റഷ്യയിൽ നിന്നുള്ള എണ്ണ ഇറക്കുമതി കുറച്ച് വെനിസ്വേലയിൽ നിന്ന് കൂടുതൽ ക്രൂഡ് ഓയിൽ വാങ്ങാൻ ഇന്ത്യയ്ക്കുമേൽ അമേരിക്ക സമ്മർദം ചെലുത്തുന്നതായി റിപ്പോർട്ടുകൾ. ഇന്ത്യയും റഷ്യയും തമ്മിലുള്ള ഊർജബന്ധം ദുർബലപ്പെടുത്തുന്നതിനൊപ്പം ആഗോള എണ്ണ വിപണിയിൽ സ്വാധീനം വർധിപ്പിക്കുകയുമാണ് അമേരിക്കയുടെ ലക്ഷ്യമെന്ന് ജിയോപൊളിറ്റിക്കൽ നിരീക്ഷകർ വിലയിരുത്തുന്നു. എന്നാൽ ഇന്ത്യയുടെ വൻ ഊർജാവശ്യം നിറവേറ്റാൻ വെനിസ്വേലയ്ക്ക് മാത്രം കഴിയില്ലെന്നാണ് വിദഗ്ധരുടെ നിലപാട്.
ഇന്ത്യയുടെ എണ്ണ ഇറക്കുമതിയിൽ റഷ്യ ഇപ്പോഴും പ്രധാന പങ്കാളിയാണ്. സെപ്റ്റംബറിൽ ഇന്ത്യയുടെ ക്രൂഡ് ഓയിൽ ഇറക്കുമതിയിലെ റഷ്യൻ വിഹിതം 33.5 ശതമാനമായിരുന്നുവെന്നാണ് റിപ്പോർട്ടിൽ പറയുന്നത്. അതേസമയം, വെനിസ്വേലയിൽ നിന്നുള്ള ഇന്ത്യയുടെ ഇറക്കുമതി ഈ വർഷം ഏപ്രിൽ മുതൽ ഓഗസ്റ്റ് വരെയുള്ള കാലയളവിൽ 3.6 ബില്യൺ ഡോളറായി ഉയർന്നതായി ഗ്ലോബൽ ട്രേഡ് റിസർച്ച് ഇനിഷ്യേറ്റീവ് ചൂണ്ടിക്കാട്ടുന്നു.
എന്നാൽ വെനിസ്വേലൻ എണ്ണയുടെ പരിമിതമായ ഉൽപ്പാദനശേഷിയും ഇന്ത്യയിലേക്കുള്ള ഉയർന്ന ഗതാഗതച്ചെലവും റഷ്യൻ എണ്ണയ്ക്ക് പകരമാകുന്നതിന് തടസ്സമാണ്. കൂടാതെ, വെനിസ്വേലൻ എണ്ണയുടെ പ്രത്യേക സ്വഭാവം ശുദ്ധീകരണത്തിലും സാങ്കേതിക വെല്ലുവിളികൾ സൃഷ്ടിക്കുന്നു. ഇന്ത്യയുടെ ഊർജാവശ്യം നിറവേറ്റാൻ വിവിധ സ്രോതസ്സുകളിൽ നിന്നുള്ള സ്ഥിരമായ വിതരണം അനിവാര്യമാണെന്നാണ് വിദഗ്ധർ ചൂണ്ടിക്കാട്ടുന്നത്.
വെനിസ്വേലയുമായി ബന്ധപ്പെട്ട അമേരിക്കയുടെ ഉപരോധനയങ്ങളിൽ മുൻകാലങ്ങളിൽ ഉണ്ടായ മാറ്റങ്ങൾ ഇന്ത്യൻ കമ്പനികളുടെ നിക്ഷേപങ്ങളെയും ബാധിച്ചിട്ടുണ്ട്. അതിനാൽ അമേരിക്കയുടെ നയതന്ത്ര നിലപാടുകളിലെ അനിശ്ചിതത്വവും ഇന്ത്യ പരിഗണിക്കേണ്ടിവരും. കുറഞ്ഞ ചെലവിൽ തടസ്സമില്ലാത്ത ഊർജവിതരണം ഉറപ്പാക്കുന്നതിനൊപ്പം റഷ്യയുമായുള്ള തന്ത്രപ്രധാന ബന്ധം നിലനിർത്തുന്നതും ഇന്ത്യയുടെ ഊർജനയത്തിലെ പ്രധാന വെല്ലുവിളിയായി തുടരുകയാണ്.
