ലഖ്‌നൗ: 2027ലെ ഉത്തർപ്രദേശ് നിയമസഭാ തെരഞ്ഞെടുപ്പിന് മുന്നോടിയായി പുതിയ രാഷ്ട്രീയ സഖ്യം പ്രഖ്യാപിച്ച് എഐഎംഐഎം അധ്യക്ഷൻ അസദുദ്ദീൻ ഒവൈസിയും ആസാദ് സമാജ് പാർട്ടി (കാൻഷിറാം) അധ്യക്ഷൻ ചന്ദ്രശേഖർ ആസാദും. പുതുതായി രൂപീകരിച്ച സാമാജിക് പരിവർത്തൻ മോർച്ചയുടെ മുഖ്യമന്ത്രി സ്ഥാനാർഥി ചന്ദ്രശേഖർ ആസാദായിരിക്കുമെന്ന് ഒവൈസി പ്രഖ്യാപിച്ചു.
ലഖ്‌നൗവിൽ ചന്ദ്രശേഖർ ആസാദിനൊപ്പം നടത്തിയ വാർത്താസമ്മേളനത്തിലാണ് ഒവൈസി സഖ്യത്തിന്റെ പ്രഖ്യാപനം നടത്തിയത്. ഉത്തർപ്രദേശിൽ ബിജെപി തുടർച്ചയായി മൂന്നാം തവണയും അധികാരത്തിലെത്തുന്നത് തടയുകയാണ് പുതിയ സഖ്യത്തിന്റെ പ്രധാന ലക്ഷ്യമെന്നും അദ്ദേഹം വ്യക്തമാക്കി.
ബിജെപിക്കെതിരെ ശക്തമായ ബദലെന്ന് ഒവൈസി
2027ലെ തെരഞ്ഞെടുപ്പിൽ ബിജെപിക്ക് ശക്തമായ രാഷ്ട്രീയ ബദലായി സാമാജിക് പരിവർത്തൻ മോർച്ച മാറുമെന്ന് ഒവൈസി പ്രത്യാശ പ്രകടിപ്പിച്ചു.
‘ഉത്തർപ്രദേശിൽ ബിജെപി മൂന്നാം തവണയും അധികാരത്തിലെത്തുന്നത് തടയാൻ കഴിയുന്ന ശക്തമായ ബദലായിരിക്കും ഈ സഖ്യമെന്ന് ആത്മവിശ്വാസത്തോടെ പറയാനാകും,’ ഒവൈസി പറഞ്ഞു.
ചന്ദ്രശേഖർ ആസാദ് മോർച്ചയുടെ മുഖ്യ പ്രസിഡന്റായും ഉത്തർപ്രദേശിലെ മുഖ്യമന്ത്രി സ്ഥാനാർഥിയായും പ്രവർത്തിക്കുമെന്നും അദ്ദേഹം പ്രഖ്യാപിച്ചു. സഖ്യത്തിന്റെ വിജയം സംസ്ഥാനത്തെ ജനങ്ങളുടെ വിജയമായിരിക്കുമെന്നും ഇരു പാർട്ടികളും ഇതിനായി ഒറ്റക്കെട്ടായി പ്രവർത്തിക്കുമെന്നും ഒവൈസി കൂട്ടിച്ചേർത്തു.
ദളിത്-പിന്നാക്ക വിഭാഗങ്ങളുടെ പ്രശ്നങ്ങൾക്ക് മുൻഗണന
ദളിതുകൾ, പിന്നാക്ക വിഭാഗങ്ങൾ, അടിച്ചമർത്തപ്പെട്ടവർ, പാർശ്വവൽക്കരിക്കപ്പെട്ടവർ തുടങ്ങിയവരുടെ പ്രശ്നങ്ങൾക്കായിരിക്കും പുതിയ സഖ്യം മുൻഗണന നൽകുകയെന്ന് ഒവൈസി പറഞ്ഞു. ജാതി വ്യത്യാസമില്ലാതെ സമൂഹത്തിലെ അവഗണിക്കപ്പെട്ട വിഭാഗങ്ങളുടെ അവകാശങ്ങൾക്കായി പോരാടുമെന്നും അദ്ദേഹം വ്യക്തമാക്കി.
ഇതുവരെ രാഷ്ട്രീയ പാർട്ടികൾ ഇത്തരം വിഭാഗങ്ങളെ വോട്ടുബാങ്കുകളായി മാത്രമാണ് പരിഗണിച്ചിരുന്നതെന്നും ഒവൈസി വിമർശിച്ചു. സംസ്ഥാനത്തെ വിദ്യാഭ്യാസ മേഖലയിലെ പ്രതിസന്ധി, യുവാക്കൾക്കിടയിലെ തൊഴിലില്ലായ്മ, കർഷകർ നേരിടുന്ന പ്രശ്നങ്ങൾ എന്നിവയും സഖ്യം പ്രധാന രാഷ്ട്രീയ വിഷയങ്ങളാക്കും.
നവംബർ 26ന് പൊതുസമ്മേളനം
നവംബർ 26ന് സംഘടിപ്പിക്കുന്ന പൊതുസമ്മേളനത്തിൽ ജനങ്ങൾ വലിയ തോതിൽ പങ്കെടുക്കണമെന്ന് ഒവൈസി അഭ്യർഥിച്ചു. ഉത്തർപ്രദേശിൽ സാമൂഹിക മാറ്റത്തിനായുള്ള പുതിയ രാഷ്ട്രീയ മുന്നേറ്റത്തിന്റെ തുടക്കമായിരിക്കും ഈ സമ്മേളനമെന്നും അദ്ദേഹം പറഞ്ഞു.
ബിജെപിയും മറ്റ് രാഷ്ട്രീയ പാർട്ടികളും പഴയകാല രാഷ്ട്രീയത്തിന്റെ പ്രതിനിധികളാണെന്നും പുതിയ സഖ്യം ഭാവിയെ മുന്നിൽക്കണ്ടുള്ള രാഷ്ട്രീയത്തിനാണ് പ്രാധാന്യം നൽകുന്നതെന്നും ഒവൈസി വ്യക്തമാക്കി.
‘ഭാവിക്കുവേണ്ടിയാണ് ഞങ്ങൾ രാഷ്ട്രീയം ചെയ്യുന്നത്. ഉത്തർപ്രദേശിന്റെ മികച്ച ഭാവിക്കായി ജനങ്ങൾ ചന്ദ്രശേഖർ ആസാദിനൊപ്പം കൈകോർക്കുമെന്നാണ് പ്രതീക്ഷിക്കുന്നത്,’ അദ്ദേഹം പറഞ്ഞു.
2027ലെ നിയമസഭാ തെരഞ്ഞെടുപ്പിന് മുന്നോടിയായി രൂപംകൊണ്ട പുതിയ സഖ്യം സംസ്ഥാനത്തെ രാഷ്ട്രീയ സമവാക്യങ്ങളിൽ എന്ത് മാറ്റമുണ്ടാക്കുമെന്നാണ് ഇനി ഉറ്റുനോക്കുന്നത്.
