപത്തുകളുടെ ഒരു തുടക്കം മാത്രമാണെന്ന് വിദഗ്ധർ ചൂണ്ടിക്കാണിക്കുന്നു.
ത്രിഭുവൻ സർവകലാശാലയിലെ ജിയോളജി വിഭാഗം മുൻ മേധാവിയും നേപ്പാൾ സെന്റർ ഫോർ ഡിസാസ്റ്റർ മാനേജ്മെന്റിന്റെ പ്രസിഡന്റുമായ പ്രൊഫസർ ബിഷാൽ നാഥ് ഉപ്രേതി ഒരു മാധ്യമത്തിന് നൽകിയ അഭിമുഖത്തിലാണ് ഞെട്ടിക്കുന്ന വിവരങ്ങൾ വെളിപ്പെടുത്തിയത്.
ദുരന്തത്തിന് പിന്നിലെ കാരണം
നേപ്പാൾ- ടിബറ്റ് അതിർത്തിയിൽ 7,234 മീറ്റർ ഉയരത്തിൽ സ്ഥിതി ചെയ്യുന്ന കൂറ്റൻ ലാങ്ടാങ് ലിരുങ് പർവ്വതനിരകളിൽ നിന്നാണ് ദുരന്തത്തിന്റെ തുടക്കം. കിലോമീറ്ററിലധികം ഉയരത്തിൽ നിന്ന് പാറക്കെട്ടുകളും മഞ്ഞും അടങ്ങിയ ഹിമാനിയുടെ ഒരു വലിയ ഭാഗം പെട്ടെന്ന് താഴേക്ക് പതിക്കുകയായിരുന്നു. അതീവ വേഗതയിൽ കുതിച്ചുപാഞ്ഞ അവശിഷ്ടങ്ങൾ നദിയുടെ ഒഴുക്ക് തടസ്സപ്പെടുത്തി.
തുടക്കത്തിൽ ഇതൊരു ഹിമാനി തടാകം പൊട്ടിയുണ്ടായ വെള്ളപ്പൊക്കമാണെന്നാണ് കരുതിയതെങ്കിലും, പിന്നീട് ഇത് മഞ്ഞുപാളികൾ പതിച്ചതുമൂലമുണ്ടായ ‘ഇംപാക്ട് ഭൂകമ്പം’ (Impact earthquake) ആണെന്ന് വ്യക്തമായി. റിക്ടർ സ്കെയിലിൽ 5.2 തീവ്രത രേഖപ്പെടുത്തിയ ഈ പ്രകമ്പനം സൃഷ്ടിച്ച വേഗതയിൽ, വെറും 8-10 മിനിറ്റുകൾ കൊണ്ടാണ് മഞ്ഞും പാറകളും നേപ്പാൾ അതിർത്തിയിലേക്ക് കുതിച്ചെത്തിയത്.
മണിക്കൂറിൽ ശരാശരി 160 കിലോമീറ്റർ വേഗതയിൽ, ഏകദേശം 20 ദശലക്ഷം ഘനലിറ്റർ വെള്ളവും ചെളിയും പാറകളും കൂറ്റൻ മരങ്ങളുമായിരുന്നു കുതിച്ചെത്തിയത്. മുന്നറിയിപ്പുകൾ നൽകാൻ പോലും സമയം നല്കാതെ സുനാമിയെ വെല്ലുന്ന വേഗതയിലാണ് പ്രകൃതിയുടെ ഈ കോപം ആഞ്ഞടിച്ചത്.
തലയ്ക്കുമുകളിൽ തൂങ്ങിക്കിടക്കുന്ന ഭീഷണി
ആഗോളതാപനം മൂലം താപനില വർദ്ധിക്കുന്നതാണ് ഹിമാനികൾ അടർന്നുവീഴാൻ പ്രധാന കാരണം. കൊടുംചൂടിൽ ഹിമാനികൾ ഉരുകി വലിയ ഗ്ലേഷ്യൽ തടാകങ്ങൾ രൂപപ്പെടുകയാണ്. കോശി, ഗന്ധകി, കർണാലി നദീതടങ്ങളിലായി ഉയർന്ന അപകടസാധ്യതയുള്ള 46 ഹിമാനി തടാകങ്ങളാണ് മേഖലയിലുള്ളത്. ഇതിൽ 21 എണ്ണം നേപ്പാളിലും 25 എണ്ണം അതിർത്തിക്കപ്പുറം ടിബറ്റിലുമാണ് സ്ഥിതി ചെയ്യുന്നത്. എതുനിമിഷവും പൊട്ടിത്തെറിക്കാവുന്ന നിലയിലാണ് ഈ തടാകങ്ങൾ നിലവിലുള്ളത്.
നഷ്ടക്കണക്കുകളും വിപത്തുകളും
2015-ലെ നേപ്പാൾ ഭൂകമ്പത്തിന് സമാനമായ വലിയ ദുരന്തമാണ് ഇത്തവണ ഉണ്ടായിരിക്കുന്നത്. അയ്യായിരത്തിലധികം ആളുകളാണ് പ്രളയത്തിൽ മരണപ്പെടുകയോ കാണാതാവുകയോ ചെയ്തത്. ഏകദേശം 5 ബില്യൺ ഡോളറിന്റെ നാശനഷ്ടമാണ് നേപ്പാൾ സർക്കാരിന്റെ പ്രാഥമിക കണക്കുകൾ സൂചിപ്പിക്കുന്നത്. മേഖലയിലെ ജലവൈദ്യുത പദ്ധതികളും അടിസ്ഥാന സൗകര്യങ്ങളും പൂർണ്ണമായി തകർന്നു.
ഹിമാലയൻ മേഖലയിലെ താപനില വർദ്ധിക്കുന്നത് പെർമാഫ്രോസ്റ്റിന്റെ (തണുത്തുറഞ്ഞ മണ്ണും പാറയും) ഉരുകലിന് കാരണമാകുന്നുണ്ട്. ഇത് വലിയ തോതിൽ കാർബൺ ഡൈ ഓക്സൈഡും മീഥേനും പുറത്തുവിട്ട് ആഗോളതാപനം കൂടുതൽ തീവ്രമാക്കും. ഈ അവസ്ഥ തുടർന്നാൽ നൂറ്റാണ്ടിന്റെ അവസാനത്തോടെ ഹിമാലയത്തിൽ ഹിമാനികൾ തന്നെ ഇല്ലാതാകുന്ന ഭീകര സാഹചര്യം ഉണ്ടായേക്കാം. ഇത് ഗംഗ, സത്ലജ്, ബ്രഹ്മപുത്ര തുടങ്ങിയ നദികളെ ആശ്രയിക്കുന്ന ദക്ഷിണേഷ്യയിലെ കോടിക്കണക്കിന് ജനങ്ങളെ ഗുരുതരമായി ബാധിക്കും.
മുന്നറിയിപ്പും കൂട്ടായ്മയും മാത്രമാണ് പോംവഴി
ദുരന്തങ്ങൾ പൂർണ്ണമായി തടയാൻ കഴിയില്ലെങ്കിലും, സീസ്മോമീറ്ററുകളും ഉപഗ്രഹങ്ങളും ഉപയോഗിച്ച് മുൻകൂട്ടി മുന്നറിയിപ്പ് നൽകുന്ന സംവിധാനങ്ങൾ ശക്തമാക്കുക മാത്രമാണ് ജീവൻ രക്ഷിക്കാനുള്ള ഏക മാർഗം. ഇന്ത്യ, നേപ്പാൾ, ചൈന തുടങ്ങിയ രാജ്യങ്ങൾ പരസ്പരം സഹകരിച്ച് സംയുക്ത മുന്നറിയിപ്പ് സംവിധാനങ്ങൾ ഒരുക്കേണ്ടത് അത്യാവശ്യമാണെന്നും വിദഗ്ധർ ഓർമ്മിപ്പിക്കുന്നു. ആഗോളതാപനത്തിന് നേരിട്ട് വലിയ പങ്കില്ലെങ്കിലും അതിന്റെ ഭാരം മുഴുവൻ പേറേണ്ടി വരുന്നത് ഹിമാലയൻ പർവ്വതനിരകളിലെ സാധാരണക്കാരായ ജനങ്ങളാണെന്ന യാഥാർത്ഥ്യം ലോകം തിരിച്ചറിയേണ്ടിയിരിക്കുന്നു.
