കുട്ടികൾക്ക് എതിരായ ഓൺലൈൻ ലൈംഗിക അതിക്രമങ്ങൾ വർദ്ധിക്കുന്നു; ഞെട്ടിക്കുന്ന കണക്കുകളുമായി യുണിസെഫ് റിപ്പോർട്ട്

ലോകമെമ്പാടുമുള്ള കുട്ടികൾ ഡിജിറ്റൽ പ്ലാറ്റ്‌ഫോമുകളിൽ കടുത്ത ലൈംഗിക ചൂഷണത്തിനും അതിക്രമങ്ങൾക്കും ഇരയാകുന്നുവെന്ന് യൂണിസെഫിന്റെ (UNICEF) പുതിയ കണ്ടെത്തൽ. 21 രാജ്യങ്ങളിലായി ഓരോ വർഷവും 20 ദശലക്ഷത്തിലധികം കുട്ടികൾ ഓൺലൈൻ ലൈംഗിക ദുരുപയോഗത്തിന് ഇരയാകുന്നുണ്ടെന്നാണ് യൂണിസെഫ് പുറത്തുവിട്ട റിപ്പോർട്ടിൽ വ്യക്തമാക്കുന്നത്.

ആഫ്രിക്ക, ഏഷ്യ, ലാറ്റിൻ അമേരിക്ക, കരീബിയൻ, കിഴക്കൻ യൂറോപ്പ് എന്നിവിടങ്ങളിലെ 12 നും 17 നും ഇടയിൽ പ്രായമുള്ള കുട്ടികളിൽ അഞ്ചിൽ ഒരാളിൽ കൂടുതൽ പേരും ഇത്തരം ഡിജിറ്റൽ ആക്രമണങ്ങൾ നേരിടുന്നുണ്ട്. പകുതിയിലധികം പീഡന കേസുകൾക്കും വഴിയൊരുക്കുന്നത് സോഷ്യൽ മീഡിയ പ്ലാറ്റ്‌ഫോമുകളാണെന്നും റിപ്പോർട്ട് മുന്നറിയിപ്പ് നൽകുന്നു.

റിപ്പോർട്ടിലെ കണ്ടെത്തലുകൾ

• പഠനവിധേയമാക്കിയ കാലയളവിൽ 15 ദശലക്ഷത്തിലധികം കുട്ടികൾ അനാവശ്യമായ ലൈംഗിക ഉള്ളടക്കങ്ങൾക്ക് ഇരയായി.
• ഒമ്പത് ദശലക്ഷത്തോളം കുട്ടികളോട് അവരുടെ ഇഷ്ടത്തിന് വിരുദ്ധമായി ലൈംഗിക സംഭാഷണങ്ങളിൽ ഏർപ്പെടാനോ ചിത്രങ്ങൾ പങ്കിടാനോ ആവശ്യപ്പെട്ടു.
• നാല് ദശലക്ഷത്തോളം കുട്ടികളുടെ ലൈംഗിക ചിത്രങ്ങൾ അവരുടെ സമ്മതമില്ലാതെ മറ്റുള്ളവരുമായി പങ്കുവെക്കപ്പെട്ടു.
• ഫേസ്ബുക്ക് (50%), വാട്ട്‌സ്ആപ്പ് (29%), ഇൻസ്റ്റാഗ്രാം (24%), സ്‌നാപ്ചാറ്റ് (13%), ടിക് ടോക്ക് (12%) തുടങ്ങിയ ജനപ്രിയ പ്ലാറ്റ്‌ഫോമുകളിലാണ് ഇത്തരം ചൂഷണങ്ങളിൽ ഭൂരിഭാഗവും (60%-ലധികം) നടക്കുന്നത്.

റിപ്പോർട്ട് ചെയ്യപ്പെടാത്ത കുറ്റകൃത്യങ്ങളും മാനസിക ആഘാതവും

ഡിജിറ്റൽ ചൂഷണത്തിന് ഇരയാകുന്ന കുട്ടികളിൽ വലിയൊരു വിഭാഗവും ഈ വിവരങ്ങൾ പുറത്തുപറയാറില്ല. ഇത്തരം സംഭവങ്ങളിൽ ഒരു ശതമാനത്തിൽ താഴെ മാത്രമാണ് അധികാരികൾക്ക് റിപ്പോർട്ട് ചെയ്യപ്പെടുന്നത്. കുട്ടികൾ ചൂഷണം തിരിച്ചറിയാത്തതും, പരാതിപ്പെട്ടാൽ ഉണ്ടാകുന്ന സാമൂഹിക പ്രത്യാഘാതങ്ങളെ ഭയക്കുന്നതുമാണ് ഇതിന് പ്രധാന കാരണം. കൂടാതെ, കുടുംബപരമായ ‘ബഹുമാനം’ പോലുള്ള സാംസ്കാരിക തടസ്സങ്ങളും പല കുട്ടികളെയും നിശബ്ദരാക്കുന്നു.

ഓൺലൈൻ ലൈംഗിക ദുരുപയോഗത്തിന് ഇരയാകുന്ന കുട്ടികളിൽ ആത്മഹത്യാ ചിന്തകളും കടുത്ത ഉത്കണ്ഠയും സ്വയം ഉപദ്രവിക്കാനുള്ള പ്രവണതയും നാലിരട്ടിയോളം കൂടുതലാണെന്നും പഠനം വ്യക്തമാക്കുന്നു.

നടപടികളുമായി സർക്കാരുകളും കമ്പനികളും

കുട്ടികളെ ഓൺലൈനിൽ സുരക്ഷിതരായി നിലനിർത്താൻ സർക്കാരുകളും സാങ്കേതിക കമ്പനികളും കർശന നടപടികൾ സ്വീകരിക്കണമെന്ന് യൂണിസെഫ് ആവശ്യപ്പെട്ടു. കുട്ടികളെ അപകടത്തിലാക്കുന്ന തരത്തിലുള്ള പ്ലാറ്റ്‌ഫോം രൂപകൽപ്പനകൾ മാറ്റണമെന്ന ആവശ്യം ശക്തമാണ്. ഇതിനിടെ, കുട്ടികളുടെ സുരക്ഷ മുൻനിർത്തി പ്രായപരിശോധനയും രക്ഷാകർതൃ നിയന്ത്രണങ്ങളും ഉൾപ്പെടെയുള്ള മാറ്റങ്ങൾ വരുത്താൻ മെറ്റ പോലുള്ള മുൻനിര കമ്പനികൾ തയ്യാറായിട്ടുണ്ട്. എങ്കിലും കുട്ടികളുടെ സുരക്ഷ ഉറപ്പാക്കാൻ കൂടുതൽ ശക്തമായ നിയമനിർമ്മാണങ്ങളും നിരീക്ഷണങ്ങളും ആവശ്യമാണെന്ന് വിദഗ്ധർ ചൂണ്ടിക്കാണിക്കുന്നു.