ചൈനീസ് സൈന്യം തങ്ങളുടെ യുദ്ധതന്ത്രങ്ങളിൽ ഹ്യൂമനോയിഡ് റോബോട്ടുകളെ (യന്ത്രമനുഷ്യർ) ഉൾപ്പെടുത്താൻ സജീവമായി തയ്യാറെടുക്കുന്നതായി റിപ്പോർട്ടുകൾ. നഗരങ്ങളിലെ പോരാട്ടങ്ങൾക്കും കെട്ടിടങ്ങൾക്കുള്ളിലെ ആക്രമണങ്ങൾക്കുമായി ഈ യന്ത്രമനുഷ്യരെ ഉപയോഗിക്കാനാണ് ചൈന പ്രധാനമായും ലക്ഷ്യമിടുന്നത്. നിലവിൽ ഗവേഷണ-പരിശീലന ഘട്ടങ്ങളിലുള്ള ഈ സാങ്കേതികവിദ്യ വികസിപ്പിക്കുന്നതിൽ ചൈനീസ് പ്രതിരോധ സ്ഥാപനങ്ങൾ വലിയ മുന്നേറ്റമാണ് നടത്തിക്കൊണ്ടിരിക്കുന്നത്.
നൂറിലധികം ചൈനീസ് സൈനിക അറിയിപ്പുകൾ, അക്കാദമിക് പഠനങ്ങൾ, പേറ്റന്റുകൾ, ഔദ്യോഗിക പ്രസിദ്ധീകരണങ്ങൾ, സർക്കാർ രേഖകൾ, പ്രതിരോധ കമ്പനികളുടെ വിവരങ്ങൾ എന്നിവ അവലോകനം ചെയ്തുകൊണ്ട് അന്താരാഷ്ട്ര വാർത്താ ഏജൻസിയായ റോയിട്ടേഴ്സ് ആണ് ഈ വിവരങ്ങൾ പുറത്തുവിട്ടത്. ചൈനീസ് പ്രതിരോധ വിഭാഗം ഹ്യൂമനോയിഡ് റോബോട്ടുകളുടെ സൈനിക ആവശ്യങ്ങൾക്കായുള്ള ഗവേഷണം വേഗത്തിലാക്കുകയും യുദ്ധകാലത്ത് അവയെ വിന്യസിക്കുന്നതിനായി കൃത്യമായി ആസൂത്രണം ചെയ്യുകയും ചെയ്യുന്നുണ്ട്. പ്രത്യേകിച്ച് 2025-ലും 2026-ലും ഈ പ്രവർത്തനങ്ങൾക്ക് വലിയ രീതിയിലുള്ള വേഗത കൈവന്നതായി റിപ്പോർട്ടുകൾ വ്യക്തമാക്കുന്നു.
ചൈനയിലെ സൈനിക സ്ഥാപനങ്ങൾ യുദ്ധക്കളത്തിലെ ആവശ്യങ്ങൾക്കനുസരിച്ച് ഈ ഹ്യൂമനോയിഡ് റോബോട്ടുകളെ പരീക്ഷിച്ചുവരികയാണ്. ഇവയെ മികച്ച രീതിയിൽ പരിശീലിപ്പിക്കുന്നതിനുള്ള അത്യാധുനിക സാങ്കേതികവിദ്യകൾ സ്വന്തമാക്കാൻ ശ്രമിക്കുന്നതിനൊപ്പം തന്നെ, യഥാർത്ഥ യുദ്ധമുഖത്ത് മനുഷ്യരായ സൈനികർക്കൊപ്പം ഈ യന്ത്രമനുഷ്യർക്ക് എങ്ങനെ ഒന്നിച്ച് പ്രവർത്തിക്കാൻ സാധിക്കുമെന്നതിനെക്കുറിച്ചും അവർ പഠനം നടത്തുന്നുണ്ട്. റോബോട്ടുകളുടെ പ്രതികരണ ശേഷി, ചലനക്ഷമത എന്നിവ ഗണ്യമായി വർധിപ്പിക്കുന്നതിനായി ചൈനീസ് സൈന്യം വലിയതോതിൽ നിക്ഷേപങ്ങൾ നടത്തുന്നുണ്ടെന്ന് രേഖകൾ വ്യക്തമാക്കുന്നു.
കഴിഞ്ഞ മാസം ചൈനയിൽ വെച്ച് നടന്ന വേൾഡ് ഹ്യൂമനോയിഡ് റോബോട്ട് ഗെയിംസിൽ ഈ യന്ത്രമനുഷ്യരുടെ അത്ഭുതപ്പെടുത്തുന്ന കഴിവുകൾ പരസ്യമായി പ്രദർശിപ്പിച്ചിരുന്നു. റോബോട്ടുകൾ ചാടുകയും ബോക്സിങ് നടത്തുകയും നൃത്തം ചെയ്യുകയും ചെയ്യുന്നതിന്റെ വീഡിയോകൾ അന്ന് പുറത്തുവന്നിരുന്നു. വേഗതയേറിയ ചില റോബോട്ടുകൾ നൂറ് മീറ്റർ ഓട്ടമത്സരത്തിൽ ലോകപ്രശസ്ത താരം ഉസൈൻ ബോൾട്ടിനേക്കാൾ വേഗത്തിലാണ് ഓടിയത്. ഈ യന്ത്രമനുഷ്യരുടെ മെച്ചപ്പെട്ടു വരുന്ന കഴിവുകളെ കാണികൾ പ്രോത്സാഹിപ്പിക്കുന്നതും ഇതിൽ കാണാമായിരുന്നു.
ബി.ഓ.എഫ്.എ (BofA) ഗ്ലോബൽ റിസർച്ചിന്റെ കണക്കുകൾ പ്രകാരം, 2025-ൽ ആഗോള ഹ്യൂമനോയിഡ് കയറ്റുമതിയുടെ ഏകദേശം 95 ശതമാനവും നൽകിയത് ചൈനീസ് നിർമ്മാതാക്കളാണ്. ഈ വാണിജ്യ മേധാവിത്വം സ്വന്തം നിലയിൽ സൈനിക റോബോട്ടുകളെ വികസിപ്പിക്കുന്നതിനൊപ്പം തന്നെ അതിവേഗം വളർന്നുവരുന്ന വലിയൊരു വ്യവസായ മേഖലയിലേക്ക് പ്രവേശിക്കാനുള്ള അവസരവും ചൈനീസ് സൈന്യത്തിന് (പി.എൽ.എ) നൽകുന്നുണ്ട്. അമേരിക്ക ഉൾപ്പെടെയുള്ള മറ്റ് രാജ്യങ്ങളും സമാനമായ പരീക്ഷണങ്ങൾ നടത്തുന്നുണ്ടെങ്കിലും, നിർമ്മാണ മേഖലയിലുള്ള ചൈനയുടെ ആധിപത്യം അവർക്ക് ഈ രംഗത്ത് വലിയ മുൻതൂക്കം നൽകുന്നു.
മനുഷ്യർ പോകാൻ മടിക്കുന്നതും അപകടം നിറഞ്ഞതുമായ ഇടങ്ങളിലേക്ക് യന്ത്രമനുഷ്യരെ വിന്യസിക്കുക എന്നതാണ് റോബോട്ടുകൾ വികസിപ്പിക്കുന്നതിനുള്ള ഏറ്റവും വലിയ ലക്ഷ്യമെന്ന് വിദഗ്ദ്ധർ ചൂണ്ടിക്കാണിക്കുന്നു. ഒരു റോബോട്ടിനെ നഷ്ടപ്പെടുന്നത് വഴി വിലയേറിയ ഒരു മനുഷ്യജീവൻ രക്ഷിക്കാൻ കഴിയുമെങ്കിൽ, ആ സ്ഥാനത്ത് റോബോട്ടുകളെ പകരമായി ഉപയോഗിക്കാമെന്ന് യു.സി.എൽ.എ-യിലെ മെക്കാനിക്കൽ ആൻഡ് എയ്റോസ്പേസ് എഞ്ചിനീയറിങ് പ്രൊഫസറായ ഡെന്നിസ് ഹോങ് വ്യക്തമാക്കുന്നു. ചൈനയുടെ റോബോട്ട് പ്രതിരോധ ഗവേഷണങ്ങൾ ആഗോളതലത്തിൽ സൈനിക സാങ്കേതികവിദ്യകൾ എത്രമാത്രം വേഗത്തിലാണ് വികസിക്കുന്നത് എന്ന് അടിവരയിടുന്നതാണ്.
എങ്കിലും, യഥാർത്ഥ യുദ്ധക്കളത്തിൽ കഠിനമായ തീരുമാനങ്ങൾ എടുക്കുന്നതിലുള്ള ധാർമ്മികതാ പ്രശ്നങ്ങളും യന്ത്രങ്ങളുടെ വിശ്വാസ്യതയും വലിയ വെല്ലുവിളികളായി ഈ രംഗത്ത് ഇപ്പോഴും നിലനിൽക്കുന്നുണ്ട്. ഹ്യൂമനോയിഡ് റോബോട്ടുകളുടെ ഇത്തരം സൈനിക ആവശ്യങ്ങളെയും പരീക്ഷണങ്ങളെയും കുറിച്ചുള്ള ചോദ്യങ്ങളോട് ചൈനയുടെ ഔദ്യോഗിക പ്രതിരോധ മന്ത്രാലയമോ പി.എ.എൽ-ന്റെ പ്രധാന ഗവേഷണ സ്ഥാപനമായ നാഷണൽ യൂണിവേഴ്സിറ്റി ഓഫ് ഡിഫൻസ് ടെക്നോളജിയോ (NUDT) ഇതുവരെ ഔദ്യോഗികമായി പ്രതികരിച്ചിട്ടില്ല.
