ബ്രിട്ടീഷ് പ്രധാനമന്ത്രി കെയർ സ്റ്റാർമർ ചാഗോസ് ദ്വീപുകളുടെ പരമാധികാരം മൗറീഷ്യസിന് കൈമാറുന്ന കരാറിൽ ഒപ്പുവച്ചു. എന്നാൽ , ഡീഗോ ഗാർസിയ ദ്വീപിലെ സംയുക്ത സൈനിക താവളത്തിന്റെ നിയന്ത്രണം 99 വർഷത്തേക്ക് പ്രാരംഭ കാലയളവിൽ അമേരിക്കയും ലണ്ടനും നിലനിർത്താൻ ഈ കരാർ അനുവദിക്കുന്നു.
മാലദ്വീപ് ദ്വീപസമൂഹത്തിന് ഏകദേശം 310 മൈൽ തെക്കായി ഇന്ത്യൻ മഹാസമുദ്രത്തിലെ 60 ലധികം ദ്വീപുകൾ ഉൾക്കൊള്ളുന്ന ചാഗോസ് ദ്വീപസമൂഹത്തെ 1968 ൽ മൗറീഷ്യസ് സ്വാതന്ത്ര്യം നേടുന്നതിനു മുൻപ് 1965 ൽ യുകെ മൗറീഷ്യസിൽ നിന്ന് വേർപെടുത്തിയിരുന്നു. അതിനുശേഷം, മൗറീഷ്യസ് ഈ പ്രദേശം തിരിച്ചുപിടിക്കാൻ ശ്രമിച്ചു. 1966 ൽ, ഏറ്റവും വലിയ ദ്വീപായ ഡീഗോ ഗാർസിയ യുഎസിന് പാട്ടത്തിന് നൽകി, ഏകദേശം 2,000 നിവാസികളെ കുടിയിറക്കി.
നിലവിൽ ഡീഗോ ഗാർഷ്യയുടെ തന്ത്രപരമായ പ്രാധാന്യം കെയർ സ്റ്റാർമർ ഊന്നിപ്പറഞ്ഞു, “ഇറാഖിലെയും അഫ്ഗാനിസ്ഥാനിലെയും ഭീകരരെ പരാജയപ്പെടുത്താൻ വിമാനങ്ങൾ വിന്യസിക്കുന്നത് മുതൽ ചെങ്കടലിലും ഇന്തോ-പസഫിക്കിലും ഭീഷണികൾ മുൻകൂട്ടി കാണുന്നത് വരെ, ഈ താവളത്തിന്റെ തന്ത്രപരമായ സ്ഥാനം ബ്രിട്ടന് അത്യധികം പ്രാധാന്യമർഹിക്കുന്നു”
യുകെയിലെ നോർത്ത്വുഡ് സൈനിക ആസ്ഥാനത്ത് നിന്ന് സംസാരിച്ച സ്റ്റാർമർ, താവളത്തിന്റെ തന്ത്രപരമായ പ്രാധാന്യം തിരിച്ചറിഞ്ഞുകൊണ്ട്, യുഎസ് പ്രസിഡന്റ് ഡൊണാൾഡ് ട്രംപും കരാറിനെ പിന്തുണയ്ക്കുന്നുവെന്ന് പ്രസ്താവിച്ചു. മൗറീഷ്യസ് പ്രധാനമന്ത്രി നവീൻ റാംഗൂലം കരാറിനെ ഒരു ചരിത്രപരമായ ചുവടുവയ്പ്പായി പ്രശംസിച്ചു, “ഈ കരാറോടെ, ഞങ്ങൾ അപകോളനീകരണ പ്രക്രിയ പൂർത്തിയാക്കുകയാണ്” എന്ന് പറഞ്ഞു.
അതേസമയം , കൺസർവേറ്റീവ് പാർട്ടി വിദേശകാര്യ വക്താവ് പ്രീതി പട്ടേൽ ഉൾപ്പെടെയുള്ള കരാറിന്റെ വിമർശകർ വാദിച്ചത് ഇത് ചെലവേറിയതാണെന്നും മേഖലയിലെ തന്ത്രപരമായ സ്വാധീനം ചൈനയ്ക്ക് വിട്ടുകൊടുക്കുന്നത് അപകടകരമാണെന്നും ആയിരുന്നു. പട്ടേൽ ഇതിനെ “ലേബർ ചാഗോസ് സറണ്ടർ ഡീൽ” എന്ന് വിളിച്ചു, ഇത് യുകെ പ്രതിരോധത്തിനും, രാജ്യത്തിന്റെ നികുതിദായകർക്കും, ബ്രിട്ടീഷ് ചാഗോസിയക്കാർക്കും മോശമാണ്എന്ന് പറഞ്ഞു.
റോയിട്ടേഴ്സ് റിപ്പോർട്ട് ചെയ്യുന്നതനുസരിച്ച്, 99 വർഷത്തേക്ക് കരാറിന്റെ ആകെ മൂല്യം 3.9 ബില്യൺ ഡോളർ (3 ബില്യൺ പൗണ്ട്) ആയിരിക്കും. ഡീഗോ ഗാർസിയയ്ക്ക് ചുറ്റുമുള്ള നിലവിലുള്ള 24 മൈൽ ബഫർ സോൺ ഈ കരാറിൽ ഉൾപ്പെടുന്നു, അവിടെ യുകെയുടെ അനുമതിയില്ലാതെ ഒരു നിർമ്മാണവും നടത്താൻ കഴിയില്ല. ഇരു കക്ഷികളും ഒരു കരാറിൽ എത്തിയാൽ, പാട്ടക്കരാർ 40 വർഷത്തേക്ക് കൂടി നീട്ടാനുള്ള ഓപ്ഷനുമുണ്ട്.
