തിരുവനന്തപുരം: വിജിലൻസിലെ ‘ടി’ ബ്രാഞ്ചിനെ വിവരാവകാശ നിയമത്തിന്റെ പരിധിയിൽ നിന്ന് ഒഴിവാക്കിയ സർക്കാർ നടപടിക്കെതിരെ രൂക്ഷവിമർശനവുമായി സിപിഐഎം നേതാവ് പിണറായി വിജയൻ. അധികാരത്തിൽ എത്തി ചുരുങ്ങിയ കാലത്തിനുള്ളിൽ നടത്തിയതും വരുംദിവസങ്ങളിൽ നടത്താൻ ഉദ്ദേശിക്കുന്നതുമായ അഴിമതികൾ മറച്ചുവെക്കാനാണ് യുഡിഎഫ് സർക്കാർ വിവരാവകാശ നിയമത്തെ ദുർബലപ്പെടുത്തുന്നതെന്ന് അദ്ദേഹം കുറ്റപ്പെടുത്തി. ഫേസ്ബുക്ക് കുറിപ്പിലൂടെയാണ് അദ്ദേഹം സർക്കാരിനെതിരെ രംഗത്തെത്തിയത്.
വിജിലൻസ് രേഖകൾ പുറത്തുവന്നതിന് പിന്നാലെയാണ് ഇതുസംബന്ധിച്ച വിജ്ഞാപനം ഇറങ്ങിയതെന്നും, അഴിമതി ആരോപണങ്ങൾ നേരിടുന്നവരെ സംരക്ഷിക്കാനുള്ള ബോധപൂർവ്വമായ നീക്കമാണിതെന്നും പിണറായി വിജയൻ ആരോപിച്ചു. രാഷ്ട്രീയ നേതാക്കളുടെയും ജനപ്രതിനിധികളുടെയും അഴിമതിയുമായി ബന്ധപ്പെട്ട ഫയലുകൾ പൊതുജനങ്ങളിൽ നിന്ന് മറച്ചുവെക്കാനാണ് ഈ ഇടപെടലെന്നും അദ്ദേഹം കൂട്ടിച്ചേർത്തു.
‘അഴിമതി നടത്തുന്നവർക്ക് കുടപിടിക്കുന്നു’
വിവരാവകാശ നിയമം തങ്ങളുടെ വലിയ നേട്ടമായി കൊട്ടിഘോഷിച്ച കോൺഗ്രസ് ഇപ്പോൾ അതേ നിയമത്തെ ദുർബലപ്പെടുത്തുകയാണ്. സ്വന്തം അഴിമതികൾ പുറത്തുവരുമെന്ന ഭയമാണ് കോൺഗ്രസ് നേതൃത്വത്തെ നയിക്കുന്നത്. യുപിഎ ഭരണകാലത്ത് വിവരാവകാശ നിയമം നടപ്പാക്കുന്നതിൽ ഇടതുപക്ഷം നിർണായകമായ സമ്മർദ്ദവും ഇടപെടലും നടത്തിയിരുന്നുവെന്നും, എന്നാൽ ഇന്ന് ജനങ്ങളുടെ അറിയാനുള്ള അവകാശം സംരക്ഷിക്കുന്നതിൽ നിന്ന് കോൺഗ്രസ് പിന്നോട്ടുപോവുകയാണെന്നും അദ്ദേഹം ചൂണ്ടിക്കാട്ടി.
വിജ്ഞാപനത്തിന് പിന്നിൽ രാഷ്ട്രീയ ലക്ഷ്യം
മുഖ്യമന്ത്രിക്കെതിരായ വിജിലൻസ് രേഖകൾ പുറത്തുവന്നതിനു പിന്നാലെ ഈ വിജ്ഞാപനം ഇറങ്ങിയതിനെ പിണറായി വിജയൻ ചോദ്യം ചെയ്തു. ഭരണത്തിന്റെ തണലിൽ അഴിമതി നടത്തുന്നവരെ സംരക്ഷിക്കാൻ സർക്കാർ കാണിക്കുന്ന തിടുക്കമാണ് ഇതിലൂടെ വ്യക്തമാകുന്നതെന്നും അദ്ദേഹം പറഞ്ഞു.
ഭരണത്തിലെ സുതാര്യതയെയും ഉത്തരവാദിത്തത്തെയും ഒരു സർക്കാർ ഭയപ്പെടുന്നുണ്ടെങ്കിൽ അതിന് പിന്നിലെ യഥാർത്ഥ കാരണങ്ങൾ പരിശോധിക്കപ്പെടണം. ജനങ്ങളുടെ അറിയാനുള്ള അവകാശത്തിന് മേൽ നിയന്ത്രണം ഏർപ്പെടുത്തി അഴിമതിക്കാരെ സംരക്ഷിക്കാനുള്ള ഈ നീക്കം കേരളത്തിലെ ജനങ്ങൾ അംഗീകരിക്കില്ലെന്നും പിണറായി വിജയൻ വ്യക്തമാക്കി.
എഐസിസി നിലപാട് വ്യക്തമാക്കണം
വിവരാവകാശ നിയമത്തിന്റെ പരിധി വെട്ടിക്കുറച്ച നടപടിയിൽ കോൺഗ്രസിന്റെ ദേശീയ നേതൃത്വമായ എഐസിസി നിലപാട് വ്യക്തമാക്കണമെന്ന് അദ്ദേഹം ആവശ്യപ്പെട്ടു. കേരളത്തിലെ ജനങ്ങളുടെ അറിയാനുള്ള അവകാശത്തെ ബാധിക്കുന്ന ഈ വിഷയത്തിൽ ദേശീയ നേതൃത്വം മൗനം പാലിക്കരുതെന്നും അദ്ദേഹം ഫേസ്ബുക്ക് കുറിപ്പിലൂടെ ആവശ്യപ്പെട്ടു.
വിജിലൻസിലെ ‘ടി’ ബ്രാഞ്ചിനെ വിവരാവകാശ നിയമത്തിൽ നിന്ന് ഒഴിവാക്കിക്കൊണ്ടുള്ള സർക്കാർ വിജ്ഞാപനമാണ് നിലവിൽ കേരളത്തിൽ വലിയ രാഷ്ട്രീയ വിവാദങ്ങൾക്ക് വഴിവെച്ചിരിക്കുന്നത്.
