യൂത്ത് കോണ്ഗ്രസ് സംസ്ഥാന അധ്യക്ഷ സ്ഥാനം രാജി വെച്ച് രാഹുല് മാങ്കൂട്ടത്തില്. യൂത്ത് കോണ്ഗ്രസ് സംസ്ഥാന അദ്ധ്യക്ഷ സ്ഥാനത്ത് നിന്ന് രാജിവെക്കാന് രാഹുല് മാങ്കൂട്ടത്തില് എംഎല്എക്ക് എഐസിസി നിര്ദേശം നല്കിയിരുന്നു. പാര്ട്ടി സംസ്ഥാന നേതൃത്വം ആയിരുന്നു ഹൈക്കമാന്ഡ് വിശദാംശങ്ങള് തേടിയത്.
ആരോപണങ്ങള് പുറത്തുവരും മുമ്പ് തന്നെ രാഹുലിന് എതിരെ പരാതി ലഭിച്ചിരുന്നു. അന്വേഷിക്കാന് സംസ്ഥാനത്തിൻ്റെ ചുമതലയുള്ള എഐസിസി ജനറല്സെക്രട്ടറി ദീപദാസ് മുന്ഷി കെപിസിസി നേതൃത്വത്തിന് നിര്ദേശം നല്കിയിരുന്നു. ശേഷം ലഭിച്ച വിവരങ്ങളില് രാഹുലിനെതിരെ ഉയര്ന്ന ആരോപണങ്ങളില് കഴമ്പുണ്ടെന്ന് കണ്ടെത്തിയിരുന്നു. അതിന് ശേഷമാണ് യൂത്ത് കോണ്ഗ്രസ് സംസ്ഥാന അദ്ധ്യക്ഷ സ്ഥാനത്ത് നിന്ന് രാജിവെക്കാന് നിര്ദേശം നല്കിയത്.
കഴിഞ്ഞ ദിവസം യുവ നേതാവിനെതിരെ മാധ്യമ പ്രവര്ത്തക നടത്തിയ വെളിപ്പെടുത്തല് വ്യാപക ചര്ച്ചക്ക് വഴിവെച്ചത്. മാധ്യമ പ്രവര്ത്തക ആരോപണം ഉന്നയിച്ചത് രാഹുല് മാങ്കൂട്ടത്തിലിന് എതിരെ എന്നായിരുന്നു സോഷ്യല് മീഡിയയില് അടക്കം ചര്ച്ചയായത്. ഇതിനിടെ രാഹുല് മാങ്കൂട്ടത്തിലിന് എതിരെ ഗുരുതര വെളിപ്പെടുത്തലുമായി ഹണി ഭാസ്കരനും രംഗത്തെത്തിയിരുന്നു. ‘രാഹുല് മാങ്കൂട്ടം- അനുഭവം’ എന്ന തലക്കെട്ടോടെ ഫേസ്ബുക്കില് പങ്കുവെച്ച കുറിപ്പിലായിരുന്നു ഹണി ഭാസ്കരന് തുറന്ന് എഴുതിയത്.
യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില് എംഎല്എക്കെതിരായ ഗുരുതര ശബ്ദ സംഭാഷണം മാധ്യമങ്ങൾ പുറത്ത് വിട്ടിരുന്നു. രാഹുല് മാങ്കൂട്ടത്തില് യുവതിയെ ഗര്ഭച്ഛിദ്രത്തിന് സമ്മര്ദ്ദം ചെലുത്തുന്ന ശബ്ദ സംഭാഷണത്തിൻ്റെ പ്രസക്ത ഭാഗമായിരുന്നു മാധ്യമങ്ങൾ പുറത്തുവിട്ടത്. സ്വകാര്യത മാനിച്ച് ഫോണ് സംഭാഷണത്തില് യുവതിയുടെ ശബ്ദം എഡിറ്റ് ചെയ്താണ് മാധ്യമങ്ങൾ സന്ദേശം പുറത്തുവിട്ടത്.
