ഉക്രെയ്നിന്റെ തുടർച്ചയായ ഡ്രോൺ ആക്രമണങ്ങളിൽ എണ്ണ ശുദ്ധീകരണശാലകൾക്ക് വ്യാപക നാശനഷ്ടമുണ്ടായതോടെ റഷ്യ കടുത്ത പെട്രോളിയം ക്ഷാമം നേരിടുന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. ആഭ്യന്തര ഇന്ധന ആവശ്യകത നിറവേറ്റുന്നതിനായി ഇന്ത്യയിൽ നിന്ന് വലിയ തോതിൽ പെട്രോൾ ഇറക്കുമതി ചെയ്യാനുള്ള നടപടികളാണ് റഷ്യ ആലോചിക്കുന്നതെന്ന് റിപ്പോർട്ടുകൾ സൂചിപ്പിക്കുന്നു.
ഉക്രെയ്നിലെ കീവ് പോസ്റ്റ് പുറത്തുവിട്ട റിപ്പോർട്ട് പ്രകാരം, കടൽമാർഗം ഇന്ത്യയിൽ നിന്നുള്ള പെട്രോൾ ഇറക്കുമതി പ്രോത്സാഹിപ്പിക്കുന്നതിന് റഷ്യ നികുതി നിയമങ്ങളിൽ ഭേദഗതി കൊണ്ടുവരുന്നത് പരിഗണിക്കുകയാണ്. ഇന്ത്യയിൽ നിന്ന് പെട്രോൾ ഇറക്കുമതി ചെയ്യുന്ന കമ്പനികൾക്ക് സബ്സിഡി അനുവദിക്കണമെന്ന നിർദേശത്തിന് റഷ്യൻ പാർലമെന്റിന്റെ ബജറ്റ് കമ്മിറ്റിയുടെ പിന്തുണ ലഭിച്ചതായും റിപ്പോർട്ടിൽ പറയുന്നു.
റഷ്യ-ഉക്രെയ്ൻ യുദ്ധം ആരംഭിച്ചതിന് ശേഷം റഷ്യൻ അസംസ്കൃത എണ്ണയുടെ ഏറ്റവും വലിയ ഉപഭോക്താവായി ഇന്ത്യ മാറിയിരുന്നു. നിലവിൽ പ്രതിദിനം 15 ലക്ഷം മുതൽ 20 ലക്ഷം ബാരൽ വരെ ക്രൂഡ് ഓയിൽ ഇന്ത്യ റഷ്യയിൽ നിന്ന് വാങ്ങുന്നുണ്ട്. 2026 ജൂണിൽ ഈ ഇറക്കുമതി പ്രതിദിനം 26.6 ലക്ഷം ബാരലായി ഉയർന്നതായും റിപ്പോർട്ടുകൾ വ്യക്തമാക്കുന്നു.
ഇന്ത്യയിലെ ശുദ്ധീകരണശാലകളിൽ സംസ്കരിക്കുന്ന എണ്ണയുടെ ഒരു ഭാഗം പെട്രോൾ ഉൾപ്പെടെയുള്ള വിവിധ ഇന്ധന ഉൽപ്പന്നങ്ങളാക്കി വിദേശ രാജ്യങ്ങളിലേക്ക് കയറ്റുമതി ചെയ്യുന്നു. 2025-ൽ ഇന്ത്യയുടെ പെട്രോൾ കയറ്റുമതി പ്രതിദിനം നാല് ലക്ഷം ബാരൽ എന്ന റെക്കോർഡ് നിലവാരത്തിലെത്തിയിരുന്നു.
അതേസമയം, ഉക്രെയ്നിന്റെ ആക്രമണങ്ങൾ മൂലം റഷ്യയുടെ എണ്ണ ശുദ്ധീകരണ ശേഷിക്ക് വലിയ തിരിച്ചടിയാണ് ഉണ്ടായിരിക്കുന്നത്. നിലവിൽ രാജ്യത്ത് പ്രതിദിനം ഏകദേശം 85,000 ടൺ പെട്രോൾ മാത്രമാണ് ഉൽപ്പാദിപ്പിക്കുന്നത്. എന്നാൽ വേനൽക്കാലത്ത് ആവശ്യകത 1.11 ലക്ഷം ടൺ വരെയെത്തുന്ന സാഹചര്യത്തിൽ പ്രതിദിനം ഏകദേശം 25,000 ടൺ ഇന്ധനക്കുറവാണ് അനുഭവപ്പെടുന്നതെന്ന് റിപ്പോർട്ടിൽ പറയുന്നു.
പെട്രോൾ ക്ഷാമം രൂക്ഷമായതോടെ റഷ്യയിൽ ഇന്ധനവില കുതിച്ചുയരുകയാണ്. ചില ചെറുവിമാന സർവീസ് ഓപ്പറേറ്റർമാർ ജെറ്റ് ഇന്ധനത്തിന് പകരം വാഹനങ്ങളിൽ ഉപയോഗിക്കുന്ന പെട്രോൾ തന്നെ ഉപയോഗിക്കാൻ നിർബന്ധിതരാകുന്ന സാഹചര്യം രൂപപ്പെട്ടിട്ടുണ്ടെന്നും റിപ്പോർട്ടുകൾ ചൂണ്ടിക്കാട്ടുന്നു. രാജ്യത്തെ ഇന്ധന വിപണിയിൽ ആശങ്കജനകമായ അവസ്ഥയാണ് നിലനിൽക്കുന്നതെന്നാണ് വിലയിരുത്തൽ.
