യുഎസിന്റെ ഏറ്റവും വലിയ ഹൈപ്പർസോണിക് റോക്കറ്റ് കാർഗോ പദ്ധതി പരിസ്ഥിതി പ്രവർത്തകരിൽ നിന്ന് ശക്തമായ പ്രതിഷേധം നേരിട്ടു. പരിസ്ഥിതി പ്രശ്നങ്ങൾ കാരണം എലോൺ മസ്കിന്റെ സ്പേസ് എക്സുമായി സഹകരിച്ച് നടത്താൻ പദ്ധതിയിട്ടിരുന്ന പരീക്ഷണങ്ങൾ താൽക്കാലികമായി നിർത്തിവയ്ക്കുന്നതായി യുഎസ് വ്യോമസേന പ്രഖ്യാപിച്ചു.
പസഫിക് സമുദ്രത്തിലെ വിദൂര വന്യജീവി സങ്കേതമായ ജോൺസ്റ്റൺ അറ്റോൾ ദ്വീപിൽ പരീക്ഷണങ്ങൾ നടത്താനാണ് ആദ്യം പദ്ധതിയിട്ടിരുന്നത്. ഹവായിയിൽ നിന്ന് ഏകദേശം 1,300 കിലോമീറ്റർ തെക്ക് പടിഞ്ഞാറായിട്ടാണ് ഈ ദ്വീപ് സ്ഥിതി ചെയ്യുന്നത്. ദശലക്ഷക്കണക്കിന് കടൽ പക്ഷികളുടെ ആവാസ കേന്ദ്രമാണിത്. ഈ പ്രദേശത്തെ ഹൈപ്പർസോണിക് റോക്കറ്റ് പരീക്ഷണങ്ങൾ ഈ പക്ഷികളുടെ ജീവന് ഗുരുതരമായ ഭീഷണി ഉയർത്തുമെന്ന് ജീവശാസ്ത്രജ്ഞരും പരിസ്ഥിതി വിദഗ്ധരും ആശങ്കകൾ പ്രകടിപ്പിച്ചിട്ടുണ്ട്.
പരിസ്ഥിതി പ്രവർത്തകരുടെ ശക്തമായ എതിർപ്പിനെത്തുടർന്ന്, യുഎസ് വ്യോമസേന പിന്മാറി. പദ്ധതിക്കായി പാരിസ്ഥിതിക ആഘാത വിലയിരുത്തൽ റിപ്പോർട്ട് പുറത്തിറക്കാൻ വ്യോമസേന പദ്ധതിയിട്ടിരുന്നു. എന്നാലും , പരിസ്ഥിതി ഗ്രൂപ്പുകളുടെ സമ്മർദ്ദം കാരണം ഈ പ്രക്രിയയും വൈകി. ഒടുവിൽ, പക്ഷി സംരക്ഷണത്തിന് അനുകൂലമായി ഈ സുപ്രധാന പദ്ധതി താൽക്കാലികമായി നിർത്തിവയ്ക്കാൻ തീരുമാനിച്ചതായി പ്രമുഖ അമേരിക്കൻ സൈനിക മാസികയായ സ്റ്റാർസ് ആൻഡ് സ്ട്രൈപ്സിലെ ഒരു റിപ്പോർട്ട് പറയുന്നു.
