പഹല്ഗാം ഭീകരാക്രമണത്തിന് പിന്നാലെ ഇന്ത്യയും പാകിസ്ഥാനും തമ്മിലുള്ള ബന്ധം വഷളാകുന്നതിനിടെ ആയുധങ്ങളുമായി തുര്ക്കിയുടെ സൈനിക വിമാനങ്ങൾ പാകിസ്ഥാനില് എത്തിയതായി റിപ്പോർട്ട്. തുര്ക്കി വ്യോമസേന ഉപയോഗിക്കുന്ന ഹെര്ക്കുലീസ് സി-130 ചരക്ക് വിമാനമാണ് പാകിസ്ഥാനിലെത്തിയത്.
പടക്കോപ്പുകള്, ആയുധങ്ങള്, ഡ്രോണുകള്, ഇലക്ട്രോണിക് വാര്ഫെയര് സംവിധാനങ്ങള്, ടാങ്ക് വേധ മിസൈലുകള് തുടങ്ങിയവ പാകിസ്ഥാനിൽ എത്തിച്ചതായാണ് റിപ്പോർട്ടുകൾ സൂചിപ്പിക്കുന്നത്.
പാക് സൈന്യത്തിൻ്റെ ആയുധങ്ങളും മറ്റും കൈകാര്യം ചെയ്യുന്ന രഹസ്യ കേന്ദ്രങ്ങളുള്ള കറാച്ചിയിലാണ് വിമാനം എത്തിയത്. പാകിസ്ഥാനും തുര്ക്കിയും തമ്മില് പ്രതിരോധ സഹകരണമുണ്ട്. തുര്ക്കിയുടെ ബെയ്റാക്തര് ഡ്രോണുകള് പാകിസ്ഥാൻ സൈന്യം കാര്യമായി ഉപയോഗിക്കുന്നുണ്ട്.
പാകിസ്ഥാനിൽ നിന്ന് പുറത്തുവരുന്ന വിവരങ്ങള് പ്രകാരം ആറ് ഹെര്കുലീസ് സി-130 വിമാനങ്ങളാണ് കറാച്ചിയിൽ ഇറങ്ങിയത്. ബെയ്റാക്തറിന് പുറമെ തുര്ക്കിയുടെ പുതിയ ലോയിറ്ററിങ് അമ്യുണിഷനുകളും പാകിസ്ഥാൻ വാങ്ങിയെന്നും സ്ഥിരീകരിക്കാത്ത റിപ്പോർട്ടുണ്ട്.
