സ്മാർട്ട്ഫോൺ നിർമ്മിക്കുന്നതിനായി ഗൂഗിൽ തമിഴ്നാട്ടിൽ കോടിക്കണക്കിന് ഡോളർ നിക്ഷേപിക്കാൻ പദ്ധതിയിടുന്നതായി അന്താരാഷ്ട്ര മാധ്യമമായ ബ്ലൂംബെർഗ് റിപ്പോർട്ട് ചെയ്തു. ഇന്ത്യയ്ക്കുള്ളിൽ ഉൽപ്പാദന പ്രവർത്തനങ്ങൾ വിപുലീകരിക്കാനുള്ള ശ്രമം തമിഴ്നാട്ടിൽ ആരംഭിക്കാനാണ് ടെക് ഭീമൻ ലക്ഷ്യം വെക്കുന്നത്.
തായ്‌വാനിൽ നിന്നുള്ള കരാർ നിർമ്മാണ പങ്കാളിയായ ഫോക്‌സ്‌കോൺ ടെക്‌നോളജി ഗ്രൂപ്പുമായി സഹകരിച്ച് പുത്തൻ പ്രൊഡക്ഷൻ ലൈനുകൾ സജ്ജീകരിച്ച് തമിഴ്നാട്ടിൽ പിക്സൽ ഫോണുകളുടെ അസംബ്ലി ആരംഭിക്കാനാണ് ഗൂഗിൾ ഉദ്ദേശിക്കുന്നതെന്നും റിപ്പോർട്ടിൽ പറയുന്നു.
ഇതിനു പുറമെ , അതിൻ്റെ വിംഗ് അനുബന്ധ സ്ഥാപനവും തമിഴ്നാട്ടിൽ ഡ്രോൺ അസംബ്ലി പ്രവർത്തനങ്ങൾ ആരംഭിക്കുമെന്നും പ്രതീക്ഷിക്കുന്നു. തമിഴ്‌നാട് വ്യവസായ മന്ത്രി ടിആർബി രാജയും മുതിർന്ന എക്‌സിക്യൂട്ടീവുകളും ഉൾപ്പെടെയുള്ള തമിഴ്‌നാട് സർക്കാരിൽ നിന്നുള്ള ഒരു പ്രതിനിധി സംഘം യുഎസിലെ മുതിർന്ന ഗൂഗിൾ മാനേജ്‌മെൻ്റുമായി വിഷയത്തിൽ ചർച്ച നടത്തി.
എന്നാൽ ഈ സംഭവവികാസങ്ങളെക്കുറിച്ച് ഗൂഗിളിൽ നിന്നോ ഫോക്‌സ്‌കോണിൽ നിന്നോ ഇതുവരെ ഔദ്യോഗിക സ്ഥിരീകരണമൊന്നും ഉണ്ടായിട്ടില്ല. 2023 ഒക്ടോബറിൽ പിക്സൽ 8, പിക്സൽ 8 പ്രോ എന്നിവ ഇന്ത്യയിൽ നിർമിച്ചുകൊണ്ട് പിക്സൽ സ്മാർട്ട്ഫോണുകളുടെ പ്രാദേശിക നിർമ്മാണം ആരംഭിക്കാനുള്ള പദ്ധതി ഗൂഗിൾ ആദ്യം പ്രഖ്യാപിച്ചിരുന്നു.
