ജന്തർമന്തറിൽ നടന്ന പ്രതിഷേധത്തിനിടെ വിദ്യാർത്ഥി പ്രക്ഷോഭകന്റെ പിതാവിനെ ആക്രമിച്ച കേസിൽ മുഖ്യപ്രതി സ്വതന്ത്ര ഭരദ്വാജ് പുറത്തുവന്നത് രാഷ്ട്രീയ സ്വാധീനം മൂലമാണെന്ന വെളിപ്പെടുത്തൽ വിവാദമാകുന്നു. തനിക്ക് ജയിൽ ശിക്ഷ ഒഴിവാക്കാൻ ഡൽഹി മന്ത്രി കപിൽ മിശ്ര ഫോൺ വഴി സഹായിച്ചുവെന്ന് പ്രതി അവകാശപ്പെടുന്ന വീഡിയോ പുറത്തുവന്നതിന് പിന്നാലെയാണ് പ്രതിപക്ഷ പാർട്ടികൾ ബിജെപിക്കെതിരെ ശക്തമായ വിമർശനവുമായി രംഗത്തെത്തിയത്.
പ്രതിയുടെ വെളിപ്പെടുത്തലും വിവാദവും
പ്രതിഷേധക്കാരനായ നിഷു ആസാദിന്റെ പിതാവ് സഞ്ജയ് കുമാറിനെ ആക്രമിച്ചതിനെക്കുറിച്ച് സ്വതന്ത്ര ഭരദ്വാജ് സമൂഹമാധ്യമങ്ങളിൽ പങ്കുവെച്ച വീഡിയോയാണ് വലിയ ചർച്ചയായത്. “നിഷുവിന്റെ അച്ഛന്റെ തലയോട്ടി ഞാൻ പൊട്ടിച്ചു. അയാൾക്ക് 60 തുന്നലുകൾ വേണ്ടിവന്നു. പക്ഷേ എന്നെ ജയിലിലടച്ചില്ല. എനിക്ക് ഹനുമാന്റെ അനുഗ്രഹമുണ്ട്. കപിൽ മിശ്ര എന്റെ ജ്യേഷ്ഠനാണ്; അദ്ദേഹം വിളിച്ചതുകൊണ്ടാണ് എന്നെ വിട്ടയച്ചത്.
ചിരാഗ് പാസ്വാനും മോദിജിയും എന്റെ ജ്യേഷ്ഠന്മാരാണ്”- ഭരദ്വാജ് വീഡിയോയിൽ വീമ്പിളക്കുന്നത് കേൾക്കാം. വിവാദമായതോടെ കപിൽ മിശ്രയോടും ചിരാഗ് പാസ്വാനോടും പ്രതികരണം തേടിയെങ്കിലും പി.ടി.ഐ പ്രതികരിച്ചിട്ടില്ല.
രാഹുൽ ഗാന്ധിയും കേജ്രിവാളും രംഗത്ത്
കുറ്റവാളിക്ക് ബിജെപി നേതൃത്വത്തിന്റെ സംരക്ഷണം ലഭിക്കുന്നുണ്ടെന്ന് ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി ആരോപിച്ചു. ഒരു ദളിത് പെൺകുട്ടിയുടെ പിതാവിന്റെ തലയടിച്ച തകർത്ത കുറ്റവാളി എങ്ങനെയാണ് പരസ്യമായി സ്വതന്ത്രനായി വിഹരിക്കുന്നതെന്ന് അദ്ദേഹം എക്സിൽ കുറിച്ചു. പ്രധാനമന്ത്രി നരേന്ദ്ര മോദിയെയും ആഭ്യന്തര മന്ത്രി അമിത് ഷായെയും ടാഗ് ചെയ്തുകൊണ്ടാണ് രാഹുൽ ഗാന്ധിയുടെ വിമർശനം.
പ്രതിയുടെ വീഡിയോ പങ്കുവെച്ച ആം ആദ്മി പാർട്ടി ദേശീയ കൺവീനർ അരവിന്ദ് കെജ്രിവാളും പ്രധാനമന്ത്രിക്കെതിരെ രൂക്ഷമായ ഭാഷയിൽ പ്രതികരിച്ചു. ഇത്തരം കൊള്ളക്കാരെ പരസ്യമായി സംരക്ഷിക്കുന്നതാണോ സർക്കാരിന്റെ രീതിയെന്ന് അദ്ദേഹം ചോദിച്ചു. അമിത് ഷാ രാജി വെക്കണമെന്ന് തൃണമൂൽ കോൺഗ്രസ് എം.പി മഹുവ മൊയ്ത്രയും ആവശ്യപ്പെട്ടു.
ഡൽഹി പൊലീസിന്റെ വിശദീകരണം
സംഭവത്തിൽ വിശദീകരണവുമായി ഡൽഹി പൊലീസ് രംഗത്തെത്തി. ജൂൺ 23-ന് ജന്തർമന്തറിലുണ്ടായ സംഘർഷത്തിനിടെ പ്രതി ധരിച്ചിരുന്ന കഡ (വള) കൊണ്ടാണ് സഞ്ജയ് കുമാറിന് പരിക്കേറ്റതെന്ന് പൊലീസ് എക്സ് പോസ്റ്റിൽ വ്യക്തമാക്കി. ആർ.എം.എൽ ആശുപത്രിയിലെ ഡോക്ടർമാർ പരിക്കുകൾ നിസ്സാരമാണെന്ന് രേഖപ്പെടുത്തിയിട്ടുണ്ട്. തലയോട്ടിക്ക് പരിക്കേറ്റുവെന്നത് തെറ്റായ വിവരമാണെന്നും പൊലീസ് അവകാശപ്പെടുന്നു.
പ്രതികളെ കസ്റ്റഡിയിലെടുത്ത് നിയമപരമായ നടപടിക്രമങ്ങൾ പാലിച്ചിട്ടുണ്ടെന്നും രാഷ്ട്രീയ സമ്മർദ്ദമുണ്ടെന്ന ആരോപണം അടിസ്ഥാനരഹിതമാണെന്നും ഡി.സി.പി അറിയിച്ചു. എന്നാൽ പൊലീസ് വാദങ്ങൾ തള്ളി കോക്രോച്ച് ജനതാ പാർട്ടി (സി.ജെ.പി) ഉൾപ്പെടെയുള്ള സംഘടനകൾ രംഗത്തെത്തിയിട്ടുണ്ട്. കുടുംബത്തിന് നീതി ആവശ്യപ്പെട്ട് വെള്ളിയാഴ്ച പാർലമെന്റ് സ്ട്രീറ്റ് പൊലീസ് സ്റ്റേഷന് മുന്നിൽ പ്രതിഷേധിക്കുമെന്ന് സംഘടന അറിയിച്ചു.
