ഇന്ത്യയിലെ അതിവേഗ റെയിൽ ശൃംഖലയായ വന്ദേ ഭാരത് ദക്ഷിണ- പശ്ചിമ റെയിൽവേ സോണിന് കീഴിലുള്ള നാല് ട്രെയിനുകളുടെ സമയക്രമത്തിൽ മാറ്റം വരുത്തി. ഹൈദരാബാദിനെയും ബെംഗളൂരുവിനെയും ബന്ധിപ്പിക്കുന്ന കാച്ചെഗുഡ- യശ്വന്ത്പൂർ സർവീസുകളുടെ സമയത്തിലാണ് പ്രധാന മാറ്റങ്ങളിലൊന്ന്.
20703 നമ്പർ കാച്ചെഗുഡ- യശ്വന്ത്പൂർ വന്ദേ ഭാരത് എക്സ്പ്രസ് ഇനി മുതൽ വൈകുന്നേരം 15:55ന് ആയിരിക്കും ഹിന്ദുപൂർ സ്റ്റേഷനിൽ എത്തിച്ചേരുക. മുമ്പ് ഇത് 15:48 ആയിരുന്നു. സമാനമായി, മടക്ക സർവീസായ 20704 യശ്വന്ത്പൂർ- കാച്ചെഗുഡ വന്ദേ ഭാരത് എക്സ്പ്രസ് ഉച്ചയ്ക്ക് 12:17ന് ഹിന്ദുപൂരിൽ എത്തും.
കർണാടകയിലെ പ്രധാന നഗരങ്ങളെ ബന്ധിപ്പിക്കുന്ന കലബുറഗി- എസ്.എം.വി.ടി ബെംഗളൂരു വന്ദേ ഭാരത് എക്സ്പ്രസിൻ്റെ (22231) സമയവും പരിഷ്കരിച്ചിട്ടുണ്ട്. ഈ ട്രെയിൻ ഇനിമുതൽ രാവിലെ 11:13ന് ശ്രീ സത്യസായി പ്രശാന്തി നിലയത്തിൽ എത്തും; മുമ്പ് ഇത് 11:00 മണിയായിരുന്നു. കൂടാതെ യെലഹങ്ക സ്റ്റേഷനിൽ നേരത്തെ എത്തിയിരുന്ന 12:28ന് പകരം ഉച്ചക്ക് 12:58-നായിരിക്കും ട്രെയിൻ ഇനി എത്തിച്ചേരുക.
മടക്ക യാത്രയായ 22232 എസ്.എം.വി.ടി ബെംഗളൂരു- കലബുറഗി വന്ദേ ഭാരത് എക്സ്പ്രസ് വ്യാഴാഴ്ച ഒഴികെയുള്ള എല്ലാ ദിവസങ്ങളിലും സർവീസ് നടത്തും. ഷെഡ്യൂൾ ക്രമീകരണത്തിൻ്റെ ഭാഗമായി ഈ ട്രെയിനിൻ്റെയും പ്രധാന സ്റ്റേഷനുകളിലെ സമയത്തിൽ മാറ്റം വരുത്തിയിട്ടുണ്ട്.
തിരക്കേറിയ ഇൻ്റെർസിറ്റി റൂട്ടുകളിൽ കൂടുതൽ കാര്യക്ഷമമായ സേവനം ഉറപ്പാക്കുന്നതിനാണ് ഇന്ത്യൻ റെയിൽവേ ഈ മാറ്റങ്ങൾ നടപ്പിലാക്കിയത്. യാത്രക്ക് മുമ്പായി പുതുക്കിയ സമയക്രമം റെയിൽവേ വെബ്സൈറ്റിലോ ആപ്പിലോ പരിശോധിച്ച് ഉറപ്പുവരുത്തേണ്ടതാണ്.
