കഴിഞ്ഞ തിങ്കളാഴ്ച ഓവൽ ഓഫീസിൽ സാൽവഡോറൻ പ്രസിഡന്റ് നയിബ് ബുകെലെയുമായുള്ള യുഎസ് പ്രസിഡന്റ് ഡൊണാൾഡ് ട്രംപിന്റെ പത്രസമ്മേളനത്തിൽ നിന്ന് തങ്ങളുടെ പത്രപ്രവർത്തകനെയും ഫോട്ടോഗ്രാഫറെയും വിലക്കിയതായി അസോസിയേറ്റഡ് പ്രസ് റിപ്പോർട്ട് ചെയ്തു. കോടതി ഉത്തരവ് ഉണ്ടായിരുന്നിട്ടും എപി വാർത്താ സംഘത്തെ വൈറ്റ് ഹൗസ് ഒഴിവാക്കുകയായിരുന്നു .
ഈ ഫെബ്രുവരിയിൽ, മെക്സിക്കോ ഉൾക്കടലിനെ ട്രംപ് ആവശ്യപ്പെട്ടപോലെ ‘അമേരിക്ക ഉൾക്കടൽ’ എന്ന് പരാമർശിക്കാൻ വാർത്താ ഏജൻസി വിസമ്മതിച്ചതിനെത്തുടർന്ന് ട്രംപ് എപിയെ മിക്ക പ്രസിഡന്റ് പരിപാടികളിൽ നിന്നും വിലക്കുകയായിരുന്നു .
“ലോകമെമ്പാടും വിവരങ്ങൾ പ്രചരിപ്പിക്കുന്ന ഒരു ആഗോള വാർത്താ ഏജൻസി എന്ന നിലയിൽ, സ്ഥലനാമങ്ങളും ഭൂമിശാസ്ത്രവും എല്ലാ പ്രേക്ഷകർക്കും എളുപ്പത്തിൽ തിരിച്ചറിയാൻ കഴിയുന്നുണ്ടെന്ന് എപി ഉറപ്പാക്കണം,” എന്ന് മാധ്യമം അന്ന് പറഞ്ഞു.
കഴിഞ്ഞ ആഴ്ച, വാഷിംഗ്ടൺ ഡിസിയിലെ ഒരു ഫെഡറൽ കോടതി മാധ്യമ നിരോധനം ഒന്നാം ഭേദഗതിയുടെ ലംഘനമാണെന്ന് വിധിച്ചു. “ഒന്നാം ഭേദഗതി പ്രകാരം, സർക്കാർ ചില പത്രപ്രവർത്തകർക്ക് വാതിൽ തുറന്നാൽ –അത് ഓവൽ ഓഫീസിലേക്കായാലും, ഈസ്റ്റ് റൂമിലേക്കായാലും, അല്ലെങ്കിൽ മറ്റെവിടെയെങ്കിലുമായാലും -“അങ്ങനെയെങ്കിൽ, അവരുടെ കാഴ്ചപ്പാടുകൾ കാരണം മറ്റ് പത്രപ്രവർത്തകർക്ക് ആ വാതിലുകൾ അടയ്ക്കാൻ കഴിയില്ല,” ജഡ്ജി ട്രെവർ എൻ. മക്ഫാഡൻ എഴുതി. വൈറ്റ് ഹൗസ് വിധിക്കെതിരെ അപ്പീൽ നൽകി .
അതേസമയം, എപിയുടെ റിപ്പോർട്ടർമാർക്ക് ഓവൽ ഓഫീസിൽ നിന്നും എയർഫോഴ്സ് വണ്ണിൽ നിന്നും വിലക്ക് തുടരുന്നുണ്ടെങ്കിലും വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റിന്റെ ബ്രീഫിംഗുകൾ ഉൾപ്പെടെ മറ്റ് സ്ഥലങ്ങളിലേക്ക് ഇടയ്ക്കിടെ പ്രവേശനം ലഭിക്കുന്നുണ്ടെന്ന് എപി റിപ്പോർട്ട് ചെയ്യുന്നു.
