Warning: Cannot modify header information - headers already sent in /home1/nalamida/public_html/wp-content/plugins/gtranslate/gtranslate.php on line 90
സമീക്ഷ യുകെ മൂന്നാമത് വടംവലി മത്സരം; കിരീടം ചൂടി സ്റ്റോക്ക് ലയൺ വാരിയർസ് | Nalamidam
3 November 2026
Home News International സമീക്ഷ യുകെ മൂന്നാമത് വടംവലി മത്സരം; കിരീടം ചൂടി സ്റ്റോക്ക് ലയൺ വാരിയർസ്

സമീക്ഷ യുകെ മൂന്നാമത് വടംവലി മത്സരം; കിരീടം ചൂടി സ്റ്റോക്ക് ലയൺ വാരിയർസ്

പന്ത്രണ്ടു ടീമുകൾ മാറ്റുരച്ച ടൂർണമെൻറ്റിൽ വൂസ്റ്റർ തെമ്മാടിസ് മൂന്നാം സ്ഥാനവും സ്റ്റോക്ക് ലയൺ ചാമ്പ്യൻസ് നാലാം സ്ഥാനവും നേടി.

605

ന്യൂപോർട്ട്: സമീക്ഷ യുകെ സംഘടിപ്പിച്ച മൂന്നാമത് വടംവലി മത്സരത്തിൽ സ്റ്റോക്ക് ലയൺ വാരിയർസ് കിരീടം ചൂടി. ന്യൂപോർട്ടിലെ അങ്കത്തട്ടിൽ തീപാറിയ പോരാട്ടത്തിൽ ഈ വർഷത്തെ വടംവലിയിലെ തലതൊട്ടപ്പൻമാർ തങ്ങൾ തന്നെയെന്ന് സ്റ്റോക്ക് ലയൺ വാരിയർസ് തെളിയിച്ചു.

വാശിയേറിയ ഫൈനൽ പോരാട്ടത്തിൽ നിലവിലെ ചാമ്പ്യന്മാരായ ഹെരിഫോർഡ് അച്ചായൻസിനെ മുട്ടുകുത്തിച്ചാണ് സ്റ്റോക്ക് ലയൺ വാരിയർസ് കിരീടം സ്വന്തമാക്കിയത്. കഴിഞ്ഞ രണ്ടു തവണ തുടർച്ചയായി സമീക്ഷയുടെ കപ്പ് ഉയർത്തിയ അച്ചായൻസിനു ഇതോടെ എവർ റോളിംഗ് ട്രോഫി സ്വന്തമാക്കാനുള്ള അവസരം നഷ്ടമായി.

പന്ത്രണ്ടു ടീമുകൾ മാറ്റുരച്ച ടൂർണമെൻറ്റിൽ വൂസ്റ്റർ തെമ്മാടിസ് മൂന്നാം സ്ഥാനവും സ്റ്റോക്ക് ലയൺ ചാമ്പ്യൻസ് നാലാം സ്ഥാനവും നേടി. അഞ്ചാം സ്ഥാനം കൊമ്പൻസ് ബ്ലൂ കരസ്ഥമാക്കി. ആറും ഏഴും എട്ടും സ്ഥാനങ്ങൾ യഥാക്രമം ചലഞ്ചേഴ്‌സ് സാലിസ്ബറി, റോവേഴ്സ് എക്സിറ്റർ, ടീം ലിവർപൂൾ എന്നിവർ നേടി.

ഫെയർ പ്ലേ അവാർഡ് റോവേഴ്സ് എക്സിറ്റർ ടീം സ്വന്തമാക്കി. മികച്ച കമ്പവലിക്കാരനായി ഹെരിഫോർഡ് അച്ചായൻസിലെ അനൂപ് മത്തായി ഈ വർഷവും തെരഞ്ഞെടുക്കപ്പെട്ടു. യുകെ ചരിത്രത്തിലെ ഏറ്റവും വലിയ ആറടി ഉയരമുള്ള ട്രോഫിയും, അഞ്ച് അടി വലിപ്പമുള്ള ഏറ്റവും വലിയ എവർ റോളിംഗ് ട്രോഫിയും സമീക്ഷ വിജയികൾക്കായി ഒരുക്കിയിരുന്നു.

ഒന്നാം സ്ഥാനക്കാർക്ക് 1501 പൗണ്ടും ട്രോഫിയും, രണ്ടാം സ്ഥാനക്കാർക്ക് 1001 പൗണ്ടും, മൂന്നാം സ്ഥാനക്കാർക്ക് 751 പൗണ്ടും, നാലാം സ്ഥാനക്കാർക്ക് 501 പൗണ്ടും സമ്മാനിച്ചു. അഞ്ചു മുതൽ എട്ട് സ്ഥാനങ്ങളിലെ ടീമുകൾക്ക് പ്രോത്സാഹന സമ്മാനമായി 151 പൗണ്ട് വീതം നൽകി. ഫെയർ പ്ലേ അവാർഡിനും മികച്ച വടംവലിക്കാരനും 101 പൗണ്ട് വീതം സമ്മാനിച്ചു.

സമീക്ഷ നാഷണൽ ട്രഷറർ അഡ്വ. ദിലീപ് കുമാർ അധ്യക്ഷനായ ചടങ്ങിൽ കാര്ഡിഫ് & വെയിൽസ്‌ യൂണിറ്റ് സെക്രട്ടറി രാകേഷ് രവി സ്വാഗതം പറഞ്ഞു. സമീക്ഷ നാഷണൽ ജോയിന്റ് സെക്രട്ടറി ഉണ്ണികൃഷ്ണൻ ബാലൻ ആശംസകൾ അർപ്പിച്ചു. കാര്ഡിഫ് & വെയിൽസ്‌ യൂണിറ്റ് പ്രസിഡന്റ് പ്രിൻസ് എം ജോർജ് നന്ദി രേഖപ്പെടുത്തി.

സെബാസ്റ്റ്യൻ എബ്രഹാമും അരവിന്ദ് സതീഷും ചേർന്ന് മത്സരം നിയന്ത്രിച്ചു. അനൗൺസ്മെൻ്റ് ചടുലമായി അവതരിപ്പിച്ചത് സാലിസ്ബറിയിൽ നിന്നുള്ള ജയേഷ് അഗസ്റ്റിൻ ആയിരുന്നു. യുകെയിലെ വിവിധ ഭാഗങ്ങളിൽ നിന്ന് നിരവധി ആളുകൾ ന്യൂപോർട്ടിൽ എത്തിയിരുന്നു. മത്സരത്തിന്റെ മികച്ച സംഘാടന ശേഷിയും ശ്രദ്ധ നേടി.