കർണാടകയിൽ മുഖ്യമന്ത്രി മാറ്റ വിഷയത്തിൽ ഭരണകക്ഷിക്കുള്ളിൽ അധികാര തർക്കം നിലനിൽക്കെ, ഉപമുഖ്യമന്ത്രി ഡികെ ശിവകുമാറിനെ പിന്തുണക്കുന്ന നിയമസഭാംഗങ്ങളുടെ ഒരു സംഘം കോൺഗ്രസ് ഹൈക്കമാൻഡ് നേതാക്കളെ കാണാൻ ന്യൂഡൽഹിയിലേക്ക് പറന്നതായി പാർട്ടി വൃത്തങ്ങൾ തിങ്കളാഴ്ച അറിയിച്ചു.
ഞായറാഴ്ച രാത്രി ആറ് നിയമ സഭാംഗങ്ങളെങ്കിലും ദേശീയ തലസ്ഥാനത്ത് എത്തിയതായി വൃത്തങ്ങൾ അറിയിച്ചു. ശിവകുമാറിനെ മുഖ്യമന്ത്രി ആക്കാൻ വാദിക്കാൻ കുറച്ച് നിയമസഭാംഗങ്ങൾ കൂടി ഉടൻ യാത്ര ചെയ്യുമെന്ന് അവർ പറഞ്ഞു.
നവംബർ 20ന് കോൺഗ്രസ് സർക്കാർ അഞ്ച് വർഷത്തെ കാലാവധിയുടെ പകുതി പൂർത്തിയാക്കിയതിന് ശേഷം, 2023ൽ മുഖ്യമന്ത്രി സിദ്ധരാമയ്യയും ശിവകുമാറും തമ്മിലുള്ള “അധികാര പങ്കിടൽ” കരാറിനെ ചൊല്ലി, സംസ്ഥാനത്ത് മുഖ്യമന്ത്രി മാറ്റത്തെ കുറിച്ചുള്ള അഭ്യൂഹങ്ങൾക്കിടെ, ഭരണകക്ഷിക്കുള്ളിലെ അധികാര തർക്കം ശക്തമായി.
ഡൽഹിയിലെ നിയമസഭാംഗങ്ങളിൽ എംഎൽഎമാരായ എച്ച്സി ബാലകൃഷ്ണ (മഗഡി), കെഎം ഉദയ് (മദ്ദൂർ), നയന മൊട്ടമ്മ (മുടിഗെരെ), ഇഖ്ബാൽ ഹുസൈൻ (രാമനഗര), ശരത് ബച്ചെഗൗഡ് (ഹൊസക്കോട്ട്), ശിവഗംഗ ബസവരാജ് (ചന്നഗിരി) എന്നിവരും ഉൾപ്പെടുന്നുവെന്ന് പാർട്ടി വൃത്തങ്ങൾ അറിയിച്ചു.
ബെംഗളൂരുവിലുള്ള എഐസിസി പ്രസിഡന്റ് മല്ലികാർജുൻ ഖാർഗെ ഡൽഹിയിലേക്ക് പോകുമെന്നും കോൺഗ്രസ് ഉന്നത നേതാവ് രാഹുൽ ഗാന്ധി വിദേശയാത്ര കഴിഞ്ഞ് തിരിച്ചെത്തുമെന്നും വൃത്തങ്ങൾ കൂട്ടിച്ചേർത്തു. നവംബർ 20ന് കോൺഗ്രസ് സർക്കാർ രണ്ടര വർഷം പൂർത്തിയാക്കിയ സാഹചര്യത്തിൽ കഴിഞ്ഞയാഴ്ച ശിവകുമാറിനെ പിന്തുണക്കുന്ന പത്ത് പേരടങ്ങുന്ന ചില നിയമസഭാംഗങ്ങൾ ന്യൂഡൽഹിയിലേക്ക് പോയി ഖാർഗെയെ കണ്ടു. എന്നാൽ, ഖാർഗെയെ കാണാൻ ഡൽഹിയിലേക്ക് പോകുന്ന നിയമസഭാംഗങ്ങളെ കുറിച്ച് തനിക്ക് അറിയില്ലെന്ന് ശിവകുമാർ അന്ന് പറഞ്ഞിരുന്നു.
ശിവകുമാർ ഡൽഹിയിലേക്കുള്ള യാത്രയെ എംഎൽഎമാർ പിന്തുണച്ചതിനെ തുടർന്ന്, മുഖ്യമന്ത്രി സിദ്ധരാമയ്യ ശനിയാഴ്ച ബെംഗളൂരുവിലെ ഖാർഗെയുടെ വസതിയിൽ ഒരു മണിക്കൂറിലധികം നീണ്ട കൂടിക്കാഴ്ച നടത്തി. മന്ത്രിസഭ പുനഃസംഘടനക്കായി സിദ്ധരാമയ്യ ശ്രമിക്കുമ്പോൾ, നേതൃമാറ്റത്തെ കുറിച്ച് പാർട്ടി ആദ്യം തീരുമാനമെടുക്കണമെന്ന് ശിവകുമാർ ആഗ്രഹിക്കുന്നുവെന്ന് പാർട്ടി വൃത്തങ്ങൾ അറിയിച്ചു.
കോൺഗ്രസ് ഹൈക്കമാൻഡ് മന്ത്രിസഭാ പുനഃസംഘടനക്ക് അംഗീകാരം നൽകിയാൽ സിദ്ധരാമയ്യ അഞ്ച് വർഷത്തെ കാലാവധി പൂർത്തിയാക്കുമെന്ന സൂചന നൽകുമെന്നും ഇത് ശിവകുമാറിന് ആ പദവിയിൽ എത്താനുള്ള സാധ്യത കുറക്കുമെന്നും പാർട്ടിക്കുള്ളിലെ നിരവധി വൃത്തങ്ങൾ പറയുന്നു.
