ഇന്ത്യയുടെ സ്വാതന്ത്ര്യസമര നായകൻ സുഭാഷ് ചന്ദ്രബോസ്ന്റെ നേതൃത്വത്തിലുള്ള ഇന്ത്യൻ നാഷണൽ ആർമി (ഐഎൻഎ) സ്വാതന്ത്ര്യം നേടുന്നതിൽ നിർണായക പങ്കുവഹിച്ചുവെന്ന് പ്രഖ്യാപിക്കണമെന്നാവശ്യപ്പെട്ട പൊതുതാൽപ്പര്യ ഹർജി (PIL) സുപ്രീം കോടതി തിങ്കളാഴ്ച തള്ളി.
അതോടൊപ്പം, നേതാജിയെ ‘ദേശീയ പുത്രൻ’ ആയി പ്രഖ്യാപിക്കണം, അദ്ദേഹത്തിന്റെ ജന്മദിനമായ ജനുവരി 23-നും ഐഎൻഎയുടെ സ്ഥാപക ദിനമായ ഒക്ടോബർ 21-നും ദേശീയ ദിനങ്ങളാക്കണം, കട്ടക്കിലെ ജന്മസ്ഥലം ദേശീയ മ്യൂസിയമാക്കണം തുടങ്ങിയ ആവശ്യങ്ങളും കോടതി നിരസിച്ചു.
ചീഫ് ജസ്റ്റിസ് ഓഫ് ഇന്ത്യ സൂര്യകാന്ത്യും ജസ്റ്റിസ് ജോയ്മല്യ ബാഗ്ചിയും അടങ്ങുന്ന ബെഞ്ചാണ് ഹർജി പരിഗണിച്ചത്. ഹർജിക്കാരൻ പിനക്പാണി മൊഹന്തി സമർപ്പിച്ച അപേക്ഷ, സമാനമായ വിഷയങ്ങളിൽ മുമ്പ് തന്നെ ഹർജികൾ തള്ളിയിട്ടുണ്ടെന്ന് ചൂണ്ടിക്കാട്ടിയാണ് കോടതി നിരസിച്ചത്.
ഹർജി പരിഗണിക്കാനാകില്ലെന്ന് വ്യക്തമാക്കിയ ബെഞ്ച്, പൊതുതാൽപ്പര്യ ഹർജിയുടെ അധികാരപരിധി ദുരുപയോഗം ചെയ്യരുതെന്നും മുന്നറിയിപ്പ് നൽകി. “ഇത്തരം ഹർജികൾ പ്രശസ്തിക്കായി ഉപയോഗിക്കുന്നുവെന്ന് തോന്നുന്നു. ചരിത്രപരമായോ രാഷ്ട്രീയപരമായോ വിഷയങ്ങളിൽ കോടതി പ്രഖ്യാപനങ്ങൾ നടത്താൻ കഴിയില്ല,” എന്നും കോടതി നിരീക്ഷിച്ചു.
സമാന വിഷയങ്ങളിൽ ആവർത്തിച്ച് ഹർജികൾ സമർപ്പിക്കുന്ന പ്രവണതയെക്കുറിച്ചും സുപ്രീം കോടതി വിമർശനം ഉയർത്തി. ഇത്തരം ഹർജികൾ ഇനി രജിസ്റ്റർ ചെയ്യാതിരിക്കണമെന്നും രജിസ്ട്രിയോട് നിർദേശിച്ചു.
നേരത്തെ, സുഭാഷ് ചന്ദ്രബോസിന്റെ അന്ത്യസ്ഥിതി സംബന്ധിച്ചും അദ്ദേഹത്തിന്റെ ഭൗതികാവശിഷ്ടങ്ങൾ ഇന്ത്യയിലേക്ക് കൊണ്ടുവരണമെന്നാവശ്യപ്പെട്ടും സമർപ്പിച്ച ഹർജികളും കോടതി തള്ളിയിരുന്നു. ഈ വിഷയങ്ങളിൽ നിയമപരമായ അവകാശവാദങ്ങൾ അദ്ദേഹത്തിന്റെ കുടുംബാംഗങ്ങൾ മുന്നോട്ട് കൊണ്ടുപോകണമെന്ന് കോടതി മുമ്പ് വ്യക്തമാക്കിയിരുന്നു. നേതാജിയുടെ പാരമ്പര്യത്തോട് ബഹുമാനം പ്രകടിപ്പിച്ചുകൊണ്ടുതന്നെ, ഇത്തരം ഹർജികളുടെ സ്വഭാവവും സമയവും സംബന്ധിച്ച് കോടതി വീണ്ടും മുന്നറിയിപ്പ് നൽകി.
