മൺസൂൺ കാലത്തെ വാഹന സുരക്ഷ; ഇൻഷുറൻസ് പരിരക്ഷയും ശ്രദ്ധിക്കേണ്ട കാര്യങ്ങളും

മൺസൂൺ കാലത്ത് കനത്ത മഴയും വെള്ളക്കെട്ടും മോട്ടോർ വാഹനങ്ങൾക്ക് വലിയ ഭീഷണിയാണ് സൃഷ്ടിക്കുന്നത്. വെള്ളം കയറി എഞ്ചിനും ഇലക്ട്രിക്കൽ ഭാഗങ്ങളും തകരാറിലാകുന്നത് സാധാരണമാണ്. ഒരു സ്റ്റാൻഡേർഡ് കോംപ്രിഹെൻസീവ് മോട്ടോർ ഇൻഷുറൻസ് പോളിസിയിൽ ഇത്തരം നഷ്ടങ്ങൾ പരിരക്ഷിക്കപ്പെടുമെങ്കിലും, എല്ലാ സാഹചര്യങ്ങളിലും പൂർണ്ണമായ നഷ്ടപരിഹാരം ലഭിക്കണമെന്നില്ല. മഴക്കാലത്തെ അപകടസാധ്യതകളെ നേരിടാൻ വാഹന ഉടമകൾ അറിഞ്ഞിരിക്കേണ്ട ഇൻഷുറൻസ് കാര്യങ്ങൾ ഇതാ:

സ്റ്റാൻഡേർഡ് ഇൻഷുറൻസിൻ്റെ പരിധി

വെള്ളപ്പൊക്കം, വെള്ളം കയറൽ, ചുഴലിക്കാറ്റ്, മണ്ണിടിച്ചിൽ തുടങ്ങിയ പ്രകൃതിദുരന്തങ്ങൾ മൂലമുള്ള നാശനഷ്ടങ്ങൾ ഒരു സ്റ്റാൻഡേർഡ് കോംപ്രിഹെൻസീവ് പോളിസിയിൽ ഉൾപ്പെടുന്നു. പോളിസി നിബന്ധനകൾക്കും ഇൻഷ്വർ ചെയ്ത പ്രഖ്യാപിത മൂല്യത്തിനും (IDV) വിധേയമായി അറ്റകുറ്റപ്പണികൾക്കുള്ള ചെലവ് കമ്പനി നൽകും. എന്നാൽ, തേയ്മാനം, തുരുമ്പെടുക്കൽ, മെക്കാനിക്കൽ തകരാറുകൾ എന്നിവ സാധാരണ പോളിസികളിൽ നിന്ന് ഒഴിവാക്കപ്പെട്ടിരിക്കുന്നു.

ക്ലെയിം നിഷേധിക്കപ്പെടാതെ ശ്രദ്ധിക്കുക

• വെള്ളത്തിൽ മുങ്ങിയ വാഹനം സ്റ്റാർട്ട് ചെയ്യരുത്: വെള്ളക്കെട്ടിൽ വാഹനം കുടുങ്ങിയാൽ ഒരിക്കലും അത് സ്റ്റാർട്ട് ചെയ്യാൻ ശ്രമിക്കരുത്. ഇത് എഞ്ചിൻ പിടുത്തത്തിനോ (Engine Seizure) ‘ഹൈഡ്രോസ്റ്റാറ്റിക് ലോക്കിനോ’ കാരണമാകും. ഇത്തരം പ്രവൃത്തികൾ അശ്രദ്ധയായി കണക്കാക്കി ഇൻഷുറൻസ് കമ്പനികൾ ക്ലെയിം നിരസിക്കാൻ സാധ്യതയുണ്ട്.
• ഉടൻ അറിയിക്കുക: അപകടം സംഭവിച്ചാൽ താമസിയാതെ തന്നെ ഇൻഷുറൻസ് കമ്പനിയെ വിവരം അറിയിക്കുക. അറ്റകുറ്റപ്പണികൾക്ക് മുൻപ് വാഹനത്തിൻ്റെ കേടുപാടുകൾ വ്യക്തമാക്കുന്ന ഫോട്ടോകളും വീഡിയോകളും തെളിവായി സൂക്ഷിക്കേണ്ടത് അത്യാവശ്യമാണ്.

മൺസൂൺ കാലത്തേക്ക് വേണ്ട അധിക ആഡ്- ഓണുകൾ

അടിസ്ഥാന പോളിസിക്ക് പുറമെ ചില പ്രത്യേക ആഡ്- ഓണുകൾ വാഹന ഉടമകൾ പരിഗണിക്കേണ്ടതുണ്ട്:

• എഞ്ചിൻ പ്രൊട്ടക്ഷൻ: വെള്ളം കയറി എഞ്ചിൻ തകരാറിലായാൽ അതിനുള്ള ചെലവ് ഈ ആഡ്- ഓൺ വഴി ലഭിക്കും.
• സീറോ- ഡിപ്രീസിയേഷൻ: ഭാഗങ്ങൾ മാറ്റിസ്ഥാപിക്കുമ്പോൾ മൂല്യത്തകർച്ച പരിഗണിക്കാതെ മുഴുവൻ തുകയും ക്ലെയിം ചെയ്യാൻ ഇത് സഹായിക്കുന്നു.
• കൺസ്യൂമബിൾസ് റൈഡർ: എഞ്ചിൻ ഓയിൽ, ഫിൽട്ടറുകൾ തുടങ്ങിയ ഉപഭോഗ വസ്തുക്കൾക്കുള്ള ചെലവ് ഇതിലൂടെ ലഭിക്കും.
• റോഡ്‌സൈഡ് അസിസ്റ്റൻസ്: വാഹനം കുടുങ്ങിപ്പോകുന്ന സാഹചര്യത്തിൽ ടോവിംഗ് സൗകര്യത്തിന് ഇത് ഉപകരിക്കും.

ഇലക്ട്രിക് വാഹന ഉടമകൾക്കുള്ള നിർദ്ദേശങ്ങൾ

ഇലക്ട്രിക് വാഹനങ്ങൾക്ക് (EV) വെള്ളപ്പൊക്കം വലിയ വെല്ലുവിളിയാണ് ഉയർത്തുന്നത്.

• വെള്ളം കയറിയാൽ ഇലക്ട്രിക് മോട്ടോറുകൾക്കും ഹൈ- വോൾട്ടേജ് ബാറ്ററികൾക്കും കേടുപാടുകൾ സംഭവിക്കാം.
• ഇവികൾക്കായി പ്രത്യേക ‘ബാറ്ററി പ്രൊട്ടക്ഷൻ കവർ’ എടുക്കുന്നത് നിർബന്ധമാണ്.
• വെള്ളത്തിൽ മുങ്ങിയ ഇലക്ട്രിക് വാഹനം ചാർജ് ചെയ്യാനോ ഓണാക്കാനോ ശ്രമിക്കരുത്. വാഹനം പുക പുറപ്പെടുവിക്കുകയാണെങ്കിൽ ഉടൻ അഗ്നിശമന സേനയെ അറിയിക്കുക.

അടിയന്തര ഘട്ടത്തിൽ ചെയ്യേണ്ടവ:

1. വാഹനം ഉടൻ ഓഫാക്കുക, സ്റ്റാർട്ട് ചെയ്യാൻ ശ്രമിക്കരുത്.
2. സാധ്യമെങ്കിൽ ബാറ്ററി വിച്ഛേദിച്ച് വാഹനം സുരക്ഷിത സ്ഥാനത്തേക്ക് മാറ്റുക.
3. ഇൻഷുറൻസ് സർവേയറുടെ അനുമതിയില്ലാതെ അറ്റകുറ്റപ്പണികൾ ആരംഭിക്കരുത്.
4. അറ്റകുറ്റപ്പണികൾക്കായി എപ്പോഴും അംഗീകൃത സർവീസ് സെന്ററുകളെ മാത്രം സമീപിക്കുക.

മഴക്കാലത്തെ അപകട സാധ്യതകൾ മുൻകൂട്ടി കണ്ട് പോളിസിയിൽ ആവശ്യമായ ഭേദഗതികൾ വരുത്തുന്നതും ആഡ്- ഓണുകൾ പരിശോധിക്കുന്നതും വരാനിരിക്കുന്ന വലിയ സാമ്പത്തിക നഷ്ടങ്ങൾ ഒഴിവാക്കാൻ സഹായിക്കും.