ഇസ്ലാമാബാദ്: പാകിസ്ഥാനിലെ ഏറ്റവും ജനസംഖ്യയുള്ള പ്രവിശ്യയായ പഞ്ചാബിൽ തീവ്രവാദ വിചാരണകൾ പൂർണ്ണമായും രഹസ്യമായി നടത്താൻ വ്യവസ്ഥ ചെയ്യുന്ന പുതിയ നിയമം പാസാക്കി. ജഡ്ജി, പ്രോസിക്യൂട്ടർ, സാക്ഷികൾ എന്നിവരുടെ പേരുകൾ വെളിപ്പെടുത്താതെ വിചാരണ നടത്താൻ അനുവദിക്കുന്നതാണ് പുതിയ ഭേദഗതി. രാജ്യത്തെ ഏറ്റവും ഗുരുതരമായ കുറ്റങ്ങൾ നേരിടുന്നവരെ, തനിക്കെതിരായ കേസ് ആരാണ് കേട്ടതെന്നോ പ്രോസിക്യൂട്ട് ചെയ്തതെന്നോ സാക്ഷ്യപ്പെടുത്തിയതെന്നോ അറിയാതെ ശിക്ഷിക്കാൻ പുതിയ നിയമം വഴിയൊരുക്കും. പ്രതിപക്ഷത്തിന്റെ ശക്തമായ പ്രതിഷേധം വകവെക്കാതെയാണ് ഓഗസ്റ്റ് 31-ന് പഞ്ചാബ് നിയമസഭയിൽ തീവ്രവാദ വിരുദ്ധ (പഞ്ചാബ് ഭേദഗതി) ബിൽ 2026 പാസാക്കിയത്.
നിയമത്തിലെ പ്രധാന വ്യവസ്ഥകൾ
- വ്യക്തിവിവരങ്ങൾ രഹസ്യം: വിചാരണ നടത്തുന്ന ജഡ്ജി, പ്രോസിക്യൂട്ടർ, പോലീസ് ഉദ്യോഗസ്ഥർ, സാക്ഷികൾ, പ്രതിഭാഗം അഭിഭാഷകർ എന്നിവരുടെ ഐഡന്റിറ്റി ഒരു സാഹചര്യത്തിലും വെളിപ്പെടുത്തില്ല. ഔദ്യോഗിക പദവികൾ മാത്രമാകും ഉപയോഗിക്കുക. കോടതി ഉത്തരവുകളിലും പേരുണ്ടാകില്ല.
- കോഡുകളും വേഷംമാറലും: സാക്ഷികളെ കോഡുകൾ ഉപയോഗിച്ച് മാത്രമാകും തിരിച്ചറിയുക. ജയിലിൽ നിന്നുള്ളതടക്കം വീഡിയോ ലിങ്ക് വഴിയുള്ള വാദം കേൾക്കലുകളിൽ പങ്കെടുക്കുന്നവരുടെ ശബ്ദം മാറ്റുന്ന സാങ്കേതികവിദ്യയും വേഷംമാറലും ഉപയോഗിക്കും.
- രഹസ്യ അധികാരി: ഏത് കേസുകളാണ് ഈ പ്രത്യേക വിഭാഗത്തിൽ ഉൾപ്പെടുത്തേണ്ടതെന്ന് തീരുമാനിക്കാൻ സർക്കാരിന് ഒരു മുതിർന്ന ഉദ്യോഗസ്ഥനെ “നിയുക്ത അധികാരി” ആയി നിയമിക്കാം. ഈ ഉദ്യോഗസ്ഥന്റെ പേരും രഹസ്യമായിരിക്കും.
- സീൽ ചെയ്ത രേഖകൾ: കേസ് ഫയലുകൾ ചീഫ് ജസ്റ്റിസും നിയുക്ത ഉദ്യോഗസ്ഥനും ചേർന്ന് സീൽ ചെയ്ത് സൂക്ഷിക്കും. വിചാരണ രേഖകൾ പരസ്യമാക്കില്ല.
സർക്കാർ ന്യായീകരണവും വിമർശനങ്ങളും
സായുധ സംഘങ്ങളുടെ ആക്രമണങ്ങളും ജഡ്ജിമാർക്കും സാക്ഷികൾക്കുമെതിരെയുള്ള ഭീഷണികളും വർധിച്ച സാഹചര്യത്തിലാണ് സുരക്ഷ ശക്തമാക്കാൻ പുതിയ നിയമം കൊണ്ടുവന്നതെന്നാണ് സർക്കാരിന്റെ വാദം. കൊടും തീവ്രവാദികളെ ലക്ഷ്യമിട്ടു മാത്രമാണ് ഈ നിയമമെന്നും രാഷ്ട്രീയ എതിരാളികൾക്കെതിരെ ഇത് ഉപയോഗിക്കുമെന്നത് വെറും ആശങ്ക മാത്രമാണെന്നും ഭരണപക്ഷ വൃത്തങ്ങൾ അവകാശപ്പെടുന്നു.
എന്നാൽ, നിയമത്തിനെതിരെ പ്രതിപക്ഷ രാഷ്ട്രീയക്കാരും അഭിഭാഷകരും മനുഷ്യാവകാശ സംഘടനകളും രംഗത്തുവന്നിട്ടുണ്ട്. പേര് വെളിപ്പെടുത്താത്ത ഒരു ഉദ്യോഗസ്ഥനിൽ അമിതാധികാരം കേന്ദ്രീകരിക്കുന്ന ഈ നിയമം സർക്കാരിന്റെ രാഷ്ട്രീയ എതിരാളികളെയും വിമർശകരെയും അടിച്ചമർത്താൻ ദുരുപയോഗം ചെയ്യപ്പെടുമെന്ന് അവർ മുന്നറിയിപ്പ് നൽകുന്നു. ‘മുഖമില്ലാത്ത കോടതികൾ’ നിലവിൽ വരുന്നത് ന്യായമായ വിചാരണയ്ക്കുള്ള പൗരന്മാരുടെ മൗലികാവകാശത്തെ പൂർണ്ണമായി ഹനിക്കുന്നതാണെന്നും വിദഗ്ദ്ധർ ചൂണ്ടിക്കാണിക്കുന്നു. നിയമത്തിനെതിരെ കോടതിയെ സമീപിക്കാൻ ഒരുങ്ങുകയാണ് പ്രതിപക്ഷം.
