വി.കെ. പ്രശാന്ത് എംഎൽഎക്ക് 25,000 രൂപ ഓഫീസ് അലവൻസായി ലഭിക്കുന്നുവെന്ന തരത്തിലുള്ള പ്രചാരണങ്ങൾ അസത്യമാണെന്ന് വിവരാവകാശ രേഖകൾ വ്യക്തമാക്കുന്നു. എംഎൽഎമാർക്ക് ഓഫീസ് വാടകയ്ക്കോ പ്രത്യേക ഓഫീസ് അലവൻസായോ തുക നൽകുന്നില്ലെന്നാണ് വിവരാവകാശ മറുപടിയിൽ വ്യക്തമാക്കുന്നത്.
കഴിഞ്ഞ ദിവസം വട്ടിയൂർക്കാവ് എംഎൽഎയോട് കൗൺസിലർ ആർ. ശ്രീലേഖ ഓഫീസ് ഒഴിയാൻ ആവശ്യപ്പെട്ട സംഭവത്തെ തുടർന്ന് സമൂഹമാധ്യമങ്ങളിൽ വലിയ ചർച്ചകൾ ഉണ്ടായിരുന്നു. എന്നാൽ കൃത്യമായ വാടക നൽകി തന്നെയാണ് ഓഫീസ് പ്രവർത്തിക്കുന്നതെന്നും, കരാർ കാലാവധി പൂർത്തിയാകുന്നതിന് മുമ്പ് ഓഫീസ് ഒഴിയില്ലെന്നും വി.കെ. പ്രശാന്ത് നേരത്തെ വ്യക്തമാക്കിയിരുന്നു.
ഇതിന് പിന്നാലെ എംഎൽഎയ്ക്കെതിരെ സമൂഹമാധ്യമങ്ങളിൽ കുപ്രചാരണങ്ങൾ വ്യാപകമായി പ്രചരിച്ചു. ഓഫീസ് അലവൻസായി തുക ലഭിക്കുന്നുവെന്നും, വാടകയിനത്തിൽ വളരെ കുറച്ച് തുകയേ എംഎൽഎ നൽകുന്നുള്ളുവെന്നും ആയിരുന്നു ആരോപണങ്ങൾ.
ഇത് സംബന്ധിച്ച് നൽകിയ വിവരാവകാശ അപേക്ഷയിൽ എംഎൽഎമാർക്ക് ഓഫീസ് വാടകയിനത്തിൽ പ്രത്യേക തുക നൽകുന്നുണ്ടോയെന്നതാണ് പ്രധാനമായും പരിശോധിച്ചത്. എന്നാൽ അത്തരത്തിൽ യാതൊരു തുകയും നൽകുന്നില്ലെന്നും, അനുവദിക്കുന്നതെല്ലാം മണ്ഡലം അലവൻസായി മാത്രമാണെന്നും വിവരാവകാശ രേഖയിൽ വ്യക്തമായി പറയുന്നു. എംഎൽഎമാരുടെ അലവൻസുമായി ബന്ധപ്പെട്ട വിശദമായ രേഖകൾ നിയമസഭയുടെ ഔദ്യോഗിക വെബ്സൈറ്റിലും ലഭ്യമാണെന്നും വ്യക്തമാക്കുന്നു.
