...
Home News International ബംഗ്ലാദേശിൽ വീണ്ടും രാഷ്ട്രീയ കലാപം; നരൈലിൽ 50ലേറെ വീടുകൾക്ക് തീയിട്ടു

ബംഗ്ലാദേശിൽ വീണ്ടും രാഷ്ട്രീയ കലാപം; നരൈലിൽ 50ലേറെ വീടുകൾക്ക് തീയിട്ടു

രാഷ്ട്രീയ സംഘർഷങ്ങളും ബംഗ്ലാദേശിന്റെ ആഭ്യന്തര സുരക്ഷയ്ക്കും ഇന്ത്യയുമായുള്ള ബന്ധത്തിനും പുതിയ വെല്ലുവിളിയായി മാറുകയാണ്

37

ധാക്ക: മുൻ പ്രധാനമന്ത്രി ഷെയ്ഖ് ഹസീനയുടെ തിരിച്ചുവരവിനെച്ചൊല്ലി ബംഗ്ലാദേശിൽ രാഷ്ട്രീയ സംഘർഷം രൂക്ഷമാകുന്നതിനിടെ നരൈൽ ജില്ലയിൽ വ്യാപക അക്രമവും തീവയ്പ്പും. കാലിയ മേഖലയിൽ ബിഎൻപി നേതാക്കൾ കൊല്ലപ്പെട്ടതിന് പിന്നാലെ അരങ്ങേറിയ ആക്രമണങ്ങളിൽ 50ലേറെ വീടുകളും നിരവധി കടകളും അഗ്നിക്കിരയായി. മുൻ എംപി കബീറുൾ ഹഖ് മുക്തിയുടെ പൂർവിക വീടും ആക്രമിക്കപ്പെട്ടവയിൽ ഉൾപ്പെടുന്നു. അവാമി ലീഗ് നേതാക്കളുടെയും പ്രവർത്തകരുടെയും വീടുകളാണ് പ്രധാനമായും ലക്ഷ്യമിട്ടതെന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്.

കാലിയ മുനിസിപ്പാലിറ്റിയുടെ പരിധിയിലുള്ള ബെന്ദർ ചാർ ഗ്രാമത്തിലാണ് അക്രമസംഭവങ്ങൾ അരങ്ങേറിയത്. വെള്ളിയാഴ്ച വൈകിട്ട് നാലോടെ തീപിടിത്തത്തെക്കുറിച്ച് വിവരം ലഭിച്ചതായി കാലിയ ഫയർ സർവീസ് സ്റ്റേഷൻ ഓഫീസർ ഹുമയൂൺ കബീർ പറഞ്ഞു. എന്നാൽ റോഡുകളിൽ മരങ്ങൾ വീണുകിടന്നതിനാൽ അഗ്നിരക്ഷാസേനയ്ക്ക് ഉടൻ സ്ഥലത്തെത്താനായില്ല.

രാത്രി എട്ടോടെ സംഘം ഗ്രാമത്തിലെത്തുമ്പോഴേക്കും തീയുടെ ഭൂരിഭാഗവും അണഞ്ഞിരുന്നു. അപ്പോഴേക്കും അമ്പതിലധികം വീടുകൾ കത്തിനശിക്കുകയും ബർദിയ ബസാറിലെ നിരവധി കടകൾക്ക് നാശനഷ്ടമുണ്ടാകുകയും ചെയ്തിരുന്നു.

മുൻ എംപിയുടെ പൂർവിക വീടിന് പുറമെ നിരവധി പ്രാദേശിക അവാമി ലീഗ് നേതാക്കളുടെ വീടുകളും ആക്രമിക്കപ്പെട്ടു. നിലവിൽ ബംഗ്ലാദേശിൽ അവാമി ലീഗിന്റെ രാഷ്ട്രീയ പ്രവർത്തനങ്ങൾക്ക് നിരോധനമുണ്ട്.

ബിഎൻപി നേതാക്കളുടെ കൊലപാതകത്തിന് പിന്നാലെ ആക്രമണം

ബിഎൻപി നേതാക്കൾ സംഘടിപ്പിച്ച പ്രതിഷേധ റാലിക്ക് നേരെയുണ്ടായ ആക്രമണത്തിന് പിന്നാലെയാണ് മേഖലയിൽ സംഘർഷം രൂക്ഷമായത്. അവാമി ലീഗ് പ്രവർത്തകർ നടത്തിയ ആക്രമണത്തിൽ പ്രതിഷേധിച്ചായിരുന്നു റാലി. സംഭവത്തിൽ മൂന്ന് പേർക്ക് പരിക്കേറ്റിരുന്നു. തുടർന്നുണ്ടായ സംഘർഷങ്ങളാണ് വീടുകൾക്കും വ്യാപാര സ്ഥാപനങ്ങൾക്കും നേരെയുള്ള ആക്രമണങ്ങളിലേക്ക് നയിച്ചതെന്നാണ് റിപ്പോർട്ടുകൾ.

അതിനിടെ, ആക്രമിക്കപ്പെട്ട വീടുകൾ അവാമി ലീഗ് അനുഭാവികളുടേതാണെന്നും ഇവരിൽ വലിയൊരു വിഭാഗം ഹിന്ദു സമുദായത്തിൽപ്പെട്ടവരാണെന്നും ബംഗ്ലാദേശ് സ്റ്റുഡന്റ്സ് ലീഗ് പ്രസിഡന്റ് ഹൊസൈൻ സദ്ദാം സമൂഹമാധ്യമമായ ഇൻസ്റ്റഗ്രാമിലൂടെ ആരോപിച്ചു.

അക്രമികൾക്കെതിരെ കർശന നടപടിയെന്ന് സർക്കാർ

തീവയ്പ്പ്, പെട്രോൾ ബോംബ് ആക്രമണം തുടങ്ങിയ സംഭവങ്ങളിൽ ഉൾപ്പെട്ടവർക്കെതിരെ ശക്തമായ നിയമനടപടി സ്വീകരിക്കുമെന്ന് ബംഗ്ലാദേശ് വിദേശകാര്യ മന്ത്രി ഹുമയൂൺ കബീർ മുന്നറിയിപ്പ് നൽകി. രാജ്യത്തെ രാഷ്ട്രീയ അസ്ഥിരതയ്ക്ക് നിരോധിത അവാമി ലീഗുമായി ബന്ധമുള്ള ചില സംഘങ്ങളാണ് ഉത്തരവാദികളെന്നും അദ്ദേഹം ആരോപിച്ചു.

ആക്രമണങ്ങൾക്ക് ഉത്തരവാദികളായവരെ നിയമത്തിന് മുന്നിലെത്തിക്കാൻ സുരക്ഷാ ഏജൻസികൾ നടപടികൾ സ്വീകരിച്ചുവരികയാണെന്നും വിദേശത്തുള്ള അവാമി ലീഗ് നേതാക്കളടക്കം അക്രമത്തിന് പ്രേരണ നൽകുന്നുണ്ടെന്നും മന്ത്രി പറഞ്ഞു.

‘ഈ തീവ്രവാദികളെ ഞങ്ങൾ പിന്തുടരും. നീതിയുടെ നീണ്ട കൈകൾ അവരിലേക്കും എത്തും’ എന്നായിരുന്നു മാധ്യമപ്രവർത്തകരുടെ ചോദ്യങ്ങൾക്ക് മറുപടിയായി അദ്ദേഹത്തിന്റെ പ്രതികരണം.

ഈ ആഴ്ച വിവിധ സംഭവങ്ങളിലായി കുറഞ്ഞത് നാല് പേർ കൊല്ലപ്പെട്ടതായാണ് പ്രാദേശിക മാധ്യമ റിപ്പോർട്ടുകൾ. ഭരണകക്ഷിയായ ബിഎൻപിയുടെയും അനുബന്ധ സംഘടനകളുടെയും മൂന്ന് നേതാക്കൾ കൊല്ലപ്പെട്ടതിനു പുറമെ, അജ്ഞാതർ ബസുകൾക്ക് തീയിട്ട സംഭവത്തിൽ ഒരു ബസ് ജീവനക്കാരനും തീപിടിത്തത്തിൽ വെന്തുമരിച്ചതായി റിപ്പോർട്ടുകളുണ്ട്.

രാഷ്ട്രീയ പ്രവർത്തനങ്ങളിൽനിന്ന് വിലക്കപ്പെട്ട അവാമി ലീഗിനെ തീവ്രവാദ സംഘടനയായി വിശേഷിപ്പിച്ച വിദേശകാര്യ മന്ത്രി, തീവയ്പ്പ്, പെട്രോൾ ബോംബ് ആക്രമണം തുടങ്ങിയവയിൽ ഏർപ്പെടുന്നവർക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്നും വ്യക്തമാക്കി.

ഹസീനയുടെ തിരിച്ചുവരവ് ഇന്ത്യ-ബംഗ്ലാദേശ് ബന്ധത്തിലും പ്രതിസന്ധി

ഷെയ്ഖ് ഹസീനയുടെ തിരിച്ചുവരവിനുള്ള നീക്കങ്ങൾ ധാക്കയും ന്യൂഡൽഹിയും തമ്മിലുള്ള ബന്ധത്തിൽ പുതിയ സംഘർഷങ്ങൾക്ക് വഴിവെച്ചിട്ടുണ്ട്. 2024 ഓഗസ്റ്റിൽ വിദ്യാർഥി പ്രക്ഷോഭത്തെത്തുടർന്ന് അധികാരത്തിൽനിന്ന് പുറത്തായ ഹസീന രാജ്യം വിട്ട് ഇന്ത്യയിൽ അഭയം തേടുകയായിരുന്നു. അന്നത്തെ ഇടക്കാല സർക്കാർ അവരുടെ പാസ്‌പോർട്ടും ദേശീയ തിരിച്ചറിയൽ കാർഡും റദ്ദാക്കിയിരുന്നു.

തിരിച്ചുവരവിനുള്ള തയ്യാറെടുപ്പുകളുടെ ഭാഗമായി പുതിയ പാസ്‌പോർട്ടിനും ദേശീയ തിരിച്ചറിയൽ കാർഡിനുമായി ഹസീന അപേക്ഷിച്ചെങ്കിലും ബംഗ്ലാദേശ് സർക്കാർ അപേക്ഷ നിരസിച്ചതായാണ് റിപ്പോർട്ടുകൾ. രേഖകൾക്കായി ഹസീനയുടെ അഭിഭാഷകർ ഡിസംബറിൽ ന്യൂഡൽഹിയിലെ ബംഗ്ലാദേശ് നയതന്ത്ര കാര്യാലയവുമായി ബന്ധപ്പെട്ടിരുന്നു.

ഹസീനയുടെ തിരിച്ചുവരവ് ആവശ്യപ്പെട്ട് അവാമി ലീഗ് ഒരാഴ്ച നീണ്ടുനിന്ന പ്രതിഷേധ പരിപാടികൾ പ്രഖ്യാപിക്കുകയും നവംബർ 19ന് രാജ്യവ്യാപക ബന്ദിന് ആഹ്വാനം ചെയ്യുകയും ചെയ്തിരുന്നു. പ്രതിഷേധങ്ങളുടെ ഭാഗമായി വിവിധ ജില്ലകളിൽ തീവയ്പ്പ്, ക്രൂഡ് ബോംബ് ആക്രമണം, ഏറ്റുമുട്ടൽ തുടങ്ങിയ സംഭവങ്ങളും റിപ്പോർട്ട് ചെയ്തു.

ഹസീനയെ കൈമാറണമെന്ന് ബംഗ്ലാദേശ്

2024ലെ വിദ്യാർഥി പ്രക്ഷോഭത്തിനിടെ പ്രതിഷേധക്കാർക്കെതിരെയുണ്ടായ അടിച്ചമർത്തലുമായി ബന്ധപ്പെട്ട മനുഷ്യരാശിക്കെതിരായ കുറ്റകൃത്യങ്ങളിൽ 2025 നവംബറിൽ ഹസീനയ്ക്ക് വധശിക്ഷ വിധിച്ചിരുന്നു. എന്നാൽ തനിക്കെതിരായ ആരോപണങ്ങൾ ഹസീന നിഷേധിച്ചിട്ടുണ്ട്.

സിവിലിയൻ സന്ദർശകയായി രാജ്യത്തേക്ക് മടങ്ങാൻ അനുവദിക്കുന്നതിന് പകരം ഇന്ത്യ-ബംഗ്ലാദേശ് കൈമാറ്റ ഉടമ്പടി പ്രകാരം ഹസീനയെ കൈമാറണമെന്നാണ് ധാക്കയുടെ ആവശ്യം. ഹസീനയുടെ നാടുകടത്തൽ ഇരു രാജ്യങ്ങളും തമ്മിലുള്ള പ്രധാന നയതന്ത്ര തർക്കവിഷയമായി തുടരുകയാണ്.

ഡിസംബറിൽ ബംഗ്ലാദേശിലേക്ക് മടങ്ങി കോടതിയിൽ കീഴടങ്ങാൻ ഉദ്ദേശിക്കുന്നതായി ഹസീന നേരത്തെ വ്യക്തമാക്കിയിരുന്നു. എന്നാൽ അവരുടെ തിരിച്ചുവരവുമായി ബന്ധപ്പെട്ട അനിശ്ചിതത്വവും രാജ്യത്തെ രാഷ്ട്രീയ സംഘർഷങ്ങളും ബംഗ്ലാദേശിന്റെ ആഭ്യന്തര സുരക്ഷയ്ക്കും ഇന്ത്യയുമായുള്ള ബന്ധത്തിനും പുതിയ വെല്ലുവിളിയായി മാറുകയാണ്.

Seraphinite AcceleratorOptimized by Seraphinite Accelerator
Turns on site high speed to be attractive for people and search engines.