സംസ്ഥാനത്ത് സ്പെഷ്യൽ ഇന്റൻസീവ് റിവിഷൻ (എസ്.ഐ.ആർ.) പൂർത്തിയാക്കി അന്തിമ വോട്ടർപട്ടിക പ്രസിദ്ധീകരിച്ചു. പുതിയ കണക്കുകൾ പ്രകാരം കേരളത്തിൽ ആകെ 2,69,53,644 വോട്ടർമാരാണുള്ളത്. ഇതിൽ 1,38,27,319 സ്ത്രീകളും 1,31,26,048 പുരുഷന്മാരും 277 ട്രാൻസ്ജെൻഡർ വോട്ടർമാരും ഉൾപ്പെടുന്നു. എസ്.ഐ.ആർ. പ്രക്രിയയുടെ ഭാഗമായി ഏകദേശം 24.61 ലക്ഷം പേരെ പട്ടികയിൽ നിന്ന് ഒഴിവാക്കിയിട്ടുണ്ട്. വോട്ടർപട്ടികയുടെ പകർപ്പുകൾ ഇലക്ടറൽ രജിസ്ട്രേഷൻ ഓഫീസുകളിലും അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസുകളിലും പരിശോധനയ്ക്കായി ലഭ്യമാണ്.
ജില്ലാതല കണക്കുകൾ പരിശോധിക്കുമ്പോൾ ഏറ്റവും കൂടുതൽ വോട്ടർമാരുള്ളത് മലപ്പുറം ജില്ലയിലാണ്. 36.15 ലക്ഷം വോട്ടർമാരാണ് ഇവിടെയുള്ളത്. മലപ്പുറത്തെ മറ്റൊരു പ്രത്യേകത, കേരളത്തിൽ പുരുഷ വോട്ടർമാരുടെ എണ്ണം സ്ത്രീകളേക്കാൾ കൂടുതലുള്ള ഏക ജില്ല ഇതാണെന്നതാണ് (18.10 ലക്ഷം പുരുഷന്മാർ, 18.05 ലക്ഷം സ്ത്രീകൾ). വോട്ടർമാരുടെ എണ്ണത്തിൽ ഏറ്റവും പിന്നിൽ വയനാട് ജില്ലയാണ്. 6.4 ലക്ഷം വോട്ടർമാരാണ് വയനാട്ടിലുള്ളത്, ഇതിൽ വെറും രണ്ട് ട്രാൻസ്ജെൻഡർ വോട്ടർമാർ മാത്രമാണുള്ളത്.
അന്തിമപട്ടിക പുറത്തുവന്നെങ്കിലും ചില സാങ്കേതിക പ്രശ്നങ്ങൾ പരിഹരിക്കപ്പെടാത്തത് വോട്ടർമാരെ ആശങ്കയിലാക്കുന്നുണ്ട്. ഒരേ വീട്ടിലെ വോട്ടർമാരുടെ പേരുകൾ പലയിടത്തായി ചിതറിക്കിടക്കുന്ന അവസ്ഥ ഇപ്പോഴും തുടരുന്നുവെന്നാണ് പ്രധാന പരാതി. ഇത് പരിഹരിക്കുമെന്ന് തിരഞ്ഞെടുപ്പ് കമ്മീഷൻ നേരത്തെ ഉറപ്പുനൽകിയിരുന്നെങ്കിലും പലയിടത്തും ഇത് പൂർണ്ണമായി നടപ്പായിട്ടില്ല. കൂടാതെ, പുതിയ ബൂത്തുകൾ നിലവിൽ വന്നതോടെ മുൻപ് ഒരേ ബൂത്തിലായിരുന്നവർ വിദൂര ബൂത്തുകളിലേക്ക് മാറ്റപ്പെട്ടതായും, ജില്ല മാറ്റത്തിന് അപേക്ഷിച്ച ചിലർക്ക് രണ്ടിടത്തും വോട്ട് നിലനിൽക്കുന്നതായും റിപ്പോർട്ടുകളുണ്ട്.
പൊതുജനങ്ങൾക്ക് തങ്ങളുടെ പേര് വോട്ടർപട്ടികയിലുണ്ടോ എന്ന് ഓൺലൈനായി പരിശോധിക്കാൻ വിപുലമായ സൗകര്യങ്ങൾ ഒരുക്കിയിട്ടുണ്ട്. മുഖ്യ തിരഞ്ഞെടുപ്പ് ഓഫീസറുടെ വെബ്സൈറ്റായ ceo.kerala.gov.in വഴിയോ voters.eci.gov.in എന്ന ലിങ്ക് വഴിയോ പട്ടിക പരിശോധിക്കാവുന്നതാണ്. കൂടാതെ, electoralsearch.eci.gov.in എന്ന പോർട്ടലിൽ വോട്ടർ ഐഡി നമ്പരോ മൊബൈൽ നമ്പരോ ഉപയോഗിച്ച് ലളിതമായി പേര് തിരയാൻ സാധിക്കും. പട്ടികയിൽ പേര് ഉൾപ്പെടാത്തവർക്ക് അത് ചേർക്കാനുള്ള അവസരം ഇനിയും ലഭ്യമാണെന്ന് അധികൃതർ അറിയിച്ചു.
