മുൻ രാജ്യസഭാ എംപിയും ശിവസേന (ഉദ്ധവ് ബാലാസാഹേബ് താക്കറെ) നേതാവുമായ പ്രിയങ്ക ചതുർവേദി, തനിക്കെതിരെ വർഷങ്ങളായി പ്രചരിക്കുന്ന അഭ്യൂഹങ്ങൾക്കും രാഷ്ട്രീയ വിവാദങ്ങൾക്കും മറുപടിയുമായി. ഒരു പോഡ്കാസ്റ്റ് അഭിമുഖത്തിലാണ് രാജ്യസഭാ സീറ്റ്, ബിജെപിയിലേക്കുള്ള പ്രവേശന അഭ്യൂഹങ്ങൾ, ശിവസേനയിലെ പിളർപ്പ്, കോൺഗ്രസ് വിട്ടതിന്റെ കാരണം തുടങ്ങിയ വിഷയങ്ങളിൽ അവർ വിശദമായി പ്രതികരിച്ചത്.
രാജ്യസഭാ സീറ്റ് ലഭിക്കാൻ കോടിക്കണക്കിന് രൂപ നൽകിയെന്ന പ്രചാരണവും ബിജെപിയുമായി രഹസ്യ ചർച്ച നടത്തിയെന്ന ആരോപണവും അടിസ്ഥാനരഹിതമാണെന്ന് പ്രിയങ്ക വ്യക്തമാക്കി. മഹാരാഷ്ട്രയിൽ താൻ ഒരു “പുറത്തുകാരി”യാണെന്ന വിമർശനവും അവർ തള്ളി. മുംബൈയിലാണ് തന്റെ കുടുംബം ജീവിതവും കരിയറും കെട്ടിപ്പടുത്തതെന്നും, അതിനാൽ തന്നെ മുംബൈക്കാരിയെന്ന തന്റെ വ്യക്തിത്വം ചോദ്യം ചെയ്യുന്നത് വേദനിപ്പിക്കുന്ന കാര്യമാണെന്നും അവർ പറഞ്ഞു.
നീറ്റ് വിവാദത്തിലും സർക്കാരിനെ വിമർശിച്ച് പ്രിയങ്ക
നീറ്റ് ചോദ്യപേപ്പർ ചോർച്ച വിവാദത്തിൽ പ്രതിഷേധിച്ച വിദ്യാർഥികൾക്കെതിരെ പോലീസ് സ്വീകരിച്ച നടപടികളെ പ്രിയങ്ക രൂക്ഷമായി വിമർശിച്ചു. ജന്തർ മന്തറിൽ പ്രതിഷേധിച്ച വിദ്യാർഥികൾക്കെതിരായ പോലീസ് ഇടപെടൽ അംഗീകരിക്കാനാകില്ലെന്നും വിദ്യാഭ്യാസ മേഖലയിലെ അഴിമതിക്ക് രാഷ്ട്രീയ സംരക്ഷണമുണ്ടെന്നുമാണ് അവരുടെ ആരോപണം.
വനിതാ സംവരണ ബിൽ, മണ്ഡല പുനർനിർണയം (ഡീലിമിറ്റേഷൻ) തുടങ്ങിയ വിഷയങ്ങളിലും അവർ അഭിപ്രായം രേഖപ്പെടുത്തി.
ശിവസേന പിളർപ്പിനെക്കുറിച്ചുള്ള പ്രതികരണം
2022-ൽ ഏകനാഥ് ഷിൻഡെയുടെ നേതൃത്വത്തിൽ ശിവസേനയിൽ ഉണ്ടായ പിളർപ്പിനെക്കുറിച്ചും പ്രിയങ്ക പ്രതികരിച്ചു. കോവിഡ് കാലത്ത് പാർട്ടി നേതൃത്വവും എംഎൽഎമാരും തമ്മിലുള്ള നേരിട്ടുള്ള ആശയവിനിമയം കുറഞ്ഞതും, ഉദ്ധവ് താക്കറെയുടെ ആരോഗ്യപ്രശ്നങ്ങളും പിളർപ്പിന് വഴിയൊരുക്കിയ ഘടകങ്ങളായിരുന്നുവെന്ന് അവർ പറഞ്ഞു.
രാജ്യസഭാ എംപിയായിരുന്ന സമയത്ത് ഡൽഹിയിലെ ചുമതലകളിൽ ശ്രദ്ധ കേന്ദ്രീകരിച്ചതിനാൽ മഹാരാഷ്ട്രയിലെ ആഭ്യന്തര രാഷ്ട്രീയത്തിൽ നിന്ന് താൻ അകന്നുനിന്നിരുന്നുവെന്നും, പിളർപ്പ് സംഭവിക്കുമെന്ന് മുൻകൂട്ടി മനസ്സിലാക്കിയിരുന്നില്ലെന്നും അവർ വ്യക്തമാക്കി.
ഏകനാഥ് ഷിൻഡെയും അനുയായികളും സൂറത്തിലേക്ക് പോയ സംഭവം നിർണായക വഴിത്തിരിവായിരുന്നുവെന്നും, അവർ സൂറത്ത് തിരഞ്ഞെടുത്തത് തന്നെ കാര്യങ്ങൾ എത്രത്തോളം മുന്നോട്ടുപോയിരുന്നുവെന്നതിന്റെ സൂചനയായിരുന്നുവെന്നും പ്രിയങ്ക അഭിപ്രായപ്പെട്ടു.
കോൺഗ്രസ് വിട്ടത് ആത്മാഭിമാനത്തിന്റെ പേരിൽ
2019-ൽ കോൺഗ്രസ് വിട്ടത് വ്യക്തിപരമായ രാഷ്ട്രീയ മോഹം കൊണ്ടല്ലെന്നും, ആത്മാഭിമാനവുമായി ബന്ധപ്പെട്ട വിഷയങ്ങളാണ് തീരുമാനത്തിന് പിന്നിലെന്നും പ്രിയങ്ക ചതുർവേദി പറഞ്ഞു. അന്നത്തെ സാഹചര്യത്തിൽ രാഹുൽ ഗാന്ധിയും പ്രിയങ്ക ഗാന്ധിയും നടത്തിയ സംഭാഷണങ്ങളെക്കുറിച്ചും അവർ പരാമർശിച്ചു.
പ്രതിപക്ഷ രാഷ്ട്രീയത്തിലെ വെല്ലുവിളികൾ
ഉദ്ധവ് താക്കറെയെയും ആദിത്യ താക്കറെയെയും പ്രശംസിച്ച പ്രിയങ്ക, നിലവിലെ രാഷ്ട്രീയത്തിൽ തത്വാധിഷ്ഠിതമായ രാഷ്ട്രീയം കുറയുകയാണെന്ന് അഭിപ്രായപ്പെട്ടു. വിവിധ പാർട്ടികളിലേക്കുള്ള നേതാക്കളുടെ തുടർച്ചയായ കൂറുമാറ്റങ്ങളെ അവർ വിമർശിക്കുകയും അതിനെ രാഷ്ട്രീയത്തിന്റെ “വെളുപ്പിക്കൽ” എന്നാണ് വിശേഷിപ്പിക്കുകയും ചെയ്തു.
പാർലമെന്റിലെ പ്രവർത്തനരീതി, മൂന്ന് മിനിറ്റ് പ്രസംഗപരിധി, പാർട്ടി വിപ്പ് സംവിധാനം, ഓൺലൈൻ ട്രോളിംഗ്, രാഷ്ട്രീയ ജീവിതത്തിന് മുമ്പുള്ള മാധ്യമ പ്രവർത്തനാനുഭവങ്ങൾ തുടങ്ങിയ വിഷയങ്ങളും അഭിമുഖത്തിൽ പ്രിയങ്ക ചതുർവേദി പങ്കുവച്ചു.
