രാഷ്ട്രീയ ചരിത്രത്തിലെ ഏറ്റവും നിര്‍ണ്ണായകവും സെന്‍സിറ്റീവുമായ വശങ്ങളെക്കുറിച്ച് മുന്‍ കോണ്‍ഗ്രസ് അധ്യക്ഷ സോണിയ ഗാന്ധി ‘ദി ഗാര്‍ഡിയന്’ നല്‍കിയ അഭിമുഖം രാജ്യത്ത് വലിയ ചര്‍ച്ചയാകുന്നു. 1992-ലെ ബാബറി മസ്ജിദ് തകര്‍ക്കല്‍, ഇന്ദിരാഗാന്ധി ഏര്‍പ്പെടുത്തിയ അടിയന്തരാവസ്ഥ, സഞ്ജയ് ഗാന്ധിയുടെ സ്വാധീനം, ഇന്ദിരാഗാന്ധിയുടെ കൊലപാതകത്തിന്റെ ഞെട്ടിക്കുന്ന ഓര്‍മ്മകള്‍ എന്നിവയെക്കുറിച്ചെല്ലാം അവര്‍ അഭിമുഖത്തില്‍ മനസ്സ് തുറന്നു.
സോണിയയുടെ വെളിപ്പെടുത്തലുകള്‍ക്ക് പിന്നാലെ ഭരണ-പ്രതിപക്ഷ കക്ഷികള്‍ തമ്മില്‍ രൂക്ഷമായ വാഗ്വാദങ്ങളും ആരംഭിച്ചിട്ടുണ്ട്.
പ്രധാന വെളിപ്പെടുത്തലുകള്‍:
- ബാബറി മസ്ജിദ് തകര്‍ത്തപ്പോള്‍: 1992-ല്‍ ബാബറി മസ്ജിദ് തകര്‍ക്കുന്നതിന്റെ ദൃശ്യങ്ങള്‍ ടിവിയില്‍ കണ്ടപ്പോള്‍ തനിക്ക് കരച്ചിലടക്കാന്‍ കഴിഞ്ഞില്ലെന്ന് സോണിയ ഗാന്ധി വെളിപ്പെടുത്തി. രാജ്യത്തിന്റെ മതേതര ഘടനയെ രക്ഷിക്കാന്‍ വലിയൊരു പോരാട്ടം തന്നെ വേണ്ടി വരുമെന്ന് ആ നിമിഷം തനിക്ക് മനസ്സിലായെന്നും അവര്‍ പറഞ്ഞു.
- അടിയന്തരാവസ്ഥ ഒരു തെറ്റ്: മുന്‍ പ്രധാനമന്ത്രി ഇന്ദിരാഗാന്ധി അടിയന്തരാവസ്ഥ ഏര്‍പ്പെടുത്തിയത് വലിയൊരു തെറ്റാണെന്ന് സോണിയ സമ്മതിച്ചു. ഈ തീരുമാനത്തില്‍ കുടുംബത്തിനുള്ളില്‍ കടുത്ത അഭിപ്രായവ്യത്യാസങ്ങളുണ്ടായിരുന്നു. അടിയന്തരാവസ്ഥയെ രാജീവ് ഗാന്ധി ശക്തമായി എതിര്‍ത്തപ്പോള്‍, സഞ്ജയ് ഗാന്ധിയാണ് ഇതിനെ അനുകൂലിച്ചത്.
- കോണ്‍ഗ്രസിന്റെ പോരായ്മകള്‍: ബി.ജെ.പിയുടെയും ഹിന്ദുത്വ രാഷ്ട്രീയത്തിന്റെയും വളര്‍ച്ചയ്ക്ക് കോണ്‍ഗ്രസിന്റെ അവഗണനയും അശ്രദ്ധയും കാരണമായെന്ന് സോണിയ തുറന്നുപറഞ്ഞു.
ഇന്ദിരാഗാന്ധിയുടെ വധവും വേദനാജനക ഓര്‍മ്മകളും
1984 ഒക്ടോബർ 31-ൽ ഇന്ദിരാഗാന്ധി കൊല്ലപ്പെട്ട ദിവസത്തെക്കുറിച്ച് ഓര്‍ക്കുമ്പോഴും സോണിയയുടെ വാക്കുകളില്‍ നടുക്കമുണ്ടായിരുന്നു. വലിയ ശബ്ദം കേട്ട് ഓഫീസിലേക്ക് ഓടിയെത്തിയ താന്‍ കണ്ടത് രക്തത്തില്‍ കുളിച്ച് കിടക്കുന്ന അമ്മായിയമ്മയെയാണെന്ന് അവര്‍ ഓര്‍ത്തു. ആശുപത്രിയിലേക്കുള്ള യാത്ര അങ്ങേയറ്റം വേദനാജനകമായിരുന്നുവെന്നും, ആ നിമിഷത്തോടെ എല്ലാം അവസാനിച്ചുവെന്ന് തനിക്ക് മനസ്സിലായെന്നും സോണിയ ഗാന്ധി കൂട്ടിച്ചേര്‍ത്തു.
ബി.ജെ.പിയുടെ രൂക്ഷമായ പ്രതികരണം
സോണിയ ഗാന്ധിയുടെ അഭിമുഖം പുറത്തുവന്നതിന് പിന്നാലെ കോണ്‍ഗ്രസിനെതിരെ കടുത്ത ആക്രമണവുമായി ബി.ജെ.പി രംഗത്തെത്തി. ബാബറി മസ്ജിദ് പൊളിച്ചപ്പോള്‍ സോണിയ ഗാന്ധി കരഞ്ഞുവെന്ന വെളിപ്പെടുത്തലിനെതിരെ ബി.ജെ.പി ദേശീയ വക്താവ് പ്രദീപ് ഭണ്ഡാരി കടുത്ത വിമര്‍ശനമുന്നയിച്ചു.
വോട്ട് ബാങ്ക് രാഷ്ട്രീയം ലക്ഷ്യമാക്കി എന്തുചെയ്യാനും കോണ്‍ഗ്രസ് തയ്യാറാണെന്നും, പാര്‍ട്ടി എന്നും ഹിന്ദുക്കള്‍ക്ക് എതിരാണെന്നുമാണ് ബി.ജെ.പിയുടെ ആരോപണം. സോണിയയുടെ അഭിമുഖം ഇന്ത്യന്‍ രാഷ്ട്രീയത്തില്‍ പുതിയൊരു കോലാഹലത്തിനാണ് തിരികൊളുത്തിയിരിക്കുന്നത്.
