ശക്തമായ ആഭ്യന്തര ആവശ്യകത കണക്കിലെടുത്ത്, നടപ്പ് സാമ്പത്തിക വർഷത്തിൽ ഇന്ത്യയുടെ ജിഡിപി വളർച്ചാ പ്രവചനം 6.5 ശതമാനമായി എസ് ആൻഡ് പി ഗ്ലോബൽ റേറ്റിംഗുകൾ ചൊവ്വാഴ്ച നിലനിർത്തി. ഈ സാമ്പത്തിക വർഷത്തേക്കുള്ള പണപ്പെരുപ്പ പ്രവചനം 3.2 ശതമാനമായി പരിഷ്കരിച്ചതിനാൽ, ഈ സാമ്പത്തിക വർഷത്തിൽ ആർബിഐ 25 ബേസിസ് പോയിന്റ് നിരക്ക് കുറക്കുമെന്ന് എസ് ആൻഡ് പി അറിയിച്ചു.
ഏപ്രിൽ- ജൂൺ പാദത്തിൽ ഇന്ത്യയുടെ ജിഡിപി 7.8 ശതമാനമായി വളർന്നു. “ഈ സാമ്പത്തിക വർഷം (2026 മാർച്ച് 31ന് അവസാനിക്കുന്ന വർഷം) ഇന്ത്യയുടെ ജിഡിപി വളർച്ച 6.5 ശതമാനമായി സ്ഥിരമായി തുടരുമെന്ന് ഞങ്ങൾ പ്രവചിക്കുന്നു, -എസ് ആൻഡ് പി ഒരു പ്രസ്താവനയിൽ പറഞ്ഞു.
അനുകൂലമായ മൺസൂൺ സീസൺ, വരുമാനത്തിലെയും ചരക്ക് സേവന നികുതിയിലെയും വെട്ടിക്കുറവുകൾ, സർക്കാർ നിക്ഷേപം ത്വരിതപ്പെടുത്തൽ എന്നിവയുടെ പിന്തുണയോടെ ആഭ്യന്തര ആവശ്യം ശക്തമായി തുടരുമെന്ന് ഞങ്ങൾ പ്രതീക്ഷിക്കുന്നു,” -പ്രസ്താവനയിൽ പറഞ്ഞു.
ഭക്ഷ്യ പണപ്പെരുപ്പത്തിൽ പ്രതീക്ഷിച്ചതിലും വലിയ കുറവ് നടപ്പ് വർഷം പണപ്പെരുപ്പം കുറക്കാൻ സഹായിക്കുമെന്ന് എസ് & പി പറഞ്ഞു. “ഇത് കൂടുതൽ പണനയ ക്രമീകരണങ്ങൾക്ക് ഇടം നൽകുന്നു. കൂടാതെ റിസർവ് ബാങ്ക് ഈ സാമ്പത്തിക വർഷം 25 ബേസിസ് പോയിന്റ് നിരക്ക് കുറക്കുമെന്ന് ഞങ്ങൾ പ്രതീക്ഷിക്കുന്നു,” -എസ് & പി കൂട്ടിച്ചേർത്തു.
യുഎസ് ഇറക്കുമതി തീരുവയിലെ വർദ്ധനവും ആഗോള വളർച്ചയുടെ വേഗതയും മൂലം ശക്തമായ ബാഹ്യ പ്രതിസന്ധികളുടെ ആഘാതം മേഖലയിൽ ഉടനീളം താരതമ്യേന സ്ഥിരതയുള്ള ആഭ്യന്തര ആവശ്യം കുറക്കുമെന്ന് എസ് & പി അതിൻ്റെ എക്കണോമിക് ഔട്ട്ലുക്ക് ഏഷ്യ- പസഫിക് ക്യു 4 2025: ഗ്രോത്ത് ഈസ് ഓൺ എക്സ്റ്റേണൽ സ്ട്രെയിൻ റിപ്പോർട്ടിൽ പറഞ്ഞു.
വിവിധ ഏഷ്യൻ സമ്പദ്വ്യവസ്ഥകളിൽ നിന്നുള്ള ഇറക്കുമതികൾക്കുള്ള യുഎസ് തീരുവകൾ അവയുടെ കയറ്റുമതി കാഴ്ചപ്പാടിനെയും പ്രാദേശിക വിതരണ ശൃംഖലകളിലെ പങ്കിനെയും രൂപപ്പെടുത്തും.
“ജൂണിലെ യുഎസ് താരിഫുകളെ കുറിച്ചുള്ള ഞങ്ങളുടെ അനുമാനങ്ങളുമായി താരതമ്യപ്പെടുത്തുമ്പോൾ, ചൈന ഇതുവരെ മറ്റ് ഏഷ്യൻ സമ്പദ്വ്യവസ്ഥകളേക്കാൾ അൽപ്പം മെച്ചപ്പെട്ട നിലയിലാണ് പ്രവർത്തിച്ചത്. തെക്കുകിഴക്കൻ ഏഷ്യൻ വളർന്നുവരുന്ന വിപണികൾ അൽപ്പം മോശമാണ്. ഇന്ത്യ പ്രതീക്ഷിച്ചതിലും വളരെ വലിയ തിരിച്ചടിയാണ് നേരിട്ടത്,” -എസ് ആൻഡ് പി പറഞ്ഞു.
